An Memorial—Sarong Okasyon na May Dakulang Importansia!
1 Sa Domingo, Marso 23, pagkasolnop nin saldang, seselebraron niato an Memorial kan kagadanan ni Cristo. (Luc. 22:19) Tunay na ini sarong okasyon na may dakulang importansia! Paagi sa pagpapadanay kan saiyang integridad ki Jehova sagkod sa kagadanan, pinatunayan ni Jesus na posible para sa sarong tawo na papagdanayon an sangkap na diosnon na debosyon maski sa irarom nin grabeng tension, sa siring sinusuportaran an pagkamay diretso kan soberaniya ni Jehova. (Heb. 5:8) Dagdag pa, itinao kan kagadanan ni Cristo an sangkap na atang bilang tawo na kaipuhan tangani na tuboson an katawohan, na pinangyayaring posible para sa mga naggigibo nin pagtubod na mabuhay na daing katapusan! (Juan 3:16) Paagi sa pagigin presente sa Memorial, ikapaheheling niato an satong odok sa pusong pag-apresyar kapwa sa pagkamoot ni Jehova asin sa atang ni Jesus para sa sato.
2 Ineenkaminar an gabos na sundan an programa nin pagbasa sa Biblia na nakaiskedyul para sa Marso 18-23, siring sa nasusurat sa 1997 Calendar of Jehovah’s Witnesses. Siring man, an pampamilyang pag-orolay sa kapitulo 112-16 kan librong The Greatest Man Who Ever Lived matabang na isentro an satong atension sa pinakaimportanteng semana sa kasaysayan nin tawo.
3 Puede daw nindong dugangan an panahon na ginagamit nindo sa ministeryo sa langtad sa panahon kan Memorial? Angay para sa kongregasyon na mag-areglo nin pinahiwas na mga aktibidad sa paglilingkod sa langtad sa mga aldaw bago asin pakatapos kan Memorial. Dakol na parahayag an lubos na maaprobetsar kan limang Sabado asin Domingo sa Marso tanganing maglingkod bilang mga auxiliary payunir. Taano ta dai umiba sainda? Kita gabos puedeng magkaigwa nin lubos na pakikikabtang sa pagdodoon kan importansia nin pag-atender sa Memorial. Huling natangod iyan sa Domingo, magigin mas pasil para sa dakol na umatender. Siertohon na imbitaran an gabos na estudyante sa Biblia asin iba pang mga interesado na umiba sa sato. Ihiras sa sainda an sinasabi sa pahina 127, parapo 18 kan librong Kaaraman mapadapit sa sarong aldaw kan taon na dapat na espesyalmenteng selebraron.
4 Maninigong planohon nin patienot kan kamagurangan na siertohon na areglado asin malinig an Kingdom Hall. Maninigong gumibo nin mga areglo na may saro na kumua kan mga emblema. An pagserbi kan mga emblema maninigong organisadong marhay. An nakatatabang na mga suhestion kun paano kita makapaheheling nin paggalang sa Pamanggihan nin Kagurangnan itinao sa An Torrengbantayan na Setyembre 1, 1985, pahina 12 (w85-E 2/15, p. 19).
5 Sabaton an pinakadakulang okasyon na ini sa 1997 na may hararom na pag-apresyar sa gabos na kahulogan para sa sato kan kagadanan ni Jesus. Magin presente sa banggi kan Marso 23, sa panahon na an tunay na mga Kristiano sa gabos na lugar fiel na magseselebrar kan Memorial.