“Padagos na Gibohon Ini sa Paggirumdom sa Sako”
1 Pinagbotan ni Jesus an saiyang mga parasunod na selebraron an anibersaryo kan saiyang kagadanan. (Luc. 22:19) Sa taon na ini an mga Saksi ni Jehova sa bilog na kinaban siselebraron an Memorial kan kagadanan ni Cristo sa Biyernes, Abril 17, pagkasolnop kan aldaw.
2 Personal na Pag-andam: Paano kita makaaandam nin angay sa pagselebrar kan importanteng okasyon na ini? An sarong paagi iyo an may pamibing paghorophorop sa buhay asin ministeryo ni Jesus sa daga. (Mat. 20:28) Tanganing matabangan an lambang saro na apresyaron an probisyon na ini, irinirekomendar mi na konsideraron an mga kapitulo 112 sagkod 116 kan The Greatest Man Who Ever Lived.
3 An satong pagbasa sa Biblia bago an Memorial ngonyan na taon kompuwesto nin piniling mga bersikulo gikan sa libro nin Biblia na Marcos. Iniskedyul an espesyal na pagbasang ini nin Biblia sa Abril 12-17. Gabos kita boot na kumua nin bastanteng oras tanganing maghorophorop sa nakapagpapapensar na mga pangyayaring ini.
4 Maingat na Preparasyon kan mga Magurang: Igwa daw nin bastanteng tukawan para sa gabos na linalaoman na mag-atender? Kun sobra sa sarong kongregasyon an magamit kan hall, kaipuhan an maingat na mga areglo tanganing an kada kongregasyon magkaigwa nin bastanteng oras sa pagselebrar kan Memorial. An mga magseserbing attendants kaipuhan na impormaran manongod sa saindang mga paninimbagan. Bobooton ninda na magkaigwa nin inisyatiba sa pagpadagos sa mga bagohan na maatender. Kaipuhan na pilion an pinakakuwalipikadong espiker. Mag-asignar nin responsableng mga magurang o ministeryal na lingkod na maglilibot kan mga emblema. Maninigong magkaigwa nin daing lebadurang tinapay asin purong mapulang arak. Para sa dugang na pagirumdon, helingon an Setyembre 1, 1985 na luwas kan An Torrengbantayan, pahina 12 (sa Ingles, Pebrero 15, 1985, p. 19).
5 Paagi sa maingat na patienot na pag-andam, ikapaheheling niato na lubos tang inaapresyar an kahalagahan kan espesyal na okasyon na ini asin na mawot niatong iselebrar an Memorial kan kagadanan ni Cristo sa pagsunod sa pagboot ni Jesus.—1 Cor. 11:23-26.
[Kahon sa pahina 7]
1. An lambang saro daw, kaiba an espiker, inimpormaran kan eksaktong oras asin lugar kan selebrasyon? Igwa daw nin malulunadan an espiker?
2. Ginibo na daw an depinidong mga areglo sa paggibo kan mga emblema?
3. Ginibo na daw an mga areglo para sa saro na madara nin malinig na mantil sa lamesa asin an kinakaipuhan na bilang nin mga kopa asin plato?
4. Anong mga areglo an ginibo na para sa paglinig sa hall bago an Memorial?
5. Iinasignar na daw an mga attendants asin serbidor? Iniskedyul na daw an miting kaiba ninda bago an Memorial tanganing pag-olayan an saindang mga paninimbagan? Noarin?
6. Kompleto na daw an mga areglo tanganing tabangan an gurang asin may diperensiang mga tugang na lalaki asin babae? Ginibo na daw an mga areglo tanganing maserbihan an siisay man na linahidan na tibaad nasa ospital asin dai makaduduman sa Kingdom Hall?