Armagedon—Sarong Guerra na Magbubunga nin Tunay na Katoninongan

SA PANANARAM kan mga may labot sa internasyonal na relasyon, an termino na ginamit para sa situwasyon kan kinaban ngonyan iyo an MAD—Mutual Assured Destruction. An terminong iyan angay na gayo. Sa laog kan 40 taon poon kan pumutok sa ralaban an enot na bomba atomika duman sa Hiroshima, Hapon, dai mapaniwalaan kun gurano na kadakol kan nuklear na mga armas kan kinaban. May mga bareta na nagsasabi na iyan katimbang nin 12 mil milyones na tonelada nin TNT, o mga 3 tonelada para sa lambang tawo sa daga!

Bilang an Saro “na dai linalang [an daga] na dai nin kapakanan, na naghaman kaiyan tanganing pag-istaran,” si Jehova Dios dai puwede, sa katunayan, dai nanggad, matogot sa mga nasyon na magpadagos sa saindang paghuhugot. (Isaias 45:18; helingon man an Salmo 104:5.) Bago sinda magkaoportunidad na gamiton an gabos nindang nakagagadan na armas sa lambang saro, asin paagi kaiyan laglagon an saindang sadiri asin an palibot, an Kaggibo asin Kagsadiri kan daga asin kan gabos na yaon dian mahiro. Sia nanuga na ini iyo an “ralaban kan dakulang aldaw nin Dios na Makakamhan sa gabos,” an Armagedon sa Biblia!—Kapahayagan 16:14, 16.

Kun siring, an Armagedon bako sanang sarong guerra na maresolber sa politikal na dai pagkasinabotan sa presenteng aldaw. Gigibohon kaiyan an kaya sanang laoman nin tawo sa bilog na panahon. Hahaleon kaiyan an gabos na causa kan guerra nin tawo. Iyan maestablisar nin tunay na katoninongan sa daga. Orog sa gabos, ibabalik kaiyan an may diretsong paghade kan Kagsadiri sa daga, si Jehova Dios, sa gabos niang linalang. Paano daw magigibo an gabos na ini? Helingon niato.

Katoninongan—Paagi sa Paghale sa mga Kasangkapan sa Pakikiguerra

An sarong dahelan na an mga nasyon dai nahahale an guerra iyo na dai ninda nahahale an mga kasangkapan sa pakikiguerra. Minsan ngani aram ninda na paghuhugot an pagtambak nin mga armas, habo sindang ipondo iyan o luwayluwayon iyan. Tunay na magigin “ngangalasan” kun si Jehova humiro asin gibohon an dai kayang gibohon nin mga nasyon: “An arko saiyang binabari asin pinagpuputolputol an garod; an mga karro saiyang sinosolo sa kalayo.”—Salmo 46:8, 9.

Sa mga nakaagi ipinaheling ni Jehova an saiyang kakayahan na halean nin epekto an pinakamoderno o pinakamakosog na mga armas na ginagamit nin mga nasyon. Halimbawa, ilinigtas nia an saiyang garo baga daing depensang banwaan, an mga Israelitas, sa kapangyarihan militar kan enot na kapangyarihan pankinaban, an Egipto, paagi sa paggamit sa elemental na mga puwersa kan katubigan kan Dagat na Pula. (Exodo 15:3-5) Kaagid kaiyan, an modernong mga armas ni Hadeng Jabin nin Canaan, “siyam na gatos na karro de guerra na may mga karit na batbat,” na pinangengenotan kan saiyang hepe kan hukbo na si Sisara, biyong ginibong daing epekto kan gamiton ni Jehova an puwersa nin sarong biglang pagbaha. An mga kaiwal biyong naribaraw, na nagbunga kan pagkalaglag ninda sagkod sa ultimong tawo. An resulta iyo na “an daga dai na naribok giraray sa laog nin apat na polong taon.”—Helingon an Mga Hokom, kapitulo 4 asin 5:21, 31.

Makahulogan nanggad, an pangultimong ralaban na idto tumang sa mga hukbo ni Hadeng Jabin nangyari sa kasapaan nin Cison, “sa gilid kan katubigan nin Megido.” (Hokom 5:19-21) Kaya iyan nagtatao sato nin dramatikong paheling sa lubos na kapangganahan ni Jehova sa nagdadangadang na ralaban nin Armagedon.

Dai niato aram kun anong “misteryosong” mga puwersa, kun igwa man, an gagamiton ni Jehova tumang sa saiyang mga kaiwal. An aram niato iyo na puwede siang gumamit nin mga puwersa na kayang biyong raoton an militar na mga establisimiento kan mga nasyon. Halimbawa, aram nin mga sientista na an sarong makosog na pulsong elektromagnetiko—bagay na minsan sinda kaya nindang gibohon paagi sa nuklear na pagpaputok sa itaas—kayang papondohon an sistema sa komunikasyon asin sa pagdirehir militar nin sarong nasyon, sa siring riniribaraw an gabos. Rasonable sana, hahalean nin epekto ni Jehova an gabos na armas nin mga nasyon tanganing ikabugtak an pundasyon para sa lubos na katoninongan.

Katoninongan—Para Sana Duman sa mga Nagmamawot Kaiyan

Parateng sinasabi na an mga guerra pinaglalabanan nin mga tawo, bakong nin mga armas. Kun siring, minsan ngani kaipuhan na haleon an mga kasangkapan sa pakikiguerra, iyan sana dai magarantiya nin nagdadanay na katoninongan. Kun siring, kun boot niatong maheling an tunay na katoninongan, an mga politikal, rasyal, asin nasyonalistikong mga pagkaongis na nakakabanga sa kinaban sa kadakoldakol na mga grupo asin kampo kaipuhan man na haleon. Ini gigibohon ni Jehova Dios paagi sa pag-otob sa ipinamimibi nin minilyon sa bilog na kinaban: “Dumatong logod an kahadean mo.”—Mateo 6:9, 10.

Minsan ngani malinaw na ipinaheheling nin naotob na mga hula sa Biblia na an Mesiyanikong Kahadean sa kamot ni Jesu-Cristo inestablisar sa kalangitan kan taon nin Guerra Mundial I na 1914, iyan dai inako kan mga nasyon. Mayo ni saro sa sainda na nag-isip na haleon an saindang mga armas asin isuko an saindang soberaniya. Imbes, sa saindang natatarantang pakikilaban para sa pagdominar sa kinaban, sinda napalabot sa pinakadakulang guerra na nangyari sagkod kan panahon na idto.

Sa makahulang paagi, ilinaladawan kan ikaduwang Salmo an situwasyon: “Taano ta ribaraw an mga nasyon asin an mga nasyon mismo nagpaparagumodgumod nin daing halagang bagay? Nagtumang an mga hade kan daga asin an haralangkaw na opisyal mismo nagsururog tumang ki Jehova asin tumang sa saiyang linahidan.” Iyan an dahelan na an pagboot ni Jehova sa saiyang ibinugtak na Hade, si Jesu-Cristo, iyo ini: “Sinda saimong papasaon nin setrong batbat, siring sa lalagan kan paragibo nin koron roronoton mo sinda.”—Salmo 2:1, 2, 9; 110:2.

An pandaog na ini kan linahidan na Hade nin Dios ilinaladawan sa piguratibong detalye sa Kapahayagan 19:11-20:3. An Tataramon nin Dios, si Jesu-Cristo, na suportado kan mga hukbo nin mga anghel, maheheling na sakay sa sarong maputing kabayo, “asin sia naghohokom asin nakikipaglaban sa katanosan. . . . Sa saiyang ngoso nagluluwas an sarong matarom na halabang minasbad, tanganing ipanlugad nia sa mga nasyon.” Grabe nanggad an ibubungang paggadan sa mga maraot. Sa saiyang biyong kapangganahan, aatubangon kan mapangganang Hade an tunay na may kasalan sa likod kan gabos na kasakitan asin pagtios sa daga. An bisyon sa Kapahayagan ilinaladawan ini na garo baga nagibo na, na an sabi: “Dinakop nia an dragon, an enot na halas, na iyo an Diablo asin Satanas, asin ginapos nia sia sa laog nin sangribong taon.”

Katoninongan—Sa Laog nin Sangribong Taon Asin Pakalihis Kaiyan

Maiimahinar daw nindo kun ano an magigin kahulogan para sa katawohan nin sangribong taon nin katoninongan? An mga autoridad ngonyan nagmimidbid na an gutom, mga helang, asin pagtios kan mga nasyon puwedeng mahale kun an sarong sadit na kabtang kan ginatos na bilyon na dolar na ginagasto sa mga armas taon-taon gamiton sa pagresolber dian. Isip-isipa kun ano an magigibo kun an gabos na kayamanan kan daga gamiton na sa karahayan. Bakong sarong pangatorogan nin sarong bisyonaryo kan si Isaias pasabngan na humula manongod sa paghade kan “Prinsipe nin Katoninongan,” si Jesu-Cristo: “An kadakolan kan sa-prinsipeng pamamahala asin katoninongan magigin daing kasagkodan.”—Isaias 9:6, 7.

An mahalagang hapot iyo ini: Makakaligtas daw kamo sa panlaglag sa Armagedon tanganing magkamit kan daing sagkod na katoninongan? Tibaad ihapot nindo, ‘Ano an kaipuhan kong gibohon tanganing makaligtas?’ Uya an sadol kan Biblia: “Hanapa nindo si Jehova, kamo gabos na mahoyo sa daga, na nagsagibo kan Saiyang hatol. Hanapa nindo an katanosan, hanapa nindo an kahoyoan. Tibaad kamo matago sa aldaw kan kaanggotan ni Jehova.” (Sofonias 2:2, 3) An mga Saksi ni Jehova maoogma na tabangan kamong magibo iyan. Sa siring, an Armagedon magigin para sa saindo, bakong sarong guerra na nagbubunga nin biyong kalaglagan, kundi sarong guerra na nagbubunga nin tunay na katoninongan.

[Ritrato sa pahina 6]

Sa Dagat na Pula ipinaheling ni Jehova an saiyang kakayahan na halean nin epekto an makokosog na armas sa guerra