An “Ibang Karnero” Asin an Pamanggihan kan Kagurangnan

“[Si Jesus] sarong pantubos na atang para sa satong mga kasalan, alagad bako sanang kan sa sato kundi siring man kan sa bilog na kinaban.”—1 JUAN 2:2.

1. Ano an positibong mga resulta kan ‘paghuhulit kan maogmang bareta kan Kahadean’?

SI Jesus nagsabi: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” (Mateo 24:14) An nagkapira sa kapag-arakian nin 1914 buhay pa tanganing magpatotoo na maimbod na inotob kan mga Saksi ni Jehova an pagboot na ini. Bilang resulta, ginatos na ribo nin mga tawong may sadiosan na puso, na naliwat an salang paghona huli sa mga pagkasudya kan kinaban na ini, an nag-ako sa maogmang bareta. Idinusay ninda an saindang sadiri ki Jehova Dios asin itinao an saindang kaimbodan sa saiyang Kahadean, na ipinahahayag an pagdusay na ini paagi sa bautismo sa tubig. May 179,421 na guminibo kan siring na dalan nin kadonongan kan 1984. Garo baga sinda nagsabi sa banwaan na nagdadara kan ngaran nin Dios: “Maiba kami saindo, huli ta nabaretaan niamo na an Dios yaon dian sa saindo.”—Zacarias 8:23.

2. Anong bagay an nagdeterminar sa kun noarin titiponon ni Jesus an saiyang “ibang karnero”?

² An padagos na nagdadakol na “dakulang kadaklan” na ini nin mga parasamba kabtang kan inapod ni Jesus na saiyang “ibang karnero.” (Kapahayagan 7:9, 15; Juan 10:16) Igwa sinda kan makangangalas na paglaom na mabuhay sagkod lamang sa sarong daganon na paraiso. (Salmo 37:29) Ihinula ni Jesus na titiponon nia an maimbod na mga parasunod niang ini pakatapos na ikatao nia nguna an saiyang dai nababangang pagpapastor sa pagtipon sa sarong “sadangoton na aripompon” nin mga arog-karnero na para sa sainda sia mangongoltanan kan bagong tipan. (Lucas 12:32; Hebreo 9:15) Mantang nasa isip an pagtipon na ini sa duwang grupong arog-karnero sa “sarong aripompon,” masasabotan niato kun taano ta isinabi ni apostol Juan na si Jesu-Cristo “sarong pantubos na atang para sa satong mga kasalan, alagad bako sanang kan sa sato kundi siring man kan sa bilog na kinaban.”—1 Juan 2:1, 2.

Mga Pagkaliwat sa Punto-de-Vista

3, 4. (a) Ano an naliwat na punto-de-vista nin dakol manongod sa pagselebrar kan Pamanggihan kan Kagurangnan? (b) Ano an boot sabihon ni Pablo sa pagsabing, “Huli ta sa gabos na panahon na kumakan kamo . . . asin uminom”?

³ An dakol na bagong natipon sa mga “ibang karnero” dating nagseselebrar kan Misa o Komunyon, na an pagkaparate asin paagi nin pagselebrar basado sa mga paniniwala kan relihiyosong organisasyon na naaayonan ninda. Alagad ngonyan narealisar na ninda na an Pamanggihan kan Kagurangnan maninigong selebraron nin makasaro sana taon-taon. Taano daw? Bueno, an Judiong Paskua senelebrar nin makasaro sana kada taon, asin pinonan ni Jesus an Memorial sa kaparehong bangging idto nin Paskua, Nisan 14. Kaidto sinabihan nia an saiyang mga disipulo: “Padagos nindong gibohon ini sa paggirumdom sako.” Idinugang pa ni Pablo: “Huli ta sa gabos na panahon na kumakan kamo kan tinapay na ini asin uminom kan kopang ini, ipinagbabalangibog nindo an pagkagadan kan Kagurangnan, sagkod na sia dumatong.” (1 Corinto 11:24-26) Malinaw na an boot sabihon ni Jesus an saiyang mga disipulo maninigong selebraron an saiyang kagadanan sa Aldaw nin Paskua, na minadatong nin makasaro kada taon. Kun siring, iyan senelebrar “sa gabos na panahon” sa laog kan panahon na ikinabuhay kan Kristianong kongregasyon. An totoo, an Memorial naselebrar na nin 1,953 na beses.

⁴ Igwa nin saro pang mahalagang kalaenan sa punto-de-vista na nasabotan kan grupong “ibang karnero.” Imbes na makikabtang sa tinapay asin arak siring sa dating ginigibo kan dakol sa sainda sa ibang iglesya, ngonyan naheling ninda na an saindang situwasyon “naliwat” sa pagigin paramasid. Taano daw, asin igwa daw kita nin pasisikadan sa Kasuratan para sa sarong prosedimiento na nagtatao nin lugar sa mga paramasid saka sa mga parapakikabtang?—2 Corinto 13:11; 2 Timoteo 3:16, 17.

5. (a) Isabi an pundamental na mga paghiro na dapat na gibohon nin sarong tawo tanganing makinabang sa atang ni Jesus. (b) Taano an Dios ta espesyal na naghiro para sa 144,000 sa mga parasunod ni Cristo Jesus?

⁵ Tanganing an siisay man makinabang sa “pantubos na atang” ni Cristo Jesus, may mga paghiro na kinakaipuhan na gibohon, baga man an sarong iyan may paglaom na mabuhay sa langit o baga man sia naglalaom na mabuhay sa sarong daganon na Paraiso. An pundamental na mga paghirong ini iyo an minasunod: (1) pagkua nin tamang kaaraman sa Tataramon nin Dios (Roma 10:13-15); (2) paggibo nin pagtubod (Hebreo 11:6); (3) pagsolsol (Mateo 4:17); (4) pagkakombertir (Gibo 3:19); (5) pagdusay (Lucas 9:23); asin (6) bautismo (Mateo 28:19). Pakatapos na magibo an mga paghirong ini na an Dios minahiro sa sarong espesyal na paagi para sa saro na pinipili niang magin saro sa 144,000, o “sadangoton na aripompon.” Sa anong katuyohan? Tanganing an tawong iyan magin espirituwal na aki nin Dios na may paglaom na magin saserdote asin hade kaiba ni Cristo Jesus. (Kapahayagan 20:4, 6) Igwa na sana nin natatada sa espirituwal na mga aking iyan na nabubuhay ngonyan, asin an mga ini an tamang makikabtang sa mga emblema. Kun siring ini an dahelan kun taano ta an kadaklan sa mga Saksi ni Jehova mga paramasid asin bakong parapakikabtang.

An Paskua Asin an Memorial

6. Taano an iba ta nangangatanosan na an “ibang karnero” maninigong makikabtang sa mga emblema, asin anong hapot an pinalalataw kaini?

⁶ May mga nagsuherir na an nagdadakol na “ibang karnero” maninigong makikabtang sa mga emblema. An pangangatanosan ninda iyo ini: Mantang “an Pagboot igwa nin anino kan marahay na mga bagay na madatong,” asin mantang an saro sa mga kahagadan kan Pagboot iyo an pagselebrar sa Paskua pareho kan mga Israelitas asin kan tinuring mga nakikihimanwa, ini nagpaparisa na an duwang grupo nin mga arog-karnero sa “sarong aripompon” na sakop kan “sarong pastor” kaipuhan na makikabtang sa mga emblema kan Memorial. (Hebreo 10:1; Juan 10:16; Bilang 9:14) Ini nagpapalataw sa sarong mahalagang hapot: “An Paskua daw sarong tipo kan Memorial?

7. Sa anong mga bagay na an Paskua “anino kan marahay na mga bagay na madatong”?

⁷ Totoo na an nagkapirang bagay sa pagselebrar nin Paskua sa Egipto sierto na naotob ki Jesus. Ibinaing ni Pablo si Jesus sa kordero nin Paskua, na an sabi, “Si Cristo na satuyang paskua iinatang na.” (1 Corinto 5:7) An pagwirik kan dugo kan kordero nin Paskua sa mga harigi asin balagbag sa itaas nin mga pinto naggarantiya nin kaligtasan para sa panganay na nasa laog kan kada harong na Israelita. Kaagid kaiyan, paagi sa pagwirik kan dugo ni Cristo na “an kongregasyon kan mga panganay na nalilista sa kalangitan” nag-ako kan saindang kaligtasan, o “pagkabutas paagi sa pantubos.” (Hebreo 12:23, 24; Efeso 1:3, 7) Saro pa, dai maninigong mabari an minsan sarong tolang kan kordero nin Paskua, asin ini naotob man ki Cristo Jesus. (Exodo 12:46; Salmo 34:20; Juan 19:36) Kaya, totoo an pagsabi na an Paskua, sa nagkapirang bagay, saro sa dakol na kabtang kan Pagboot na nagtao nin “anino kan marahay na mga bagay na madatong.” An gabos na bagay na ini nagtokdo ki Cristo Jesus, “an Kordero nin Dios.”—Juan 1:29.

8-10. (a) Sa anong mahalagang bagay manongod sa dugo na an Paskua napapalaen sa Memorial? (b) Paano an mga tipan na konektado sa Memorial nagdodoon kan saro pang kalaenan? (c) Sa anong konklusyon kita dinadara kaini?

⁸ Minsan siring, an Paskua bako talagang tipo kan Pamanggihan kan Kagurangnan. Taano ta bako? Kan an Paskua ponan sa Egipto, an laman kan inasal na kordero kinakakan, alagad ta dai kinakakan an dugo kan kordero nin Paskua. Kabaliktaran kaiyan, kan establisaron ni Jesus an Memorial kan saiyang kagadanan espisipiko niang isinabi sa mga presente kaidto na kumakan kan saiyang laman asin uminom kan saiyang dugo, na ipinagsimbolo kan tinapay asin kan arak. (Exodo 12:7, 8; Mateo 26:27, 28) Sa napakahalagang bagay na ini—an dugo—an Paskua bakong tipo kan Pamanggihan kan Kagurangnan.

⁹ May saro pang bagay na dai maninigong lingawan. Ipinakipag-olay ni Jesus an duwang magkakoneksion na tipan sa saiyang mga disipulo, “an bagong tipan” asin an ‘sarong tipan para sa kahadean.’ (Lucas 22:20, 28-30) An duwang tipan na iyan pareho may koneksion sa pagigin may paglaom kan mga nakikikabtang na magin saserdote asin hade kaiba ni Cristo Jesus. Alagad sa Israel mayo nin tinuring nakikihimanwa na puwedeng magin sarong saserdote o hade. Sa bagay man na ini maheheling niato an pagkakalaen kan kapiyestahan nin Paskua sa Israel sa Pamanggihan kan Kagurangnan.

¹⁰ Kaya sa anong konklusyon kita dinadara kaini? An bagay na an tinuring nakikihimanwa nagkakan kan daing lebadurang tinapay, mapapait na gulay, asin kan kordero nin Paskua dai nagpapatunay na an mga kabilang ngonyan sa “ibang karnero” kan Kagurangnan na presente sa Memorial maninigong makikabtang sa tinapay asin sa arak.

Halaga nin Pag-atender sa Memorial

11. Sa anong mahahalagang dahelan na an “ibang karnero” maninigong umatender sa Memorial?

¹¹ Minsan siring, ini daw nagpaparisa na bakong mahalaga para sa mga kabilang sa “ibang karnero” na magin presente sa pagselebrar kan Memorial? Dai nanggad! Ini sarong okasyon para sa gabos na arog-karnerong mga parasunod ni Jesus na girumdomon si Jesus sa espesyal na gayong paagi. Sa okasyon na iyan ginigirumdom kan “ibang karnero” na sinda nakinabang na huli sa saindang pagtubod sa pinabolos na dugo ni Cristo sagkod sa punto na sinda ngonyan ibinibilang ni Jehova na “hinugasan ninda an saindang mga gubing asin pinaputi iyan sa dugo kan Kordero.” Ini an dahelan na sinda nakapagtatao nin “banal na paglilingkod aldaw asin banggi sa templo [nin Dios].” (Kapahayagan 7:14, 15) Nagigirumdoman man ninda na kaipuhan na sinda padagos na ‘hanapon si Jehova, an katanosan, asin an kahoyoan’ sa paglaom na iligtas sa “aldaw kan kaanggotan ni Jehova,” asin pakalihis kaiyan magkaigwa kan kaogmahan na makaabot sa pagkasangkap nin tawo. Sa katapustapusi sinda puwedeng aktuwal na ipahayag ni Jehova na matanos, na mangyayari pagkatapos na ikaentrega ni Jesus an Kahadean sa saiyang Ama.—Sofonias 2:2, 3; 1 Corinto 15:24; Kapahayagan 20:5.

12. Anong mga pakinabang an ibinubunga kan paghinanyog sa pahayag sa Memorial?

¹² An saro pang mahalagang dahelan na umatender iyo an bagay na an mga katotoohan na ipinaliliwanag sa pahayag sa Memorial kaiba sa “hararom na mga bagay nin Dios,” “matagas na kakanon para sa mga maygurang,” bako sanang gatas nin “enot na katokdoan.” (1 Corinto 2:10; Hebreo 5:13–6:1) An pahayag sa Kasuratan mapakosog sa pag-apresyar sa pagkamoot na ipinaheling ni Jehova sa pagkaigwa nin siring kamakangangalas na areglong pan-Kahadean para sa pagbendisyon sa pamilya nin tawo. Iyan saro man na oportunidad na ‘helingon nin maingat an Poon na Ahente asin Parasangkap kan satong pagtubod, si Jesus.’ Dai noarin man maninigong pagmenuson an pagkamoot na ipinaheling ni Jesus para sa sato, ni an mga tinios nia. (Hebreo 12:2, 3) Dugang pa, kita gabos makakaoyon na an dakol sa mahahalagang punto na ipinakipag-olay ni Jesus sa saiyang mga apostol kan iniestablisar an Memorial—mga punto manongod sa pagkasararo, pagkamoot, asin pagpamuraway sa ngaran ni Jehova—puwedeng ihiras sa mga “ibang karnero” saka sa “sadangoton na aripompon.”

Pagpaheling nin Mamomoton na Pagmakolog sa Gabos

13. Taano ta mahalaga na an mga emblema iabot sa gabos na nag-atender?

¹³ Mahalaga na an gabos na presente sa Pamanggihan kan Kagurangnan mapagirumdom sa paagi na inestablisar ni Jesus. An aktuwal na pag-arabotan kan tinapay asin kan arak nakatatabang na pakosogon an pag-apresyar para sa banal na mga bagay na pinag-olayan pa sana kan bangging idto. Pinapangyayari man kaiyan an lambang saro na patunayan kun ano an saiyang paglaom sa buhay—langitnon o daganon.”a An pagsunod sa tamang paagi iinooyon an kongregasyon sa ginigibo sa bilog na daga sa bangging iyan.—1 Corinto 14:40.

14. Paano an kamagurangan makakapagpaheling nin mamomoton na pagmakolog sa saro sa mga linahidan na naghehelang sa banggi kan Memorial?

¹⁴ Ipamugtak niato na an saro sa mga linahidan sa sarong kongregasyon naghehelang asin dai nakaatender sa Memorial. Ano na? Maninigong gibohon an gabos na paghihingoa na an saro sa kamagurangan darahon an mga emblema sa naghehelang na Kristiano asin, kun kombenyente, an magurang puwedeng tumao nin pirang angay na komento bago iopresir an mga emblema asin tapuson iyan nin angay na pamibi. Mapapakosog nanggad an boot kan may helang! An siring na mga gibo nin mamomoton na pagmakolog nagpapaoswag sa espiritu nin pagkamoot sa laog kan kongregasyon.—Salmo 133:1.

15. Isabi an iba pang mga paagi na puwedeng ikapaheling an paggalang sa Pamanggihan kan Kagurangnan.

¹⁵ An iba pang interesanteng mga hapot pinalataw manongod sa paagi asin klase nin mga emblema na dapat na gamiton sa Memorial. An simbag sa mga hapot na ini makukua sa pahina 13 sa temang “Pagpaheling nin Paggalang sa Pamanggihan kan Kagurangnan.” Marahay na maingat na sundon kan responsableng kamagurangnan an sinasabi dian.

An Pangangaipo nin Pagsiyasat sa Sadiri

16, 17. (a) Ano an ihinapot nin nagkapira manongod sa pakikikabtang sa Memorial, asin siisay sana an makakasimbag? (b) Paano an Dios nagtatao nin nakakokombensir na ebidensia para sa mga pinaniaki kan saiyang espiritu?

¹⁶ May nagkapira na nariribok nin mga pagduda kun baga sinda maninigong makikabtang sa mga emblema. An hapot na ini kun beses minalataw mga semana bago an saro pang pagselebrar kan Pamanggihan kan Kagurangnan. Parate na an siring na mga paghapot ginigibo nin nagkapira na bago pa sanang makiasosyar sa mga Saksi ni Jehova. Saro daw kamo na may arog kaining mga pagduda na suminabong sa isip? Paano nindo maaaraman kun ano an tamang gibohon?

¹⁷ Si Pablo nagrekomendar manongod sa Pamanggihan kan Kagurangnan: “Enot an sarong tawo aprobaran nguna an saiyang sadiri pakalihis nin pagsiyasat, asin sa siring sia kumakan kan tinapay asin uminom sa kopa.” (1 Corinto 11:28, 29) Narisa daw nindo na si Pablo nagsabi na kamo an kaipuhan na gumibo kan ‘pag-aprobar pakalihis nin pagsiyasat’? Siyempre, bakong sala na ipakipag-olay an siring kaseryosong bagay sa sarong maygurang na Kristiano, alagad kamo sana an dapat na magdeterminar sa saindong personal na relasyon ki Jehova asin sa saiyang Aki. Dai pinababayaan nin Dios an siisay man sa 144,000 na magduda. Siniseguro sa sato: “An espiritu man sana nagpapatotoo kaiba kan satong espiritu na kita mga aki nin Dios.” An espiritu nin Dios iyo an minapukaw sa puso kan siisay man na miembro kan hawak ni Cristo kan pagtubod na sia saro sa espirituwal na mga aki nin Dios. Aram ini kan pinili asin dai na sia kaipuhan na maghapot sa iba sa kongregasyon para sa patotoo.—Roma 8:15, 16.

18. Anong mga katunayan sa kasaysayan manongod sa “ibang karnero” an may halaga sa sato?

¹⁸ An modernong kasaysayan kan mga Saksi ni Jehova nagpapaheling na poon kan 1931 orog na atension an pinonan na itao sa “ibang karnero” paagi sa mensahe kan Kahadean. Dangan kan Mayo 31, 1935, paagi sa pagtao kan pahayag na “The Great Multitude,”b an “dakulang kadaklan” na naheling sa bisyon ni apostol Juan malinaw na ipinamidbid na kapareho kan “ibang karnero.” Ano an ipinaririsa kan bagong pagdodoon na ini? Sierto na iyan nagpapatotoo na an pagtipon sa “sadangoton na aripompon” matatapos na asin uminabot na an panahon na si Jesus, paagi sa pamamahala kan “maimbod asin madonong na oripon,” itao an saiyang atension sa pagtipon sa “ibang karnero.”—Mateo 24:45-47.

19. Anong personal na pagsiyasat an tibaad marahay para sa mga bagohan na naghingako na kabilang sa mga linahidan?

¹⁹ Mantang nasa isip an ikinapaliwanag na sa enotan, sinasabi mi sa gabos na bago pa sanang makiasosyar sa banwaan ni Jehova asin tibaad naghingako na saro sa mga linahidan: Maingat na siyasaton an saindong relasyon ki Jehova. Ihapot sa saindong sadiri, An langitnon daw na paglaom na hinihingako ko tada nin dating tinutubod na katokdoan kan iglesya na an gabos na miembro kan iglesya maduman sa langit? An sakuya daw na paglaom konektado sa sarong paslong kamawotan o emosyonal na mga saboot? Si Pablo nagsabi: “Dai mangyayaring magputik an Dios.” (Hebreo 6:18) Ni makakapagputik man an banal na espiritu sa pagpaniaki. Kun siring, an siisay man na talagang pinaniaki kan espiritu nin Dios dai perming nariribok nin mga pagduda kundi nakapagpapatotoo na may malinig na konsensia na sia saro sa mga aki nin Dios.

Pagselebrar sa 1986

20. Ano an halaga kan Memorial sa mga Saksi ni Jehova?

²⁰ Daing duwa-duwa, an Pamanggihan kan Kagurangnan iyo an kadarudakulaing selebrasyon kan taon para sa gabos na tunay na Kristiano. Mayo nin ibang okasyon na kapareho kaiyan kun dapit sa halaga, katuyohan o prosedimiento. Kun siring, mantang an daga minabirik sa ehe kaiyan, na pinapangyayari na an aldaw luway-luway na sumolnop sa bilog na daga, an lambang kongregasyon nin mga Saksi ni Jehova, dakula asin sadit, asin an lambang nagsosolong grupo magtitiripon bilang pagkuyog sa pagboot kan Kagurangnan.

21. Anong kaisipan asin mga paglaom an maninigong pukawon kan Memorial sa 1986 sa puso kan banwaan nin Dios?

²¹ Kun siring an gabos na arog-karnerong mga disipulo naoogmang gayo sa oportunidad na mag-iriba sa saro na naman na selebrasyon nin Memorial. Logod an okasyon sa taon na iyan magin panahon nin pagpakosog sa gabos na lingkod ni Jehova. Iyan logod magtao sa sainda nin espiritu nin pagsarig na kapareho kan nasa saindang Arogan, si Jesu-Cristo, na nagsabi: “Magin mapuso kamo! Nadaog ko an kinaban.”—Juan 16:33.

[MGa Nota sa Ibaba]

Nagigirumdoman daw Nindo—

◻ Taano an Paskua ta bakong tipo kan Memorial?

◻ Anong anom na paghiro an dapat na gibohon bago makinabang sa atang ni Jesus?

◻ Taano ta napakahalaga kan saindong pag-atender sa Memorial?

◻ Taano an pagsiyasat sa sadiri ta kapakipakinabang bago an Memorial?

[Kahon sa pahina 12]

Pagpaheling nin Paggalang sa Pamanggihan kan Kagurangnan

Mga Emblema na Gagamiton

Tinapay na daing lebadura: An tinapay, na kapareho kan daing timplang Judiong matzoth, na gibo sana sa harina nin trigo asin tubig puwedeng gamiton. Dai paggamiton an matzoth na ginibo na may dagdag na timpla arog baga nin asin, asukar, malta, sogok o sibuyas. Puwede kamong gumibo kan sadiri nindong tinapay na daing lebadura na ginagamit an minasunod na recipe: Pagsalakon an saro may kabangang tasa nin harina nin trigo (kun mayo, gamiton an harina nin bagas, mais o iba pang grano) asin an sarong tasa nin tubig, na minagibo nin basa-basang masa. Dangan pahimpison an masa. Ibugtak iyan sa sarong lutuan sa horno asin tusoktusokon nin tinidor. Lutoon iyan sa mainit na horno sagkod na iyan mara na asin maragmo.

Arak: Gamiton an daing salak na mapulang arak nin ubas kapareho nin Chianti, Burgundy, o claret. Likayan an mahamis na arak na dinagdagan nin alkohol o sinalakan nin brandi, arog baga kan sherry, port o muscatel. Dai gumamit nin mga arak na dinagdagan nin mga rikado o pahamot, arog kan Dubonnet asin iba pang arak na pan-abregana. An sadiring gibong mapulang arak puwede man na gamiton kun iyan dai pinahamis, tinimplahan o dinagdagan nin alkohol.

Pagpreparar kan Kingdom Hall

Lamesa para sa mga emblema: Tahoban an lamesa nin malinig na mantel asin bugtakan nin igong plato asin baso para sa marikas na pagserbi. An tinapay puwedeng pagbaraakon asin an arak itigis na sa baso bago an pagtiripon. Si Jesus dai nag-establisar nin ano man na rituwalistikong paagi manongod sa bagay na ini. Kun hinahagad kan kamugtakan, tahoban an mga emblema nin malinig na tela tanganing maingatan tumang sa mga insekto.

Mga serbidor: Patienot na tawan nin instruksion manongod sa prosedimiento tanganing malikayan an ano man na pagkaatraso o karibarawan sa pagserbi kan mga emblema sa gabos na nag-atender, pati sa nagpahayag asin sa mga serbidor.

Mga attendant: Maninigo na yaon na an supisyenteng mga attendant bago pumoon an pagtiripon tanganing an gabos masabat asin mapatukaw.

Dekorasyon na burak: Ini puwede, pero iyan maninigong simple asin disente.

Prosedimiento sa Pagtiripon

Oras kan Selebrasyon: Minsan ngani an pahayag puwedeng pumoon nin mas amay, an mga emblema dai maninigong ilibot sagkod na dai pa nakasolnop an aldaw. Maninigong aramon sa lokal kun noarin masolnop an aldaw sa Marso 24 sa saindong lugar.

Pahayag sa Memorial: An espiker maninigong mag-andam na gayo tanganing ikapahayag nia an saiyang materyal sa laog kan itinalaan na panahon. Iyan maninigong iatubang nin malinaw asin nakapagpapakosog sa gabos na presente.

[Ritrato sa pahina 10]

An Memorial nagpapakosog sa pagkamoot para ki Jehova asin sa saiyang Aki