Kapahayagan—Sarong Liabe sa Tunay na Kaogmahan
1 Sa Kapahayagan 1:3, sinasabi sato ni apostol Juan kun paano makanonompong nin kaogmahan. Sia nagsurat: “Maogma an nagbabasa nin makosog asin nagdadangog sa mga tataramon kan hulang ini, asin an nagkukuyog sa mga bagay na nasusurat dian.” An librong Revelation—Its Grand Climax At Hand! nakatabang sa dakol na makanompong nin orog pang kaogmahan. Igwa kita nin marahay na dahelan na ialok iyan sa iba.
2 Puede nindong ponan an pag-orolay paagi sa hapot na ini:
◼ “Sa paghona daw nindo puedeng masabotan an libro sa Biblia na Kapahayagan, o iyan daw perming magdadanay na sarong misteryo? [Pasimbagon.] Dakol an igwa kan siring na punto-de-vista nindo. Mangnoha an sinasabi kan Biblia sa Kapahayagan 1:3. [Basahon.] Kun siring masasabotan an Kapahayagan, asin an kaaraman manongod dian makatatao sato nin kaogmahan. Paano daw ini posible?” Repasohon an mga ideya sa parapo 2 sa pahina 6, dangan magsabi: “Iinaatubang kan publikasyon na ini an bersikulo-por-bersikulong paliwanag kan librong Kapahayagan. Maoogma akong iwalat saindo an kopyang ini.”
3 Huling dakol an nahahadit dapit sa pagsustento sa saindang materyal na mga pangangaipo, puede ining makapukaw nin interes:
◼ “Ano sa paghona nindo an satong pinakadakulang pangangaipo? [Pasimbagon.] Dakol an nakamamate na an kaipuhan niato dugang pang materyal na bagay.” Buksan sa pahina 73 asin repasohon an mga punto sa kahon na may temang “Materialism Versus Wisdom.” Magpadagos paagi sa pagsabi: “Ipinaheheling kaini na sobra an pagpahalaga sa materyal na mga bagay; maninigo kitang magin mas sibot dapit sa satong espirituwal na mga pangangaipo.” Basahon an Juan 17:3, asin ipaliwanag kun paano an kaaraman manongod sa Dios puedeng gumiya pasiring sa buhay na daing katapusan. Ialok an libro asin iareglo an pagdalaw liwat.
4 Huling dakol an nahahadit manongod sa problema sa kinaban, puede nindo ining probaran:
◼ “An gabos na nakakaolay ko nahahadit manongod sa ngapit. An ibang namomoon sa kinaban nakamamate na kita haranihon na sa sarong bagong panahon nin katoninongan. Ano an saboot nindo dian? [Pasimbagon.] Sa ibong kan gabos na paghihingoa nin tawo, an kadahasan asin problema nagdadakol sa bilog na kinaban. Ihinahayag kan Biblia an solamenteng nagdadanay na solusyon sa mga problemang ini. [Basahon an 2 Pedro 3:13. Buksan an ilustrasyon sa pahina 302, asin ipaliwanag kun paano dadarahon kan Kahadean nin Dios an nagdadanay na katoninongan asin katiwasayan sa dagang ini.] Tatabangan kamo kan publikasyon na ini na masabotan kun paano nindo makakamtan an buhay na daing katapusan sa pamamahala kan Kahadean nin Dios.”
5 Kun makanompong kamo nin saro na sibot asin dapat na madali sana kamo, puedeng sabihon nindo ini:
◼ “Mantang naghihidale kamo, boot kong iwalat an tract na ini na may temang An Kinaban daw na Ini Magdadanay? [Buksan sa pahina 6 asin basahon an Kapahayagan 21:3, 4.] Pinaririgon ko an boot nindo na basahon iyan. Sa masunod kong pag-agi, boot kong maaraman kun ano an saboot nindo dian.”
6 Mantang iinaalok niato an Revelation—Its Grand Climax At Hand! ngonyan na Pebrero, daing duwa-duwa na dakol an magkakamit nin kaogmahan paagi sa pakamansay sa kahulogan kan makangangalas na mga hula sa Kapahayagan.—Tal. 3:13.