Kun Paano Nindo Mamamatean nin Orog Pa an Banal na Katoninongan
“O kun dadangogon mo sana kutana an sakong mga togon! Dangan an saimong katoninongan magigin siring sa salog, asin an saimong katanosan siring sa mga alon kan dagat.”—ISAIAS 48:18.
1. Ano an kaipuhan tanganing mamatean niato an katoninongan nin arog kalubos kan mapupuwede?
AN MGA dayaday na nakikakabtang sa kongregasyonal na pag-adal kan Biblia sa tabang kan magasin na ini nagmimidbid sa halaga kan katoninongan na itinatao nin Dios, asin boot nindang kamtan an katoninongan na iyan. An kadaklan daing duwa-duwa na nagkakamit kaiyan. Alagad bakong gabos nakamamate kaiyan nin arog kalubos sa mapupuwede. Taano daw? Manongod sa mga magkakamit nin banal na katoninongan, si Jehova nagsasabi: “Ako, si Jehova, an saimong Dios, an Saro na nagtotokdo saimo na pakinabangon an saimong sadiri, an Saro na nagpapangyari saimo na maglakaw sa dalan na maninigo mong lakawan. O kun dadangogon mo sana kutana an sakong mga togon! Dangan an saimong katoninongan magigin siring sa salog, asin an saimong katanosan siring sa mga alon kan dagat.”—Isaias 48:17, 18.
2. (a) Ano an ipinaririsa kan tataramon na “dadangogon”? (b) Pira sa mga togon nin Dios an dapat niatong dangogon? (1 Juan 5:3)
2 Malinaw na minsan siisay puwedeng makinabang sa pag-atender sa mga pagtiripon na duman pinag-oolayan niato an Biblia. Alagad idto sanang mga nagdadangog sa mga togon ni Jehova, na iinaaplikar iyan nin personal asin minagawe oyon dian, an tunay na nagkakamit nin banal na katoninongan. Igwa daw nin mga bagay na dian kaipuhan nindong gibohon ini nin orog pa? (2 Pedro 1:2) Bakong igo na kita kumuyog sa nagkapira sa mga kahagadan nin Dios alagad likayan an mga para sa sato bakong kombenyente o mas depisil. Kan probaran kan Diablo na sugotan si Jesu-Cristo na madara sa saiyang paslong kaisipan, si Jesus marigon na nagsimbag: “Nasusurat, ‘An tawo dapat na mabuhay, bakong sa tinapay sana, kundi sa lambang tataramon na minaluwas sa ngoso ni Jehova.’”—Mateo 4:4.
3. Anong mga kabtang kan satong buhay an dapat na ioyon sa mga dalan ni Jehova tangani kitang tunay na magkaigwa nin abundang katoninongan?
3 An mga togon nin Dios may labot sa gabos na kabtang kan satong buhay. Enot sa gabos, iyan may labot sa satong relasyon ki Jehova. Dangan iyan nakaaapektar sa satong punto-de-vista manongod sa saiyang naheheling na organisasyon asin sa Kristianong ministeryo, sa satong pagtratar sa mga kaiba sa pamilya, asin sa pakikiiba niato sa mga tagakinaban. An mga odok na nagdadangog sa mga togon ni Jehova sa gabos na ini iyo an binibendisyonan nin abundang katoninongan. Pag-olayan niato an pirang bagay na makatatabang sato na mamatean iyan nin personal.
Nagkakaipo daw kan Saindong Atension an Arin Man sa mga Bagay na Ini?
4. (a) Taano an pagkaigwa nin pag-adal sa Biblia o pagduman sa Kingdom Hall ta bakong garantiya na kita may pakipagkatoninongan sa Dios? (b) Ano an kaiba sa pagtubod ki Jesu-Cristo? (Juan 3:36)
4 Kamo daw bago pa sanang pumoon na mag-adal kan Biblia kaiba kan mga Saksi ni Jehova? O tibaad pirang bulan o pirang taon na kamong nakiaasosyar sa lokal na kongregasyon? Kun iyo, sierto na kamo nakanompong nin kagayagayahan sa pagkaigwa nindo nin kaaraman sa mga katuyohan nin Dios. Alagad an bagay na an saro may pag-adal sa Biblia o nawiwili sa pagduman sa Kingdom Hall dai nagpapatunay na sia may pakipagkatoninongan sa Dios. Kita gabos namundag sa kasalan, asin an pakipagkatoninongan sa Dios posible sana para sa sato paagi ki Jesu-Cristo. (Isaias 53:5; Gibo 10:36) An daing ginigibong paniniwala sana ki Jesus dai nagtatao kan katoninongan na iyan. Kaipuhan na personal na masabotan an satong pangangaipo sa pantubos, tumubod sa halaga kan atang ni Jesus, dangan tumao nin ebidensia sa pagtubod na iyan paagi sa pagkuyog sa saiyang mga togon. (Santiago 2:26) An saro sa mga pagboot na itinao ni Jesus kan nasa daga iyo na an mga magigin disipulo nia maninigong bautismohan sa tubig. (Mateo 28:19, 20) Kamo daw nabautismohan na bilang simbolo kan saindong pagdusay ki Jehova paagi ki Jesu-Cristo?
5. Taano an pagdusay asin bautismo ta mahalaga sa pagkaigwa niato nin pakipagkatoninongan sa Dios?
5 Igwa daw nin ano man sa saindong buhay na minadiskuwalipikar sa saindo sa bautismo? Kun aram nindong igwa, o kun sa saindong pag-adal maaraman nindo na igwa, dai mag-atraso na itanos an mga bagay. Aramon na an ano man na kaisipan o gawe na minadiskuwalipikar sa saro para sa bautismo kaolangan man sa saiyang pakipagkatoninongan sa Dios. Humirong may pag-apreta mantang may oportunidad pa. Arog kan ipinaririsa sa 1 Pedro 3:21, an mga tinatawan ni Jehova Dios nin marahay na konsensia idinudusay nguna an saindang sadiri sa saiya basado sa pagtubod sa atang ni Cristo, nagpapabautismo bilang simbolo kan pagdusay na iyan, asin nag-ootob kan kabotan nin Dios. Dangan napapasainda an katoninongan na kaiba nin marahay na konsensia huli sa pagkaigwa nin inooyonan na kamugtakan sa atubang nin Dios; mayo nin ibang paagi na iyan kamtan. Siyempre, iyan kapinonan sana.
6. Taano an satong kaisipan manongod sa mga pagtiripon kan kongregasyon ta may koneksion sa satong pagkakamit nin katoninongan?
6 Sumunod, horophoropon an pagigin regular nindo sa pag-atender sa mga pagtiripon kan kongregasyon asin an saindong pakikikabtang dian sono sa saindong makakaya. An mga pagtiripon daw na ini igwa nin lugar sa saindong buhay na dai nindo itinotogot na pakiaraman kan kinaban o nin ibang personal na aktibidad? Kamo daw nag-aandam para sa mga pagtiripon asin ibinibilang na pribilehiyo an pakikikabtang? An mga bagay na ini igwa man nin depinidong epekto sa pagkakamit nin katoninongan. Taano? Huli ta an espiritu nin Dios nasa saiyang banwaan na nagtitiripon, asin an katoninongan sarong bunga kan espiritung iyan. (Galacia 5:22) Sa mga pagtiripon na ini na kita natatabangan na masabotan an mga kahagadan ni Jehova, asin kaipuhan niato ini tanganing magibo an ikinaoogma kan saiyang mga mata. Digdi nanonodan man niato kun paano paooswagon an katoninongan sa satong relasyon sa kapwa—sa kongregasyon, harong, eskuwelahan, asin sa satong trabaho. An satong mga pagtiripon saro sa pangenot na mga paagi na kita tinotokdoan ni Jehova, asin arog kan sinasabi kan Kasuratan, an mga tinotokdoan ni Jehova iyo an nagkakamit nin abundang katoninongan.—Isaias 54:13.
7. Anong pag-aplikar kan mga napag-oolayan sa satong pagtiripon an kaipuhan?
7 An konektadong gayong punto na maninigong tawan nin atension iyo an progresibong pag-aplikar sa satong personal na buhay kan satong nanonodan. Habo niatong magin arog kan mga Israelitas na sinabi ni Jehova na ‘paorootrong magdadangog alagad dai makasasabot.’ (Isaias 6:9) Dugang pa, boot daw niatong magin arog kan mga isinabi ni Jehova ki Ezequiel—mga tawo na magdadangog sa propeta ni Jehova alagad dai gigibohon an saiyang isinabi huli ta gusto nindang panigoan an saindang marigsok o materyalistikong mga kamawotan? (Ezequiel 33:31, 32) Al kontraryo, an mga magtitiripon sa harong ni Jehova sa satong aldaw asin magkakamit kan saiyang pag-oyon ilinaladawan na nagsasabi: “Magturukad kita sa bukid ni Jehova asin sa harong kan Dios ni Jacob; asin totokdoan nia kita mapadapit sa saiyang mga dalan, asin magraralakaw kita sa saiyang mga dana.” (Miqueas 4:2) Kun talagang isinasapuso niato an pagtotokdo na inaako niato sa satong pagtiripon, kun sa kada pagtiripon mapili kita nin kisuerra sarong punto na personal na kaipuhan niato dangan pagmaigotan iyan, kita mag-aani nin matoninong na mga bunga. Arog kan sabi ni Jesus sa Lucas 11:28: “Maogma an mga nagdadangog sa tataramon nin Dios asin nag-ootob kaiyan!”
8. Paano an pakikikabtang sa ministeryo sa langtad sa pinakalubos na itinotogot kan satong kamugtakan nagtatao sato nin personal na pakinabang?
8 An saro sa mga bagay na idinodoon sa satong pagtiripon iyo an halaga nin lubos na pakikikabtang sa pagbalangibog kan Kahadean nin Dios asin nin pagtabang sa iba na magin mga disipulo. (Mateo 24:14; 28:19) Gurano kaimportante kan mga aktibidad na ini sa saindong buhay? Kun kita talagang nagdangog sa sinasabi sato ni Jehova paagi sa saiyang Tataramon asin sa saiyang organisasyon, aram niato na ini an pinakamahalagang gibohon sa daga ngonyan. (Kapahayagan 14:6, 7) Asin aram nin gabos na an mga nasa bilog na panahon na paglilingkod—saka an mga, minsan ngani dai makapagpapayunir, talagang mahigos sa ministeryo—iyo an pambihira an kaogmahan. An katoninongan na nakakamtan ninda bako sanang siring sa sarong toro nin tubig, kundi arog kan sabi ni Jehova, iyan nagigin “siring sa salog.” (Isaias 48:18) Iyan daw an namamatean nindo? Puwede iyan sa sato gabos.
9. Ano an makatatabang sato na mapagdanay an satong katoninongan na itinao nin Dios dawa kun kita nag-aagi sa grabeng mga kasakitan?
9 Minsan siring, an pagkuyog niato sa gabos na hatol na ini dai kita ginigibong libre sa mga problema sa buhay sa presenteng palakaw nin mga bagay. Alagad minsan pa gurano kadepisil kan mga kamugtakan, pinanunugaan kita nin Dios kan saiyang mamomoton na tabang kun kita madolok sa saiya. (1 Pedro 5:6, 7) Nakanood na daw kitang hagadon an tabang asin paggiya ni Jehova sa gabos na ginigibo niato, na daing pag-alangan na minadolok sa saiya sa pamibi asin, pakagiboha kan gabos niatong makakaya manongod sa masakit na mga kamugtakan, itinatao an satong pasan ki Jehova, na may pagkompiar na ipinamamahala iyan sa saiya? (Talinhaga 3:5, 6; Salmo 55:22) Maigot kitang sinasadol sa Filipos 4:6, 7: “Dai kamo maghadit sa ano man na bagay, kundi sa gabos na bagay paagi sa pamibi asin pagngayongayo na may pasalamat ipahayag nindo sa Dios an saindong mga kahagadan; asin an katoninongan nin Dios na minalampas sa gabos na kaisipan mag-iingat kan saindong puso asin kan saindong mga pag-isip sa paagi ni Cristo Jesus.” Makangangalas nanggad na probisyon iyan! Nakanood na daw kamong lubos na makinabang sa katoninongan nin Dios na pinagigin posible sa paaging iyan?
Padagos na Gibohon an Katoninongan
10. Pakahanapa sa katoninongan, ano an kaipuhan na gibohon niato?
10 Oras na kamtan niato an katoninongan na iyan, dai puwedeng magin pabaya kita dian. Kaipuhan an maigot na paghihingoa tanganing mapagdanay iyan. Kaya an 1 Pedro 3:10, 11 nagsasabi: “Sia na mamomoot sa buhay asin makaheheling nin marahay na mga aldaw, . . . hanapon nia an katoninongan asin gibohon iyan.” Mantang pinagmaigotan an sarong pasohan asin nakamtan na iyan, magigin karungawan nin saro na basangbasangon an pasohan na iyan. Pakatapos na hanapon asin kamtan an katoninongan, kaipuhan na magmaan kita sa mga bagay na puwedeng makalaglag kaiyan. Labi pa kaiyan, maninigong gibohon niato an mga bagay na nakakokontribuwir sa katoninongan.
11. (a) Anong kaisipan an tibaad magsapeligro kan satong relasyon ki Jehova? (b) Noarin kita maninigong humagad kan tabang nin Dios kun dapit sa mga sugot? (Mateo 6:13)
11 Kun naabot na niato an pakipagkatoninongan sa Dios huli sa paaging itinao nia, kaipuhan kitang magmaan na dai malaglag an relasyon na iyan paagi sa pagbuwelta sa paggibo nin kasalan. Siyempre, mantang kita gabos bakong sangkap, kita gabos nagkakasala. Alagad peligroso kun ipinananarahotan nin saro an mga kaisipan asin gawe na kinokondenar nin Dios. Dai puwede na kita dai sana iyan pag-intindihon asin magsabi, “Iyan an naturalesa ko.” (Roma 6:16, 17) Kaipuhan na pagsolsolan niato an kasalan imbes na ipanarahotan iyan, dangan kaipuhan na makimaherak kita sa Dios na patawadon kita basado sa satong pagtubod sa atang ni Jesus. Kaipuhan man na kita makanood na dumolok sa Dios para sa tabang bago kita magkasala, imbes na probaran na makipaglaban nin solo, sa huri padaog, dangan makimaherak nin kapatawadan. Sa tabang nin Dios, magigin kitang mapanggana sa pagsolog “kan bagong pagkatawo na linalang oyon sa kabotan nin Dios sa tunay na katanosan asin kaimbodan.”—Efeso 4:20-24.
12. (a) Tanganing magkamit nin katoninongan, ano pang ibang relasyon an nagkakaipo nin atension? (b) Ano an hinahagad sa sato sa bagay na ini?
12 Siyempre, an pagkakamit nin katoninongan may labot man sa relasyon sa ibang tawo. An tunay na mga Kristiano naglilingkod sa Dios bilang kabtang nin sarong organisasyon; sinda “kasararoan nin mga tugang.” (1 Pedro 2:17) Arog kan sabi ni Jesus na mangyayari sa saiyang mga parasunod, pambihira an saindang pagkaminorootmootan. (Juan 13:35) Alagad mayo sa sainda nin sangkap. Huli sa satong sadiring pagkabakong sangkap asin nin iba, tibaad kaipuhan na odok na ipamibi niato an nagkapirang bagay asin maghingoa na resolberan an mga problema. An Hebreo 12:14 nagsasadol sato: “Sunoda nindo an katoninongan sa kaibanan nin gabos na tawo.” Asin sa satong relasyon sa satong Kristianong mga tugang na lalaki asin babae, igwa nin espesyal na obligasyon na maghingoa sa paggibo nin katoninongan. Prangkahan, an 1 Tesalonica 5:13 nagsasabi: “Magin matoninong sa lambang saro.” Iyan nangangahulogan bako sanang nin pagpogol na bumalos kundi nin pagigin aktibong mga parapatoninong, na minagibo kan enot na tangga na bumalik an katoninongan asin andam na pahunod para sa ikatotoninong.—Efeso 4:1-3.
13. (a) Sa pakipagkatoninongan sa mga daing pagtubod, ano an puwede niatong gibohon, alagad paano niato ipinaheheling na naeenot an pakipagkatoninongan sa Dios? (b) Paano posible para sa sato na magkaigwa nin katoninongan mantang may karibokan sa palibot niato?
13 Minsan siring, sa luwas kan kongregasyon bakong gabos andam na makipagkatoninongan. Kaya, realistiko, an Roma 12:18 naghahatol: “Kun mahihimo, siring sa makakaya nindo, makipagkatoninongan sa gabos na tawo.” Alagad dai kaiba sa satong mga paghihingoa na makipagkatoninongan an pagkompromiso kun dapit sa matanos na mga kahagadan ni Jehova. Puwede niatong liwaton an oras sa paggibo nin pirang bagay, alagad aram niato na bakong madonong an pagpondo sa pag-atender sa mga pagtiripon kan kongregasyon o dai pakikikabtang sa ministeryo sa langtad tanganing mapagdanay an katoninongan sa agom o mga paryentes. Asin aram niato na dai ooyonan ni Jehova an satong pag-ayon sa maraot na mga gibo kaiba nin mga katrabaho o kaeskuwela tanganing kamtan an saindang pag-oyon. Minimidbid niato na an tunay na katoninongan nakakamtan sana kan mga enot sa gabos may pakipagkatoninongan sa Dios, kan mga namomoot sa pagboot ni Jehova asin naglalakaw sa saiyang mga dalan. An katoninongan na iyan iyo an pinahahalagahan niato nin orog sa ano pa man. (Salmo 119:165) Totoo, sa palibot niato tibaad may karibokan. An mga daing pagtubod tibaad nagdidiriskutiran asin nag-iiriwal; tibaad pagmudahon pa ngani kita ninda huli sa satong pagtubod. Alagad aram niato kun ano an itinokdo sato kan Tataramon nin Dios na maninigong igawe niato. Paagi sa paglakaw sa dalan na kaoyon sa matanos na mga dalan ni Jehova, dai nawawara sato an katoninongan na pinakamahalaga.—Ikomparar an Salmo 46:1, 2.
14. Dawa ngani kita personal na nag-aagi sa kasakitan, ano an nagpapangyari sato na padagos na magkaigwa nin panlaog na katrangkilohan asin maogmang paglaom?
14 Kan huring banggi bago sia nagadan, sinabihan ni Jesus an saiyang maimbod na mga apostol: “Isinabi ko an mga bagay na ini sa saindo tanganing paagi sa sako magkaigwa kamo nin katoninongan. Sa kinaban magkakaigwa kamo nin kasakitan, alagad magin mapuso kamo! Nadaog ko an kinaban.” (Juan 16:33) Iyo, nag-aagi kita sa kasakitan. Bilang mga Kristiano, nag-aagi kita sa laen-laen na klase nin paglamag. Tibaad mag-agi kita nin inhustisya, asin dakol an naghehelang nin grabe. Alagad an banal na katoninongan nagsusustenir sa sato sa gabos na ini. Huling kita natokdoan ni Jehova, aram niato kun taano ta pinaglalamag an mga Kristiano. Dai kita nin pagduda sa kun taano ta may inhustisya asin kun taano kita ta naghehelang. Aram man niato kun ano an natatagama sa ngapit. Aram niato na bilang resulta kan maimbod na pamumuhay ni Jesus asin kan saiyang pagkagadan bilang atang, segurado an kaligtasan. Dugang pa, aram niato na ano man an problema na napapaatubang sa sato ngonyan, makadodolok kita sa Dios sa pamibi na may pagsarig na sia mamomoton na nangangataman sa sato asin pakokosogon kita paagi sa saiyang espiritu.—Roma 8:38, 39.
15. Paano totoo na an katoninongan na pinapangyayari ni Cristo bakong kapareho kan itinatao kan kinaban?
15 Angay nanggad, si Jesus nagsabi sa Juan 14:27: “Winawalatan ko kamo nin katoninongan, itinatao ko saindo an sakong katoninongan. Dai ko iyan itinatao saindo siring sa pagtao kan kinaban. Dai mahadit an saindong puso ni matakot man.” Totoo nanggad iyan—an kinaban mayo kan katoninongan na itinatao nin Dios paagi ki Jesu-Cristo. Iyan nagpapangyari sato na magin makosog sa atubangan nin mga kamugtakan na kun sa iba mawawaran na nin paglaom.
16. (a) Ano an paglaom na natatagama sa mga tunay na nagpapahalaga ngonyan sa katoninongan na itinatao nin Dios? (b) Paano niato ikapaheheling na talagang pinahahalagahan niato an katoninongan na iyan?
16 Makangangalas nanggad an ngapit na natatagama sa gabos na ngonyan nag-aako kan katoninongan na gikan sa Dios asin tinatawan iyan kan maninigong importansia sa saindang buhay! Dai na mahahaloy mawawara an kinaban na kaiwal nin Dios. An gabos na linalang pag-abot nin panahon lubos na magkakasararo sa katoninongan huli sa matanos na mga kahagadan kan Unibersal na Soberano. An satuya logod na pagpasalamat sa makangangalas na paglaom na ini magpahiro sato na maghingoa ngonyan na lubos na kaoyon dian. Kita logod gabos magdangog nin maingat sa instruksion ni Jehova asin itanom nin hararom sa satong puso an saiyang mga togon tanganing talagang kamotan niato an saiyang mga dalan patin gibohon an hinahagad nia. Arog kan sabi kan Talinhaga 3:1, 2: “Aki ko, dai mo paglingawan an sakong pagboot, asin kuyogon logod kan saimong puso an sakong mga togon, huli ta idadagdag saimo an lawig nin mga aldaw asin taon nin buhay asin katoninongan.”
Mga Hapot sa Repaso
◻ Sono sa Isaias 48:18, ano an kaipuhan tanganing magkaigwa kita nin abundang katoninongan?
◻ Paagi sa paggibo nin anong mga bagay na kita puwedeng makamate nin banal na katoninongan nin orog pa?
◻ Ano an hinahagad sa sato kun dapit sa pagpadanay nin pakipagkatoninongan sa satong mga tugang na lalaki asin babae?
◻ Paano niato mapagdadanay an katoninongan dawa kun napalilibotan nin mga daing pagtubod?
[Ritrato sa pahina 20]
Bautismo
[Mga ritrato sa pahina 21]
Dayaday na pag-atender sa pagtiripon
Pag-aplikar kan nanonodan niato
[Mga ritrato sa pahina 22]
Lubos na pakikikabtang sa ministeryo sa langtad
Pagtao kan satong mga pasan ki Jehova