Kultibaron an Interes na Daing Pag-atraso
1 “Dai na ipanuodma pa an puwede mo nang gibohon ngonyan.” Dakol an pamilyar sa proberbiong ini na nandadagka na gibohon tolos-tolos an mahahalagang mga bagay. Ipinaheheling kan minasunod na eksperyensia na puwede tang iaplikar an prinsipyong ini sa satong ministeryo.
2 An sarong tugang na babae nakapasakamot nin libro sa sarong lalaki asin nanugang madalaw liwat. Dai tinutuyo, an saro pang tugang na babae nagsongko sa iyo man sanang harong pakalihis nin sarong oras. Nagluwas an lalaki sa pinto na kapot an libro asin sinabi saiya: “Kan sabihon nindo na mabalik kamo, dai ko inisip na arog kaini kadali, pero dumagos ka, andam na ako para sa pag-adal.”
3 Minsan ngani an siring kadaling pagdalaw liwat tibaad bihira, an eksperyensiang ini nagdodoon kan pangangaipo na magin alisto na kultibaron an interes na daing pag-atraso. Sa Abril mag-aalok kita kan suskripsion sa Torrengbantayan, na matabang sa mga tawo na masundan an pankinaban na mga pangyayari bilang kaotoban kan hula sa Biblia.
4 Nangangaipo nin Dugang na Tabang an mga Tawo: Tanganing matabangan an mga tawo na masabotan an mahalagang impormasyon na ini asin maapresyar na iyan nakaaapekto sa saindang buhay asin ngapit, kaipuhan tang mag-areglo nin pagdalaw liwat, mas marahay sa laog nin nagkapirang aldaw pakalihis kan enot na pagsongko.
5 Buksan an Dalan Para sa Pagdalaw Liwat: Bako perming pasil na makatalaan nin espisipikong oras, asin an kagharong tibaad dai magirumdoman an napagkaolayan na oras. Minsan siring, kun maingat nindong isusurat an panahon para sa siring na pagdalaw liwat asin seguradong magigibo an pagsongko—sa laog nin pirang aldaw kun posible—maootob nindo an saindong paninimbagan na isaboot an pakikipag-olay. Kun mayo an tawo sa harong, siertohon na ipadagos an pagprobar na manompongan sia. Puwedeng madagka sia na seryosong akoon an saindong pagdalaw kun naheheling nia an saindong determinasyon na manompongan sia sa harong.
6 Mantang dai nanggad kita lubos na nakasisierto sa ipinaheling na interes kan tawo kan gibohon ta an enot na pagdalaw, isurat na madalaw liwat minsan ngani garo baga kadikit sana an interes. Puwedeng napukaw nindo an interes kan tawo sa Torrengbantayan, asin sa pagdalaw liwat tibaad masorpresang marhay kamo sa marahay na pagpadagos na inako nindo. Kaya siertohon na kultibaron an interes na dai nin pag-atraso!