May Kagayagayahan na Omawon si Jehova Aroaldaw!
1 An makangingirhat na kalangitan nagpapahayag kan kamurawayan ni Jehova sa “sunod-sunod na aldaw.” (Sal. 19:1-3) Kun an daing tingog, daing buhay na mga linalang danay na nagtatao nin pag-omaw ki Jehova, bako daw maninigo na kitang intelihenteng mga tawo mapahiro an boot na ilangkaw an satong mga tingog sa pag-omaw sa saiya sa gabos na panahon huli sa saiyang daing kaagid na mga kualidad asin ginibo? Siisay an mas angay na tawan kan satong magayagayang pag-omaw kisa sa satong mamuraway na Kaglalang?—Sal. 145:3, 7.
2 Aroaldaw: An pinasabngan na salmista nagsurat: “Sa aroaldaw ibalangibog nindo an maogmang bareta kan saiyang pagliligtas. Huli ta si Jehova dakula asin maninigo nanggad na omawon.” (Sal. 96:2, 4) Ini daw aplikado sana sa mga payunir? Dai! Nangangahulogan daw ini na gabos kita maninigong makipag-olay sa iba kan manongod ki Jehova sa ano man na panahon asin saen man na lugar na mahihimo ta, minsan sa mga aldaw na dai kita nakikakabtang sa ministeryo sa harong-harong? Iyo! An pangangaipo na omawon si Jehova aroaldaw asin sabihon sa iba an manongod sa paagi kan saiyang pagliligtas may pag-apretar. Kaipuhan na maaraman kan mga tawo na si Jehova iyo an Hadeng Daing Sagkod asin na itinao Nia an pamamahala sa kinaban sa Saiyang pinamuraway na Aki, si Jesu-Cristo. An pagkamoot ki Jehova asin sa mga tawo mapangyari sa sato na padagos na magtaram manongod sa mensaheng ini asin manongod sa saiyang mga probisyon para sa kaligtasan saen man may tawong manonompongan.—Sal. 71:15.
3 Aroaldaw sa saiyang daganon na ministeryo, si Jesu-Cristo nagtao kan pinakamarahay na halimbawa bilang prangkang paraomaw ki Jehova. Sia nagsabi: “Hayag takang inoomaw, Ama, Kagurangnan kan langit asin daga.” (Mat. 11:25) Maimbod sa saiyang tataramon, magsaen man si Jesus, hayag niang inomaw si Jehova. Asin saen man magtiripon an mga kadaklan—magin sa mga sinagoga, sa templo sa Jerusalem, sa itaas nin bukid, o sa baybayon—inomaw nia si Jehova. Kun maingat niatong susunodon an mga lakad ni Jesus paagi sa pagpadanay nin aroaldaw, dayaday na aktibidad sa hayag na pagpamuraway ki Jehova, kita makaeeksperyensia nin magayagaya, maogmang mga resulta.
4 Pagsimbag sa Pangagda: Masimbag daw kamo sa pangagda na hayag na omawon si Jehova aroaldaw? Girumdomon, an edad bakong olang. An Salmo 148:12 nangingimbitar sa mga soltero, daraga, gurang na lalaki, asin aking lalaki na omawon si Jehova. Mga hobenes, oomawon daw nindo si Jehova sa tahaw kan saindong mga kaeskuela asin paratokdo durante kan bagong taon na ini nin ereskuelahan? Mga adulto, an saindo daw na mga katrabaho sa saindong pinagtatrabawohan nakadadangog manongod ki Jehova asin sa saiyang mga katuyohan, kun may angay na panahon na makapag-orolay-olay? Gabos kita maninigong gibohon an pagtaram manongod ki Jehova na magin kabtang kan satong buhay na arog kaimportante kan paghangos asin pagkakan. Dawa kun an indiperenteng mga tawo dai magdangog sa satong sinasabi, igwa nin Saro na nagdadangog, asin babalosan nia kita.—Mal. 3:16.
5 Mantang nagrarani an katapusan kan palakaw, an pangapodan nakaaabot sa mga poro kan daga: “Omawon nindo si Jah, banwaan!” (Sal. 106:1) An sato logod na kurahaw nin pag-omaw orog na magkosog sa kada minaaging aldaw tanganing an gabos makaaram na an Saro na an ngaran Jehova iyo an Kaharohalangkawe sa bilog na daga.—Sal. 83:18.