Omawon si Jehova sa “Bilog na Aldaw”
1 Nagsabi si Hadeng David sa Salmo 145:2: “Sa bilog na aldaw pag-oomawon taka, asin an saimong ngaran sa panahon na daing katapusan, sagkod lamang pa ngani.” Paano niato puedeng arogon an halimbawa ni David sa pag-omaw ki Jehova sa bilog na aldaw?
2 Panoon an Satong Puso nin Pag-apresyar ki Jehova: An regular na pag-adal sa Tataramon nin Dios nagpapararom kan satong pasasalamat sa ginibo na asin gigibohon pa para sa sato ni Jehova. Mantang nagtatalubo kita sa pag-apresyar, kita magsusulwak dapit sa saiyang karahayan. (Sal. 145:7) Galaga niatong oomawon si Jehova aroaldaw.
3 Omawon si Jehova sa Aroaldaw na Pakikipag-olay: Kun nakikipag-olay sa kataraed, mga kaeskuela, katrabaho, asin iba pang nanonompongan niato aroaldaw, puede kitang makakua nin mga oportunidad na ihiras sa sainda an satong paglaom. An sarong kataed tibaad magpahayag nin paghadit manongod sa krimen sa komunidad; an sarong kaeskuela tibaad nahahadit dapit sa pag-abuso sa droga o inmoralidad; an sarong katrabaho tibaad magpahayag nin opinyon manongod sa sarong politikal na isyu. Puede niatong itokdo an Tataramon nin Dios tanganing ipaheling an tamang gigibohon ngonyan asin an remedyo sa katapustapusi para sa mga problemang ini. An siring na mta tataramon na itinaram sa “tamang panahon“ puedeng magin bendisyon!—Tal. 15:23.
4 Magtaram Dapit ki Jehova sa Bilog na Panahon: An tawo na may hararom na pag-apresyar ki Jehova boot na ihiras an maogmang bareta sa pinakadakol na iba pa na mapupuede. (Sal. 40:8-10) Kun siring maninigo niatong hapoton an satong sadiri, ‘Ginigibo ko daw an gabos na itinotogot kan sakong mga kamugtakan?’ Dakol an nakanompong na paagi sa nagkapirang pagliliwat, nakapagregular payunir sinda. Kun dai iyan itinotogot kan satong mga kamugtakan, puede daw kitang magpalista bilang auxiliary payunir? Huling an panahon kan Memorial panahon para sa pinahiwas na aktibidad, an mga bulan nin Marso, Abril, asin Mayo magigin marahay na panahon na mag-auxiliary payunir.
5 Tabangan an mga Bagohan na Umiba sa Sato sa Pag-omaw ki Jehova: An pagselebrar kan Memorial kan kagadanan ni Jesus perming nagpapagirumdom sa sato kan mga dahelan na omawon si Jehova. Marahay na panahon ini na parigonon an boot kan satong mga inaadalan sa Biblia na umiba sa sato sa pagtaram sa publiko manongod sa pagigin hale ni Jehova. Dagkahon sinda na horophoropon an sinasabi sa parapo 7-9 sa pahina 173-5 kan librong Kaaraman. Kun kualipikado sinda, dai sinda maninigong magduwa-duwa huli sana ta kulang sinda nin eksperyensia. Kun hihingoahon nindang magin mapuso sa paghuhulit, makakokompiar sinda na tatabangan sinda kapwa kan may kakayahan na mga parahayag asin ni Jehova.—Gibo 4:31; 1 Tes. 2:2.
6 Nagdadara kita nin daing sagkod na mga pakinabang sa satong sadiri siring man sa iba kun naghihingoa kitang omawon si Jehova sa bilog na aldaw.