Balikan an mga Interesado—Noarin?
1. Ano an kalabot sa paggibo nin mga disipulo?
1 Kalabot sa paggibo nin mga disipulo an pagdalaw liwat sa siisay man na nagpaheling nin pagigin andam na makanood dapit sa areglo kan Kahadean ni Jehova. (Mat. 28:19, 20) An pinakamarahay na panahon na magdalaw liwat parateng nakadepende sa iskedyul niato saka kan interesado. Taano ta maninigo kitang bumalik tolos pakatapos kan satong enot na pagdalaw?
2, 3. Taano ta maninigo kitang magmaigot na bumalik sa pinakamadaling panahon na mapupuede?
2 Taano ta Dapat na Bumalik Tolos? Madali nang matapos an paghuhulit kan “maogmang baretang ini kan kahadean,” asin harani na an katapusan kan sistemang ini nin mga bagay. (Mat. 24:14; 1 Ped. 4:7) Kun siring, mantang bukas pa sa mga interesado an “aldaw nin kaligtasan,” dapat niatong himateon an sadol na ‘ihulit an tataramon na may pagkaapurado,’ na kaiba an pagdalaw liwat sa pinakamadaling panahon na mapupuede tanganing kultibaron an ipinaheling na interes.—2 Cor. 6:1, 2; 2 Tim. 4:2.
3 Gustong-gusto ni Satanas na kuanon an ano man na banhi kan Kahadean na tibaad ikatanom niato sa puso nin sarong interesado. (Mar. 4:14, 15) Sa parate, an mga nagpaheling nin interes inoolog-olog nin mga kapamilya, katrabaho, asin iba pa. An pagbalik tolos sa sainda nakakatabang sa sato na gamiton na basehan an pinag-olayan kan nakaagi bago magin mapanggana an iba na haleon an interes ninda.
4. Sa enot na pagdalaw, ano an puede niatong gibohon bilang pag-andam sa pagdalaw liwat?
4 Pag-olayan Kun Noarin Kamo Mabalik: Pinakamarahay na gumibo nin espesipikong mga areglo sa pagdalaw liwat bago kamo humale sa enot nindong pagdalaw. Magpalataw nin hapot na sisimbagon nindo sa sunod na pagdalaw. Mahalaga na magkaigwa nin marahay na rekord kaini. Kun itinotogot kan saindong iskedyul, puede nindong ihapot kun puede kamong bumalik sa sunod na aldaw o sa dai mahahaloy pakalihis kaiyan. Kun sa katapusan kan semana an enot na pagdalaw sa interesado asin sia may trabaho durante kan semana, tibaad maoyon sia na dalawon liwat sa sunod na katapusan kan semana. Kun napag-olayan nindo kun noarin kamo mabalik, siertohon na ootobon nindo iyan.—Mat. 5:37.
5. Paano an pagbalik tolos niato nakakatabang sa sato na otobon an sugo ni Jesus na gumibo nin mga disipulo?
5 May marahay kitang mga dahelan na balikan an mga interesado sa pinakamadaling panahon na mapupuede. Kun siring, pag-olayan kun noarin kamo mabalik asin bumalik tolos, huling “nainaan na an panahon na natatada.” (1 Cor. 7:29) Kun dadalawon niato liwat sa mas amay na panahon an mga interesado sa mensahe kan Kahadean, posibleng marhay na magigin mas mabunga an satong mga paghihingoa.