Omawon si Jehova Kada Aldaw

1. Namomotibar an mga lingkod nin Dios na gibohon an ano, asin taano?

¹ Ipinahayag ni Hadeng David an saiyang determinasyon na omawon si Jehova “sa bilog na aldaw,” sagkod sa panahon na daing talaan pa ngani. (Sal. 145:2, 7, 21) May marahay na dahelan man kita na omawon si Jehova kada aldaw.—Sal. 37:10; 145:14, 18; 2 Ped. 3:13.

2. Paano puedeng omawon kan mga pamilya si Jehova kada aldaw?

² Sa Satong Harong: Igwa kita nin nakakapakosog na mga babasahon para sa makahulogan na espirituwal na mga pag-orolay kun ineestudyaran an pangaroaldaw na teksto, kun nagkakaigwa nin Pampamilyang Pagsamba, asin kun nag-aandam para sa mga pagtiripon kan kongregasyon. Pinagkatodan na nin dakol na pamilya na iribang magkakan nin kisiera sarong beses kada aldaw. Huli kaiyan, nagkakaigwa nin dai hinihidali asin relaks na pag-orolay saka mga oportunidad na omawon si Jehova. An siring na impormal na mga pag-orolay na pinoponan nin mga magurang puedeng magin mahalagang tabang sa pagpadakula sa mga aki sa “disiplina asin pagtatanos nin isip gikan ki Jehova.”—Efe. 6:4; Deut. 6:5-7.

3. Igwa kita nin anong mga oportunidad kun kaiba niato an satong mga tugang?

³ Kaiba an Satong mga Tugang: Kun nasa paglilingkod sa langtad o mga pagtiripon kan kongregasyon, igwa kita nin marahayon na mga oportunidad na omawon si Jehova kaiba an satong mga kapagtubod. (Tal. 15:30; Fil. 4:8; Heb. 13:15) Huling gabos kita pararehong namomoot ki Jehova, posibleng madali para sa sato na iiba an sinserong mga kapahayagan nin pag-apresyar sa karahayan ni Jehova kun nakikipag-olay sa lambang saro.—Sal. 106:1.

4. Sa anong mga kamugtakan puede nindong omawon si Jehova?

⁴ Kun Nakikipag-olay sa mga Bakong Kapagtubod: Minsan ngani huli sa mga kamugtakan tibaad dai niato makayang makikabtang nin aroaldaw sa pampublikong ministeryo, dawa an halipot na pakikipag-olay sa mga katrabaho, kaeskuela, asin iba pa sa palibot niato manongod ki Jehova asin sa saiyang mga katuyohan puedeng makatadom nin paglaom sa mga sadiosan an puso. (Sal. 27:14; 1 Ped. 3:15) Mantang nakasakay sa eroplano, sarong tugang na babae an nakapagpatotoo sa sarong kapwa pasahero na talagang naranga asin naparigon an boot huli sa nadangog nia kaya itinao nia sa tugang an saiyang adres asin numero sa telepono tanganing padagos nindang makontak an lambang saro. Mantang an kinaban nagsasakit huli sa nag-oorog na problema asin nagraraot na mga kamugtakan, an banwaan ni Jehova padagos na nagtatao nin “maogmang bareta dapit sa bagay na orog karahay” sa mga andam na maghinanyog. Ini nagtatao sa iba nin paglaom asin nagpapangyari sa sainda na omawon si Jehova.—Isa. 52:7; Roma 15:11.

5. Taano ta minamawot niatong omawon si Jehova, asin ano an puedeng ibunga kaini?

⁵ Siertong nakakapaogma nanggad ki Jehova na madangog an saiyang mga lingkod na nag-oomaw sa saiya kada aldaw! Arog kan naheheling na mga linalang ni Jehova sa satong palibot, kita man puedeng garo baga magsulwak sa pag-omaw sa saiya kada aldaw sa satong harong, sa kongregasyon, asin kun nakikipag-olay sa iba na bako pa niatong kapwa paraomaw ki Jehova.—Sal. 19:1-4.