Sinisiyasat ni Jehova—Taano ta Kapakipakinabang?

¹ An gabos nagmamawot nin marahay na salud. Pero, an dakol na marahay an salud nagkokonsulta pa man giraray sa panapanahon. Taano? Mawot nindang maaraman an ano man na nagpopoon na mga problema sa salud tanganing iyan mabolong. Mas mahalaga pa ngani na ingatan an satong espirituwal na salud. An pag-oyon ni Jehova minadepende sa pagdadanay na “makosog sa pagtubod.”​—Tito 1:13.

² Ngonyan an tamang panahon na masiyasat ni Jehova. Taano man? Huli ta si Jehova nasa saiyang banal na templo, asin sinisiyasat nia an puso kan gabos na tawo. (Sal. 11:​4, 5; Tal. 17:3) Arog ni David, hinahagad ta ki Jehova na siyasaton kita nin lubos: “Siyasata ako, O Jehova, asin baloa ako; liniga an sakong mga bato asin an sakong puso.”​—Sal. 26:2.

³ Kita dapat na mag-ingat tumang sa mga peligro sa espirituwal na salud niato na puedeng gumikan sa sato mismo huli sa satong bakong sangkap na laman. An Talinhaga 4:23 naghahatol: “Orog sa gabos na maninigong ingatan, ingatan mo an saimong puso, huli ta gikan dian an mga burabod nin buhay.”

⁴ An satong espirituwal na salud puede man na isapeligro kan maraot, inmoral na kinaban na nakapalibot sato. Kun pabayaan niato an satong sadiri na magin dayupot sa maraot na palakaw na ini, puede kitang magpoon na mag-isip kapareho kan pag-isip kaiyan asin makakultibar nin kinabanon na mga kaisipan. O tibaad sunodon niato an sarong kinabanon na estilo nin pamumuhay asin madaog kita kan espiritu kan kinaban.​—Efe. 2:​2, 3.

⁵ Puedeng gamiton ni Satanas an paglamag sa paghihingoang laglagon kita sa espirituwal. Sa parate, sia tusong naggagamit nin kinabanon na mga pan-akit tanganing tentaran kita. Sinasadol kita ni Pedro na ‘magmata asin magpuka,’ huli ta si Satanas “siring sa nagngangarob na leon, na naghahanap nin masisiba.” Sinasadol kita na ‘tumangon sia, na marigon sa pagtubod.’​—1 Ped. 5:​8, 9.

⁶ Kaipuhan na protehiran ta an satong espirituwal na salud paagi sa pagpadanay sa satong pagtubod na makosog asin paagi sa pagparigon kaiyan kada aldaw. Irenerekomendar ni apostol Pablo na padagos niatong baloon an satong pagtubod. Kun paanong may kadonongan tang hinihimate an praktikal na suhestion sa sato kan sarong may kakayahan na doktor, kita naghihinanyog man ki Jehova kun sa espirituwal na pagsiyasat Nia may manompongan na problema na maninigong itanos. Ginigibong posible kaini na kita “maliwat.”​—2 Cor. 13:​5, 11.

⁷ Si Jehova iyo nanggad an dakulang Parasiyasat. An saiyang pag-eksamin perming tama. Paagi sa saiyang Tataramon asin ‘maimbod na oripon,’ sia nagrereseta nin masustansiang espirituwal na pagkakan. (Mat. 24:45; 1 Tim. 4:6) An regular na pag-ako kan pagkakan na ini sa harong asin sa mga pagtiripon kan kongregasyon nagpapangyari sa sato na magdanay na makosog sa espirituwal. An regular na ehersisyo sa ministeryo kapakipakinabang man. Kun siring, inaako ta an regular na pagsiyasat ni Jehova, na nagtitiwala na padadanayon nia kitang nasa pinakamarahay na espirituwal na salud.