Hanapon an Tunay na Katoninongan Asin Gibohon Iyan!
“Sia na mamomoot sa buhay asin makaheheling nin marahay na mga aldaw, . . . rumayo sia sa maraot asin gumibo sia nin marahay; hanapon nia an katoninongan asin gibohon iyan.”—1 PEDRO 3:10, 11.
1. Anong bantog na mga tataramon ni Isaias an seguradong magigin mapanggana?
“DADARAGOPDOPON ninda an saindang mga espada na magin tarom nin arado asin an saindang mga budyak na magin mga sanggot. An nasyon dai mabingat nin espada tumang sa nasyon, ni mag-aadal pa man sinda sa pakilaban.” (Isaias 2:4) Minsan ngani an bantog na tekstong ini ipinaheheling harani sa pankinaban na opisina prinsipal kan Naciones Unidas sa Siudad nin Nueva York, sa ano man na paaging maiimahinar dai iyan nagibo kan pankinaban na organisasyon na iyan. Minsan siring, bilang kabtang kan dai nasusudyang tataramon ni Jehova Dios, an deklarasyon na iyan dai magigin mayong bunga.—Isaias 55:10, 11.
2. Ano an “mangyayari sa huring kabtang kan mga aldaw,” sono sa Isaias 2:2, 3?
2 An mga tataramon na yaon sa Isaias 2:4 sa katunayan kabtang nin sarong makangangalas na hula, hula manongod sa tunay na katoninongan—asin iyan naootob na sa sato mismong panahon. Bago ipahayag an nakapupukaw sa boot na mga paglaom na mayo nang guerra asin mga armas na panguerra, an hula nagsasabi: “Mangyayari sa huring kabtang kan mga aldaw na an bukid kan harong ni Jehova magigin marigon sa ibabaw kan alitoktok kan kabukidan, asin iyan ilalangkaw nanggad sa ibabaw kan mga bolod; asin an gabos na nasyon maturukad pasiring dian. Asin dakol na banwaan an maduruman asin masarabi: ‘Madia kamo, banwaan, asin tumukad kita sa bukid ni Jehova, sa harong kan Dios ni Jacob; asin totokdoan nia kita dapit sa saiyang mga dalan, asin kita maglalakaw sa saiyang mga dana.’ Huli ta hale sa Sion maluwas an ley, asin an tataramon ni Jehova hale sa Jerusalem.”—Isaias 2:2, 3.
An mga Tawo Puedeng Magin Matoninong
3. Paano puedeng magbago an sarong tawo hale sa pagigin parapakiiwal pasiring sa pagigin matoninong?
3 Mangnoha na bago masunod nin mga tawo an matoninong na dalan, sinda kaipuhan na tokdoan sa mga dalan ni Jehova. An makinuyog na paghimate sa pagtotokdo ni Jehova puedeng makapabago sa paagi nin pag-isip asin paghiro nin tawo, kaya an saro na dating parapakiiwal nagigin matoninong. Paano nagigibo an pagliliwat na ini? An Roma 12:2 nagsasabi: “Dai na kamo magpamolde sa palakaw na ini nin mga bagay, kundi maliwat kamo paagi sa pagbago kan saindong pag-isip, tanganing mapatunayan nindo sa saindong sadiri kun ano an marahay asin inaako patin sangkap na kabotan nin Dios.” Binabago niato an satong isip, o minomotibar iyan sa ibang direksion, paagi sa pagpano kaiyan nin mga prinsipyo asin presepto hale sa Tataramon nin Dios. An regular na pag-adal kan Biblia tinatabangan kitang gibohon an pagbabagong ini asin nagpapangyari sa sato na patunayan sa satong sadiri kun ano an kabotan ni Jehova para sa sato, tanganing maheling niato nin malinaw an dalan na dapat niatong lakawan.—Salmo 119:105.
4. Paano isinosolog nin saro an matoninong na bagong pagkatawo?
4 An katotoohan kan Biblia binabago bako sanang an satong paagi nin pag-isip kundi pati man an satong mga hiro-hiro asin personalidad. Tinatabangan kita kaiyan na gibohon an isinadol ni apostol Pablo: “Haleon an daan na pagkatawo na oyon sa dati nindong paggawe asin na nararaot sono sa saiyang mapandayang mga horot; kundi . . . magin bago sa puersa na nagpapahiro sa saindong isip, asin . . . magsolog kan bagong pagkatawo na linalang oyon sa kabotan nin Dios sa tunay na katanosan asin kaimbodan.” (Efeso 4:22-24) An puersa na nagpapahiro sa isip panlaog. Iyan nababago asin nagigin mapuersa mantang nagtatalubo an satong pagkamoot ki Jehova asin sa saiyang mga ley, asin ginigibo kita kaiyan na espirituwal asin matoninong na mga tawo.
5. Paano an “bagong togon” na itinao ni Jesus sa saiyang mga disipulo nakakokontribwir sa katoninongan na nasa tahaw ninda?
5 An pangangaipo para sa pagbabagong ini naheheling sa pagboot na itinao ni Jesus sa saiyang mga disipulo durante kan saiyang ultimong mga oras sa kaibanan ninda: “Tinatawan ko kamo nin bagong togon, na kamo magkaminorootmootan; siring sa pagkamoot ko sa saindo, na kamo man magkaminorootmootan. Paagi kaini an gabos makaaaram na kamo an sakong mga disipulo, kun kamo nagkakaminorootmootan.” (Juan 13:34, 35) An mga disipulo binobogkos kan arog-Cristo, daing kapasloan na pagkamoot na ini sa sangkap na pagkasararo. (Colosas 3:14) Solamente an mga gustong mag-ako asin mamuhay sono sa “bagong togon” na ini an magkakamit kan katoninongan na ipinanunuga nin Dios. Igwa daw nin mga tawo na naggigibo kaini ngonyan?
6. Taano ta may katoninongan an Mga Saksi ni Jehova, na kabaliktaran sa mga tawo kan kinaban?
6 An Mga Saksi ni Jehova naghihingoa na ipaheling an pagkamoot sa saindang pambilog na kinaban na kasararoan nin magturugang. Minsan ngani sinda kinua hale sa gabos na nasyon kan kinaban, dai sinda nakikilabot sa mga kontrobersia kan kinaban, dawa sinda tinatawan nin grabeng politikal asin relihiosong pangigipit. Bilang sararong banwaan, sinda tinotokdoan ni Jehova, asin sinda igwa nin katoninongan. (Isaias 54:13) Sinda nagdadanay na neutral sa politikal na mga iriwal, asin dai sinda nagpapartisipar sa mga guerra. An nagkapira na dating madahas binayaan na an estilong iyan nin pamumuhay. Sinda nagin mga Kristianong mamomoton sa katoninongan, na inaarog an halimbawa ni Cristo Jesus. Asin sinusunod ninda nin bilog na puso an hatol ni Pedro: “Sia na mamomoot sa buhay asin makaheheling nin marahay na mga aldaw, pogolan nia an saiyang dila sa maraot asin an saiyang mga ngabil sa pagtaram nin kadayaan, kundi rumayo sia sa maraot asin gumibo sia nin marahay; hanapon nia an katoninongan asin gibohon iyan.”—1 Pedro 3:10, 11; Efeso 4:3.
An mga Naggigibo nin Katoninongan
7, 8. Tumao nin mga halimbawa nin mga tawo na binayaan an pakikilaban asin nagin mga naghahanap nin tunay na katoninongan. (Isaysay an iba pa na tibaad aram nindo.)
7 Halimbawa, yaon si Rami Oved, dating opisyal sa sarong espesyalisadong iskuad kontra sa mga terorista. Sia sinanay na gadanon an saiyang mga kaiwal. Sia odok na nagtutubod sa saiyang nasyonalismong Israeli sagkod kan aldaw na madiskobre nia na habo kan mga rabi na pakasalan nia an babaeng namomotan nia huli sana ta an babae taga-Asia, sarong Hentil. Pinonan niang hanapon an katotoohan sa Biblia. Dangan namidbid nia an Mga Saksi ni Jehova. An pakipag-adal nia sa Biblia sa mga Saksi nakakombensir sa saiya na dai na sia puedeng magin panatikong nasyonalista. An Kristianong pagkamoot nangangahulogan nin pagbaya sa guerra asin mga armas saka pag-adal na kamotan an mga tawo kan gabos na rasa. Kanigoan an saiyang pagkabigla kan maresibi nia an sarong maboot na surat na an enot na mga tataramon, “Tugang Kong Rami”! Ano an pambihirang marhay manongod kaiyan? An kagsurat sarong Saksi na taga-Palestina. “Inisip ko na iyan masakit paniwalaan,” sabi ni Rami, “huli ta an mga Palestino kaiwal ko, asin uya an saro sa sainda inaapod akong ‘Tugang Ko.’” Ginigibo ngonyan ni Rami asin kan saiyang agom an tunay na katoninongan sa paagi nin Dios.
8 An saro pang halimbawa iyo an ki Georg Reuter, na nagserbisyo sa hukbong Aleman na nagsakyada sa Rusya kaidtong Guerra Mundial II. Dai nahaloy nadesganar sia sa labi-labi kadakulang pakana ni Hitler na sakopon an kinaban. Pagpuli nia hale sa guerra, pinonan niang mag-adal sa Biblia kaiba kan Mga Saksi ni Jehova. Sia nagsurat: “Sa katapustapusi, an mga bagay nagpoon na magin malinaw para sa sakuya. Narealisar ko na bakong an Dios an dapat na basolon sa gabos na pagpabolos nin dugo . . . Nanodan ko na katuyohan niang mag-establisar nin sarong paraiso na lakop sa daga na igwang daing katapusan na mga bendisyon para sa makinuyog na katawohan. . . . Ipinaghambog ni Hitler an saiyang ‘Sangribong Taon na Imperyo’ alagad ta sia namahala sana sa laog nin 12 [taon]—asin grabe kamakatatakot nanggad an naabtan! Si Cristo imbes na si Hitler . . . an puede asin talagang maestablisar nin sangribong taon na paghade digdi sa daga.” Sa laog nin mga 50 taon na ngonyan, si Georg naglilingkod bilang sugo para sa tunay na katoninongan sa bilog na panahon na ministeryo.
9. Paano pinatutunayan kan eksperyensia kan Mga Saksi ni Jehova sa Nazi Alemania na sinda mapuso pero matoninong?
9 An integridad asin neutralidad kan Mga Saksi ni Jehova sa Alemania durante kan gobyernong Nazi nagpapadagos na magin patotoo kan saindang pagkamoot sa Dios asin sa katoninongan maski ngonyan, pakalihis nin labing 50 taon. An sarong pulyeto na ipinublikar kan United States Holocaust Memorial Museum sa Washington, D.C., nagsasabi: “An Mga Saksi ni Jehova nagtagal nin makuring paglamag sa irarom kan gobyernong Nazi. . . . Nakamit ninda an paggalang kan dakol na katemporanyo huli sa kapusoan na ipinaheling kan dakulang mayoriya sa pagsayuma [na talikdan an saindang relihion], sa atubangan nin pasakit, pagmaltrato sa mga kampo de konsentrasyon, asin kun minsan paggadan.” Dangan idinagdag pa kaiyan: “Durante kan pagpatalingkas sa mga kampo, ipinadagos kan Mga Saksi ni Jehova an saindang gibohon, na nakikiibaiba sa mga natatadang buhay, na nangongombertir.”
Sarong Orog Kadakulang Pagbabago
10. (a) Anong dakulang pagbabago an kaipuhan tanganing dumatong an tunay na katoninongan? (b) Paano ini ilinadawan sa libro nin Daniel?
10 Nangangahulogan daw ini na an Mga Saksi ni Jehova nagtutubod na kaya nindang itao an katoninongan sa bilog na kinaban paagi sa lagduan na pangongombertir na maniwala sa Kristianong neutralidad? Dai! Tanganing ikabalik an katoninongan digdi sa daga, sarong orog kadakulang pagbabago an kaipuhan. Ano iyan? An nakapababanga, mapan-api, asin madahas na pamamahala nin tawo dapat na salidahan kan pamamahala kan Kahadean nin Dios, na iyong itinokdo ni Jesus na ipamibi kan saiyang mga disipulo. (Mateo 6:9, 10) Alagad paano iyan mangyayari? Sa sarong pangatorogan na ipinasabong nin Dios, nanodan kan propetang si Daniel na sa huring mga aldaw, an Kahadean nin Dios, na siring sa dakulang gapo na ‘tinipak bakong paagi sa mga kamot nin tawo,’ roronoton an sarong higanteng imahen na nagrerepresentar sa politikal na mga pamamahala kan katawohan digdi sa daga. Dangan nagpahayag sia: “Sa mga aldaw kan mga hadeng idto an Dios nin kalangitan mapatindog nin sarong kahadean na dai noarin man malalaglag. Asin an kahadean mismo dai itatao sa ibang banwaan. Iyan an maronot asin matapos kan gabos na ining kahadean, asin iyan magdadanay sagkod lamang.”—Daniel 2:31-44.
11. Paagi sa ano papangyayarihon ni Jehova an kinakaipuhan na pagbabago para sa katoninongan?
11 Taano ta mangyayari an dakulaon na pagliliwat na ini sa situwasyon nin kinaban? Huli ta si Jehova nanuga na lilinigan nia an daga kan gabos na nag-aati asin naglalaglag kaiyan. (Kapahayagan 11:18) An pagliliwat na ini mangyayari sa matanos na ralaban ni Jehova tumang ki Satanas asin sa saiyang maraot na kinaban. Mababasa niato sa Kapahayagan 16:14, 16: “An mga ini [an boot sabihon, marigsok na ipinasabong na mga tataramon], sa katotoohan, mga tataramon na ipinasabong nin mga demonyo asin naggigibo nin mga tanda, asin nagduduman sinda sa mga hade [an politikal na mga namamahala] kan bilog na ineerokan na daga, tanganing tiriponon sinda sa ralaban kan dakulang aldaw nin Dios na Makakamhan sa gabos. Asin sinda tiniripon ninda sa lugar na sa Hebreo inaapod Har–Magedon.”
12. Magigin siring sa ano an Armagedon?
12 Magigin siring sa ano an Armagedon? Iyan dai magigin nuklear na apocalipsis o grabeng kapahamakan na poprobokaron nin mga tawo. Dai, iyan ralaban nin Dios tanganing taposon an gabos na ralaban nin tawo asin pohoon an gabos na nagpapalakop kan siring na mga ralaban. Iyan ralaban nin Dios na matao nin tunay na katoninongan sa mga namomoot sa katoninongan. Iyo, an Armagedon maabot sono sa katuyohan ni Jehova. Iyan dai maaatraso. An saiyang propetang si Habacuc pinasabngan na sumurat: “An bisyon para sa itinalaan na panahon pa, asin iyan naghahangoshangos sagkod sa katapusan, asin dai iyan magpuputik. Minsan pa iyan maatraso, padagos iyan na halaton; huli ta sierto nanggad na iyan maootob. Dai iyan mahuhuri.” (Habacuc 2:3) Huli sa satong sa tawong mga pagmate, tibaad garo iyan atrasado, alagad ta inootob ni Jehova an saiyang iskedyul. An Armagedon mangyayari sa oras na patienot nang dineterminaran ni Jehova.
13. Ano an gigibohon nin Dios sa tunay na may kasalan, si Satanas na Diablo?
13 An pangultimong paghiro na ini an maandam kan dalan para sa tunay na katoninongan! Alagad tanganing marigon na ikaestablisar an tunay na katoninongan, may iba pang dapat na gibohon—an paghale sa saro na pinaggigikanan nin pagkabaranga, pagkaongis, asin iriwal. Asin iyan mismo an ihinuhula kan Biblia na sunod na mangyayari—an pagholog sa bungaw ki Satanas, an parapundar nin ralaban asin an ama kan kaputikan. Naheling ni apostol Juan an pangyayaring ini sa sarong makahulang bisyon, na nakarekord sa Kapahayagan 20:1-3: “Naheling ko an sarong anghel na naghihilig hale sa langit na igwa kan liabe kan bungaw asin sarong dakulang kadena sa saiyang kamot. Asin dinakop nia an dragon, an enot na halas, na iyo an Diablo asin Satanas, asin ginapos nia sia sa laog nin sangribong taon. Asin ihinolog nia sia sa bungaw asin pinintoan nia idto patin sinelyohan idto sa ibabaw nia, tanganing dai na nia madaya an mga nasyon sagkod na matapos an sangribong taon.”
14. Paano puedeng iladawan an mapangganang paghiro ni Jehova tumang ki Satanas?
14 Ini bakong pangatorogan; iyan panuga nin Dios—asin an Biblia nagsasabi: “Dai mangyayaring magputik an Dios.” (Hebreo 6:18) Sa siring si Jehova makasasabi paagi sa saiyang propetang si Jeremias: “‘Ako si Jehova, an Saro na naggigibo nin mamomoton na kabootan, hustisya asin katanosan sa daga; huli ta ikinaoogma ko an mga bagay na ini,’ an sabi ni Jehova.” (Jeremias 9:24) Si Jehova naghihiro na may hustisya asin katanosan, asin ikinaoogma nia an katoninongan na itatao nia sa daga.
Pamamahala kan Prinsipe nin Katoninongan
15, 16. (a) Siisay an pinili ni Jehova na mamahala bilang Hade? (b) Paano ilinadawan an pamamahala na iyan, asin siisay an makikikabtang dian?
15 Tanganing seguradohon na an tunay na katoninongan makakamtan kan gabos na namumuhay sa irarom kan saiyang areglo sa Kahadean, an pamamahala itinao ni Jehova sa tunay na Prinsipe nin Katoninongan, si Jesu-Cristo, siring sa ihinula sa Isaias 9:6, 7: “Namundag sa sato an sarong aki, may itinao sa satong sarong aking lalaki; asin an sa-prinsipeng pamamahala mamumugtak sa saiyang abaga. Asin an saiyang ngaran aapodon na Makangangalas na Parahatol, Makakamhan na Dios, Amang Daing Sagkod, Prinsipe nin Katoninongan. An kadakolan kan sa-prinsipeng pamamahala asin katoninongan magigin daing kasagkodan . . . An mismong kaigotan ni Jehova nin mga hukbo iyo an magibo kaini.” An salmista nagsurat man sa makahulang paagi manongod sa matoninong na pamamahala kan Mesiyas: “Sa saiyang mga aldaw an matanos mamumurak, asin an kadakolan nin katoninongan sagkod na mayo na nin bulan.”—Salmo 72:7.
16 Dugang pa, an 144,000 na linahidan nin espiritung mga tugang ni Cristo mamamahala kaiba nia sa kalangitan. Ini an mga kapwa paramana ni Cristo na dapit sa sainda si Pablo nagsurat: “Kun manongod sa saiya, an Dios na nagtatao nin katoninongan maronot ki Satanas sa irarom kan saindong mga bitis sa dai na mahahaloy. Mapasaindo logod an dai na kutana maninigong kabootan kan satong Kagurangnan na si Jesus.” (Roma 16:20) Iyo, an mga ini makikakabtang gikan sa kalangitan sa kapangganahan ni Cristo tumang sa parasutsut nin ralaban, si Satanas na Diablo!
17. Ano an dapat niatong gibohon tanganing magmana nin tunay na katoninongan?
17 Kaya ngonyan an hapot, Ano an kaipuhan nindong gibohon tanganing magmana nin tunay na katoninongan? An tunay na katoninongan madatong sana sa paagi nin Dios, asin tanganing kamtan iyan kaipuhan na kamo gumibo nin positibong mga aksion. Kaipuhan nindong akoon an Prinsipe nin Katoninongan asin dumolok sa saiya. Ini nangangahulogan na kaipuhan nindong akoon si Cristo sa saiyang papel bilang Parabalukat asin Paratubos kan makasalan na katawohan. Sinabi mismo ni Jesus an bantog na mga tataramon: “An Dios namoot na gayo sa kinaban na itinao nia an saiyang Aking bugtong, tanganing an lambang maggibo nin pagtubod sa saiya dai mapahamak kundi magkaigwa nin buhay na daing katapusan.” (Juan 3:16) Kamo daw andam na gumibo nin pagtubod ki Cristo Jesus bilang Ahente nin Dios para sa pagtao nin tunay na katoninongan asin kaligtasan? Mayo na nin ibang ngaran sa sirong nin langit na makaeestablisar nin katoninongan asin makagagarantiya kaiyan. (Filipos 2:8-11) Taano? Huli ta si Jesus iyo an Pinili nin Dios. Sia an pinakadakulang mensahero nin katoninongan na nabuhay sa daga kasuarin man. Hihinanyogon daw nindo si Jesus asin susunodon an saiyang halimbawa?
18. Ano an maninigo niatong gibohon bilang simbag sa mga tataramon ni Jesus na nakarekord sa Juan 17:3?
18 “Ini nangangahulogan nin buhay na daing katapusan,” sabi ni Jesus, “an saindang pagkua nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.” (Juan 17:3) Ngonyan na an panahon na kumua nin tamang kaaraman paagi sa regular na pag-atender sa mga pagtiripon kan Mga Saksi ni Jehova sa Kingdom Hall. An edukasyonal na mga pagtiripon na ini momotibaron kamo na ihiras sa iba an saindong kaaraman asin an saindong paglaom. Kamo puede man na magin sugo para sa katoninongan nin Dios. Kamo puedeng magkamit nin katoninongan ngonyan paagi sa pagtitiwala ki Jehova Dios, siring sa sinasabi sa Isaias 26:3, sono sa New International Version: “Saimong iingatan sa sangkap na katoninongan sia na an isip marigon, huli ta sia nagtitiwala sa saimo.” Kiisay kamo maninigong magtiwala? “Magtiwala kamo ki Jehova, banwaan, sa gabos na panahon, huli ta ki Jah Jehova an Gapo sa mga panahon na daing katapusan.”—Isaias 26:4.
19, 20. Ano an naghahalat duman sa mga hinahanap an katoninongan asin ginigibo iyan?
19 Manindogan na kamo ngonyan para sa buhay na daing katapusan sa matoninong na bagong kinaban nin Dios. Sa Kapahayagan 21:3, 4, inaasegurar kita kan Tataramon nin Dios: “Uya! An tolda nin Dios nasa mga tawo, asin sia mag-eerok sa kaibanan ninda, asin sinda magigin saiyang mga banwaan. Asin an Dios mismo masasakaibanan ninda. Asin papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.” Bako daw na iyan an matoninong na ngapit na hinihimuyawot nindo?
20 Dangan girumdomon an ipinanuga nin Dios. “An mga mahoyo mismo magmamana kan daga, asin sinda nanggad magkakararanga nin labi-labi sa nagsosopay na katoninongan. Pagmasdan mo an daing kanawayan asin helingon mo an tanos, huli ta an ngapit kan tawong iyan magigin matoninong.” (Salmo 37:11, 37) Kun dumatong na an maogmang aldaw na iyan, kita logod magsabi na may pagpasalamat, “Tunay na katoninongan sa katapustapusi! Salamat ki Jehova Dios, an gikanan kan tunay na katoninongan!”
Ikapaliliwanag daw Nindo?
◻ Ano an makatatabang sa saro na magbago sa isip asin hiro?
◻ Paano ipinaheling kan Mga Saksi ni Jehova, bilang indibiduwal asin grupo, an saindang pagkamoot sa tunay na katoninongan?
◻ Ano an gigibohon ni Jehova sa gabos na nagpapalakop nin pagkaongis asin ralaban?
◻ Ano an gigibohon kan pamamahala kan Prinsipe nin Katoninongan para sa katawohan?
[Retrato sa pahina 14]
An mga tataramon ni Isaias inootob, bakong kan NU, kundi kan mga naghihimate sa pagtotokdo ni Jehova
[Retrato sa pahina 15]
An duwang lalaking ini nagbago tanganing gibohon an katoninongan
Si Rami Oved
Si Georg Reuter
[Retrato sa pahina 16]
An tunay na katoninongan mangingibabaw sa irarom kan pamamahala kan Prinsipe nin Katoninongan