An Pinakaimportanteng Aldaw sa 1992

¹ An pinakaimportanteng petsa sa saindong kalendaryo ngonyan na taon iyo an Biyernes, Abril 17. Pagkasolnop kan aldaw sa aldaw na iyan, isiselebrar niato an Memorial kan kagadanan ni Cristo. (1 Cor. 11:​20, 24) Taano ta an petsa kan kagadanan ni Jesus ginibong aldaw para sa espesyal na paggirumdom?

² Memorial​—An Kahalagahan Kaiyan: An kagadanan ni Jesus sarong pangyayari na may unibersal na kahalagahan. Kan magsurat sa pinaniaki sa espiritung Kristianong kongregasyon, an apostol na si Pablo nagsabi: “Sa gabos na panahon na kumakan kamo kan tinapay na ini asin uminom kan kopang ini, ipinagbabalangibog nindo an pagkagadan kan Kagurangnan, sagkod na sia dumatong.” (1 Cor. 11:26) Kaya an Memorial nangangapodan nin espesyal na atension sa kahalagahan kan kagadanan ni Jesu-Cristo sa pagkaotob kan katuyohan ni Jehova. Itinatampok kaiyan an kahulogan kan atang na kagadanan ni Jesus asin an paagi na nakaapektar an saiyang kagadanan sa mga magigin kairiba niang paramana sa langitnon na Kahadean.​—Juan 14:​2, 3; Heb. 9:15.

³ Paagi sa pagdadanay sa integridad sagkod sa saiyang kagadanan, pinakangbanal ni Jesus an ngaran kan saiyang Ama asin ipinaheling na an sarong sangkap na tawo kayang patunayan an kaimbodan sa Dios sa irarom kan gabos na klase nin pagbalo na puwedeng darahon ni Satanas tumang saiya. Itinao man kan saiyang kagadanan an sangkap na atang bilang tawo na kaipuhan tanganing matubos an mga aki ni Adan asin gibohon na posible para sa kun pira an tumubod na mabuhay sagkod lamang sa sarong paraisong daga. Huli sa gabos na magigibo paagi kan kagadanan ni Jesus, angay nanggad para saiya na pagbotan an saiyang mga disipulo na girumdomon an saiyang kagadanan.​—rs p. 266-7.

⁴ Kun Paano Kita Makapaheheling nin Apresasyon: An kinaban igwa nin dakol na selebrasyon sa laog nin taon, asin dakol an ginigibo tanganing mapalakop an mga iyan. Sa ibong na kampi, an Pamanggihan nin Kagurangnan iyo an solamenteng selebrasyon na ipinagboot na gibohon kan mga odok na nagsusunod sa lakad ni Jesus. Daing duwa-duwa, iyan an pinakadakulang selebrasyon kan taon para sa gabos na tunay na Kristiano. Dai daw kita pahihiroon kan hararom na kahalagahan kan Pamanggihan nin Kagurangnan na isentro dian an satong atension sa Abril?

⁵ Tibaad puwede kitang gumamit nin dikit na minuto kada semana sa Abril tanganing pag-olayan kaiba kan satong mga inaadalan sa Biblia an mga kasuratan na nagtatampok kan kahulogan kan kagadanan ni Cristo asin ipaheling sainda an basihan para sa Memorial. Puwede man niatong dagkahon sinda na sundan nin marhay an pagbasa kan Biblia sa Memorial sa Abril 12 sagkod 17. Ini matabang na mapararom an saindang apresasyon para sa Pamanggihan nin Kagurangnan.

⁶ Huli sa kahalagahan kan selebrasyon nin Memorial, gibohon logod niato an gabos na makakaya tanganing tabangan an iba na makaatender. An nakatatabang na mga pagirumdom sa kamagurangan itinao sa pahina 7 kaining An Satong Ministeryo sa Kahadean.

⁷ Akoon logod niato an pinakaimportanteng aldaw na ini sa 1992 na may malinaw na pakasabot asin hararom na apresasyon para sa gabos na kahulogan kan kagadanan ni Jesus para sa katawohan. Iyo, an gabos logod sato magin presente sa Abril 17 na sa giraray an tunay na mga parasamba ni Jehova maimbod na kukuyogon an pagboot ni Jesus na ‘padagos na ibalangibog an kagadanan kan Kagurangnan, sagkod na sia dumatong.’