Memorial—An Kristianong Selebrasyon
1 Pinonan ni Jesus an Memorial kan Nisan 14, 33 C.E., asin sinabihan nia an saiyang mga apostol: “Padagos na gibohon nindo ini sa paggirumdom sa sako.” (Luc. 22:19) Ipinaliwanag ni Pablo na sa paggibo kaiyan “ipinagbabalangibog nindo an pagkagadan kan Kagurangnan, sagkod na sia dumatong.” (1 Cor. 11:26) Angay sana na girumdomon an pagkagadan ni Jesus huli sa gabos na ginigibo kaiyan sa pagkaotob kan mga katuyohan ni Jehova. An pantubos na atang nagtatao kan mismong pasisikadan kan satong pagtubod asin nagtatao sato nin paglaom sa buhay sa ngapit.
2 Poon kan pagpopoon kan Kristianong kongregasyon, an mga disipulo ni Jesus maimbod na nagselebrar sa Memorial. Sa modernong mga panahon ibinareta kaidto pang 1899 na 2,501 sa Estados Unidos an nagpartisipar sa selebrasyon kan Memorial. Ngonyan, pakalihis nin 92 na taon, an Nisan 14 natagbo sa Sabado, Marso 30, pagkasolnop kan aldaw, asin labing dies milyones katawo sa bilog na kinaban an linalaoman na mag-atender.
KAIPUHAN AN PAG-ANDAM KAN KAMAGURANGAN
3 Huli sa halaga kan okasyon na ini asin sa linalaoman na dakol na maatender, an mga kongregasyon patienot na nag-aandam. (1 Cor. 14:40) Mayo nin rituwal asin estriktong pormalidad. Mayo, ta sa Mateo 26:26-30 maririsa niato an pagigin simple kan pagkapoon ni Jesus sa selebrasyon na ini. (1 Cor. 11:23-26) Alagad dapat na otobon an pirang kaipuhan na detalye tanganing maselebrar nin tama an Memorial. Ano iyan?
4 Enot, sinisierto kan kamagurangan na ikinapaheheling an paggalang sa Pamanggihan kan Kagurangnan paagi sa pagkaigwa nin tamang mga emblema. Tinapay na daing lebadura, na ginibo sana sa trigo asin tubig an puwedeng gamiton. Saro pa, solamente an daing kasalak na mapulang arak nin ubas, arog baga kan Chianti, Burgundy, o claret, an maninigong gamiton. An sadiring gibong mapulang arak puwedeng gamiton kun iyan dai hinamisan o tinimplahan.
5 Bobooton man kan kamagurangan na pumili nin arogan na mga tugang, mas marahay kun kamagurangan o ministeryal na mga lingkod, na maglibot kan mga emblema. Sinda maninigong organisado asin nakasasabot nin eksakto kun ano an saindang asignasyon. An mga attendant maninigong tawan nin instruksion kun ano an saindang trabaho, arog baga kan paggiya sa mga tawo palaog sa tiriponan asin pagkontrol sa trapiko. Ini partikularmenteng mahalaga kun may nagkapirang kongregasyon na magamit sa iyo man sanang Kingdom Hall. An espiker maninigo man na masabihan nin tama kan oras asin lugar kan selebrasyon.
PERSONAL NA PAG-ANDAM
6 Kita gabos maninigong maghingoa na magkamit nin lubos na pakinabang sa pinakasagradong selebrasyon na ini. Puwede niatong andamon an satong isip paagi sa pagsubaybay sa babasahon sa Biblia para sa Marso 25-30, na sinasabi sa satong kalendaryo asin sa pahina 3 kan An Satong Ministeryo sa Kahadean na ini. Siring man, maninigo niatong imbitaran asin tabangan an pinakadakol na mapupuwede na umatender. Asin maninigo niatong istimaron an mga nag-atender.
7 Paagi sa lubos na patienot na pag-andam, ikapaheheling niato na ibinibilang niato na an pag-atender sa Memorial sarong pribilehiyo asin oportunidad na ikapaheling an pag-apresyar sa atang ni Cristo. An selebrasyon logod kan Memorial sa taon na ini magin panahon nin pagpakosog sa gabos na lingkod ni Jehova. Ikatanom logod kaiyan sa sato gabos an espiritu nin pagsarig na ipinaheling ni Jesus. An pagsarig niato ki Jehova makatatabang sato na madaog an kinaban asin kamtan an satong balos.—Juan 16:33; 2 Ped. 1:10; Kap. 7:9, 10, 14.