Tabangan Sindang Makasabot
1 Dakol an nakamamate na an librong Kapahayagan “mapawot saboton.” (2 Ped. 3:16) Minsan siring, an kahulogan kaiyan liniwanag na sa librong Revelation. Paano niato matatabangan an mga interesado na gamiton iyan sa pinakamarahay?
2 Kun pinag-olayan nindo an Kapahayagan 1:3 kan enot nindong pagsongko, an ideyang ini puedeng pumukaw nin panibagong interes:
◼ “Kan nakaagi pinag-olayan niato kun paano puedeng makatao nin kaogmahan an pakasabot sa librong Kapahayagan. Minsan siring, tangani na makamtan an siring na kaogmahan kaipuhan niatong pag-adalan an Biblia, asin dapat niatong gibohon an satong nanonodan.” Basahon asin komentohan an Santiago 1:25. Buksan sa parapo 9 sa pahina 8, asin ipaheling kun paano an pakasabot sa librong Kapahayagan makatatabang sa sato na magkamit nin kaogmahan.
3 Kun pinag-olayan nindo an Juan 17:3 kan enot nindong pagdalaw, puede nindong idoon an pangangaipo na kumua nin dakol pang kaaraman sa Biblia paagi sa pagsabi:
◼ “Kan nakaagi kong pagdigdi, nabasa niato sa Juan 17:3 na an pagkua nin kaaraman dapit sa Dios puedeng gumiya pasiring sa buhay na daing katapusan. Alagad gusto daw nindong mabuhay sagkod lamang sa kinaban na iniistaran niato ngonyan? [Pasimbagon.] An kadaklan habo. Sa dahelan na ini, makapaggagayagaya kita kun madangog niato an ipinanuga nin Dios.” Buksan sa parapo 6 sa pahina 303, basahon asin komentohan an Kapahayagan 21:4, dangan ialok na bumalik liwat para sa orog pang pag-orolay.
4 Kun ginamit nindo an ilustrasyon sa pahina 302 kan enot na pagsongko, puede nindong buksan giraray an libro sa pahinang iyan asin sabihon:
◼ “Pinag-olayan niato an mga bendisyon na ilinadawan digdi na makakamtan nin mga tawo sa pamamahala kan Kahadean nin Dios. Ano sa paghona nindo an dapat niatong gibohon kun boot niatong mabuhay sa pamamahala kan Kahadean na iyan? [Pasimbagon.] An nagkapirang tawo kan mga panahon kan Biblia nagtao nin marahay na halimbawa na dapat niatong arogon.” Basahon an Gibo 17:11, na idinodoon an pangangaipo na ‘siyasaton an Kasuratan aroaldaw.’ Mag-alok nin pag-adal sa Biblia sa harong.
5 Kun iwinalat nindo sa sarong sibot na kagharong an tract na “An Kinaban daw na Ini Magdadanay?,” puede kamong magsabi:
◼ “Kan dai pa sana nahahaloy na nagdalaw ako, sibot kamong marhay, alagad nagwalat ako saindo nin sarong tract asin binasa niato an Kapahayagan 21:4, na kinokotar digdi sa librong ini, an Revelation—Its Grand Climax At Hand! [Basahon iyan sa parapo 6 sa pahina 303.] Ipinaheheling kan ilustrasyon na ini [sa pahina 302] kun ano an magigin kamugtakan kun ‘pahidon na nin Dios an gabos na luha sa satong mga mata.’” Ialok an libro.
6 Kun makanompong kamo nin interes, sa katapustapusi bobooton nindong darahon an atension sa librong Kaaraman na Minagiya Pasiring sa Buhay na Daing Katapusan asin gamiton iyan sa pagpoon nin pag-adal. Seguradong makanonompong kamo nin dakulang kagayagayahan sa pagtabang na ‘makasabot an mga daing kabatiran.’—Sal. 119:130.