Pag-andam Para sa Sarong Espesyal na Okasyon
1 “Padagos na gibohon nindo ini sa paggirumdom sa sako.” (Luc. 22:19) An mga tataramon na ini isinabi ni Jesus kan iniestablisar an Pamanggihan kan Kagurangnan. An okasyon na ini tamang siniselebrar taon-taon sa Nisan 14. Ngonyan na 1988 an Memorial kan kagadanan ni Cristo natagbo sa Biyernes, Abril 1. Magigin presente daw kamo?
AN PAG-ANDAM KAIPUHAN NIN GABOS
2 Kaipuhan an pag-andam tanganing kamtan niato an bilog na pakinabang sa pinakasagradong aldaw na ini. Ano an maninigo niatong iplano? Enot, kaipuhan na andamon niato an satong isip. An marahay na pantabang digdi iyo an espesyal na pagbasa sa Biblia para sa semana kan Memorial, arog kan sinasabi sa satong kalendaryo asin sa An Satong Ministeryo sa Kahadean na ini. Tawan nin panahon an paghorophorop mantang kamo nagbabasa, sa siring inaandam an saindong isip asin puso para sa espesyal na okasyon na ini.
3 Iplanong umabot sa Kingdom Hall nin amay. Paagi kaini masasabat nindo an mga bagohan. Kan sarong taon 294,712 an nag-atender digdi sa Pilipinas, na haros tolong doble sa kabilangan kan satong mga parahayag. Tibaad mas dakol pa an umatender ngonyan na taon. Kaya paagi sa pag-abot nin amay asin pagkumusta sa mga bagohan o iregular, tibaad madagka nindo sinda na umatender nin regular sa ngapit.
4 Maninigong iplano an espesyal na aldaw nin paglilingkod sa langtad para sa aldaw kan Memorial. Iyan piyesta opisyal kan kinaban, kaya taano ta dai magplano na NGONYAN na lumuwas sa ministeryo? Dalawon liwat an mga dating inaadalan sa Biblia, suskritor, asin iba pa na tibaad umatender kun pagigirumdomon nindo sinda. Kun an iba nagkakaipo nin tabang tanganing makaatender, gumibo nin areglo na ibanan sinda.
AN MAGIGIBO NIN KAMAGURANGAN
5 Bobooton kan grupo nin kamagurangan na tawan nin atension an dakol na detalye nin patienot pa. Ano an kaiba digdi? Helingon an listahan sa kahon na nasa pahina 3.
6 Dai magkaigwa nin ibang pagtiripon sa aldaw kan Memorial. An ano man na pagtiripon na nakaiskedyul sa aldaw na iyan maninigong iareglo sa ibang aldaw sa laog kan semanang iyan. Girumdomon na, minsan ngani puwedeng pumoon nin mas amay an pahayag sa Memorial, an paglibot kan mga emblema dai maninigong gibohon sagkod na dai pa minasolnop an aldaw.
7 Marahay na patienot na sabihan kan kamagurangan an mga tugang na dolokon an mga bagohan na nag-atender asin makipagmidbidan sa sainda. Kun mayo pa sinda nin regular na pag-adal sa Biblia, tibaad puwede sindang opresiran. Siertohon na kuanon an saindang ngaran asin adres tanganing maataman an interes pakalihis kan Memorial.
8 An Memorial espesyal na okasyon para sa sato gabos. Iyan panahon na isaysay an pagkamoot ni Jehova sa pagsugo kan saiyang Aki bilang pantubos, na tinatawan kita kan oportunidad na makaabot sa matanos na kamugtakan sa atubang ni Jehova. Dai niato bobooton na togotan an ano man na aktibidad bago o pakalihis kan Memorial na makaraot sa sagradong okasyon na ini.
[Kahon sa pahina 3]
Mga Bagay na Aandamon
(Helingon an w85 2/15 p. 19; 9/1/85 sa Bicol)
1. Sinabihan daw an espiker kan eksaktong oras asin lugar kan selebrasyon? May lulunadan daw sia?
2. Siisay an mag-aandam kan mga emblema?
3. Ginibo daw an areglo na may magdara nin malinig na mantel asin kan kinakaipuhan na mga baso asin plato?
4. Ano an ginibong areglo sa paglinig kan pagtitiriponan?
5. Siisay an makikipag-olay sa mga attendant asin serbidor bago an Memorial tanganing repasohon an saindang mga trabaho? Noarin? Ano an gigibohon tanganing masierto na an mga presente, an espiker, asin an mga serbidor listong mapaglingkodan?
6. Anong mga paisi an gigibohon manongod sa oras asin lugar nin pagtiripon bago maglingkod sa aldaw kan Memorial?
7. Tapos na daw an areglo sa pagtabang sa mga gurang asin maluya nang mga tugang? May ginibo daw na areglo na maserbihan an siisay man na linahidan na tibaad nasa ospital asin dai makaaatender?