Mga Pag-aatubang na Nakakukua nin Simbag
1 An mga pag-aatubang na nakakukua nin simbag iyo idtong nagpapaheling kun paano an tema may labot sa kagharong, na iyan sarong bagay na kaipuhan o magagamit nia. Tabangan an kagharong na marealisar na, “Kalabot ako digdi.” Sa pagpreparar nin pag-aatubang, dapat tang hapoton an satong sadiri: ‘Anong mga tema an pinagkakainteresan kan mga tawo sa sakong teritoryo? Ano an saindang mga pangangaipo? Paano ko ipipresentar an mensahe tanganing ipaheling na nasa isip ni Jehova an saindang mga pangangaipo?’ Nakalista sa ibaba an nagkapirang bagay na pagkakainteresan kan mga tawo ngonyan. Magagamit daw nindo an saro sa mga ini sa saindong pag-aatubang? Mangnohon man kun paano ikaiiba an mga punto hale sa pinakahuring Torrengbantayan.
2 Paghadit Dapit sa Kakulangan nin Kaogmahan: “Nakikipag-olay kami sa mga tawo na naghahadit sa mga problema nin buhay sa satong komunidad. Dakol an bako talagang maogma sa saindang sadiring buhay. Sa paghona nindo posible daw na magkaigwa nin tunay na maogmang buhay? [Pasimbagon.] An saro sa mga liyabe nin kaogmahan makukua sa Biblia sa Kapahayagan 1:3. [Basahon.] Makatatao saindo nin kaogmahan an pakasabot sa sinasabi kan Kapahayagan dapit sa ngapit. Mangnohon an saro sana sa mga hula kaiyan.” Basahon an Kapahayagan 21:3, 4 asin basahon an pahina 19, parapo 23 kan Abril 1, 1992 na Torrengbantayan.
3 Paghadit Dapit sa Ngapit: “Nagmamaigot kaming ihiras sa samong mga pagtaraed an positibong pagmansay sa ngapit. Iyan man daw an saindong pagmansay sa buhay? [Pasimbagon.] Sono sa Biblia, igwa kitang dahelan na magin optimistiko kun ginigibo niato an sinasabi kaiyan sa Kapahayagan 1:3.”
4 Paghadit Dapit sa Pagdadanay nin Marahay na Salud: “Dakol sa satong pagtaraed an mapagbantay sa pagdadanay nin marahay na salud. Pero, sa ibong nin mga pag-iingat na ginigibo niato, naghehelang pa man giraray kita. Boot daw nindong mabuhay sa sarong kinaban kun saen an gabos magkakamit nin sangkap na salud asin kabagsikan? Ipinaheheling kan Biblia na itatao ini nin Dios sa dai na mahahaloy.” Basahon an Isaias 35:5, 6 asin basahon an parapo 7 asin 8 sa pahina 15 asin 16 kan Abril 1 na Torrengbantayan manongod sa mga probisyon para sa buhay durante sa Sangribong Taon na Paghahade ni Cristo.
5 Paghadit Dapit sa Polusyon Asin sa Kapalibotan: “Sa pakikipag-olay sa samong mga pagtaraed, napag-araman mi na dakol an nahahadit manongod sa kun paano an aire, tubig, asin kakanon naaatian. Sa paghona daw nindo kaya pang tapuson ini kan mga gobyerno? [Pakomentohon.] Nakapakokosog na maheling sa Biblia na katuyohan nin Dios para sa mga mahoyo na gibohon an daga na paraiso, arog kan ipinaheheling sa Isaias 65:17-25.” Dangan puwede nindong basahon an parapo 11 sa pahina 16 kan Abril 1 na Torrengbantayan.
6 Mantang odok nindong pinagmamaigotan na maabot an puso kan saindong mga parahinanyog, maghihimate an mga nagugutom para sa katotoohan asin katanosan.—Mat. 5:3, 6.