Isiniblag Tanganing Magin Magayagayang mga Paraomaw sa Bilog na Kinaban
“Omawa nindo si Jah, banwaan! Tumao kamo nin pag-omaw, O kamong mga lingkod ni Jehova, omawa nindo an ngaran ni Jehova.”—SALMO 113:1.
1, 2. (a) Kaoyon kan Salmo 113:1-3, siisay an maninigo sa satong entusiastikong pag-omaw? (b) Ano an angay na ihapot?
SI Jehova Dios an Kaharohalangkaweng Kaglalang kan langit asin daga, an satong Unibersal na Soberano sagkod sa panahon na daing sagkod. Sia lubos na maninigo sa satong entusiastikong pag-omaw. Ini an dahelan kaya pinagbobotan kita kan Salmo 113:1-3: “Omawa nindo si Jah, banwaan! Tumao kamo nin pag-omaw, O kamong mga lingkod ni Jehova, omawa nindo an ngaran ni Jehova. Pag-omawon logod an ngaran ni Jehova magpoon ngonyan asin sagkod sa panahon na daing katapusan. Magpoon sa pagsirang kan aldaw sagkod sa pagsolnop kaiyan pag-oomawon an ngaran ni Jehova.”
2 Bilang mga Saksi nin Dios, naggagayagaya kita na gibohon ini. Kanigoan kanakaoogma na madali nang pangyarihon ni Jehova Dios na makapano sa bilog na daga an magayagayang awit na ini nin pag-omaw na inaawit niato ngonyan! (Salmo 22:27) Nadadangog daw an saindong tingog sa dakulang koro na ini na lakop sa kinaban? Kun iyo, segurado na kanigoan an pagkaogma nindo na magin siblag sa baranga, daing kagayagayahan na kinaban na ini!
3. (a) Ano an minagibo sa banwaan ni Jehova na napapalaen, daing kaagid? (b) Sa anong mga paagi kita isiniblag?
3 An sararong pag-omaw niato ki Jehova sierto nanggad na ginigibo kitang napapalaen, daing kaagid. Kita oroyon sa satong itinataram asin itinotokdo asin parareho an ginagamit na mga paagi sa pagpahayag kan ‘kabalakidan kan karahayan ni Jehova.’ (Salmo 145:7) Iyo, bilang dusay na banwaan ni Jehova, kita isiniblag para sa paglilingkod sa satong Dios, si Jehova. Sinabihan nin Dios an saiyang suanoy na dusay na banwaan, an Israel, na magdanay na siblag sa mga nasyon sa palibot ninda asin dai madigtaan kan mga kaugalean kan mga nasyon na idto. (Exodo 34:12-16) Tinawan nia nin mga ley an saiyang banwaan tanganing tabangan sinda na magibo ini. Siring man ngonyan, itinao sa sato ni Jehova an saiyang Banal na Tataramon, an Biblia. Ipinaheheling sa sato kan mga instruksion kaiyan kun paano kita magdadanay na siblag sa kinaban na ini. (2 Corinto 6:17; 2 Timoteo 3:16, 17) Dai kita isiniblag paagi sa pagsuhay sa sato sa mga monasteryo asin kombento, siring kan mga monghe asin madre sa Dakulang Babilonya. Nagsusunod sa halimbawa ni Jesu-Cristo, kita mga paraomaw ki Jehova sa publiko.
Arogon an Pangenot na Paraomaw ki Jehova
4. Paano itinao ni Jesus an halimbawa sa pag-omaw ki Jehova?
4 Si Jesus nungkang suminuhay sa saiyang katuyohan na omawon si Jehova. Asin isiniblag sia kaini sa kinaban. Sa mga sinagoga asin sa templo sa Jerusalem, inomaw nia an banal na ngaran nin Dios. Baga man nasa alitoktok nin bukid o sa gilid nin dagat, saen man nagtitiripon an mga tawo, ihinulit ni Jesus sa publiko an mga katotoohan ni Jehova. Ipinahayag nia: “Hayag takang inoomaw, Ama, Kagurangnan kan langit asin daga.” (Mateo 11:25) Dawa kan binibista sa atubangan ni Poncio Pilato, si Jesus nagpatotoo: “Ako namundag dahel kaini, asin dahel kaini ako napadigdi sa kinaban, na ako magpatotoo sa katotoohan.” (Juan 18:37) Inapresyar ni Jesus an halaga kan saiyang gibohon. Saen man sia, si Jesus nagpatotoo dapit ki Jehova asin hayag na nag-omaw sa saiya.
5. Kiisay aplikado an Salmo 22:22, asin ano an maninigo na magin kaisipan niato?
5 Sa Salmo 22:22, maheheling ta an makahulang tataramon na ini mapadapit sa Pangenot na Paraomaw ki Jehova: “Ipapahayag ko an saimong ngaran sa sakong mga tugang; sa tahaw kan kongregasyon ika oomawon ko.” Asin sa Hebreo 2:11, 12, iinaaplikar ni apostol Pablo an mga bersikulong ini sa Kagurangnan na Jesus asin sa mga sinantipikar ni Jehova Dios para sa langitnon na kamurawayan. Arog nia, sinda dai nasosopog na omawon an ngaran ni Jehova sa tahaw kan kongregasyon. Yaon man daw sa sato an kaisipan na ini kun kita nag-aatender sa satong mga pagtiripon kan kongregasyon? An satong entusiastikong pagpartisipar sa mga pagtiripon, kapwa sa isip asin sa boses, nag-oomaw ki Jehova. Alagad natatapos daw dian an satong magayagayang pag-omaw?
6. Ano an isinugo ni Jesus sa saiyang mga disipulo, asin paano nagpapamuraway sa Dios an mga mamomoton sa liwanag?
6 Sono sa Mateo 5:14-16, isinugo man kan Kagurangnan na Jesus an saiyang mga parasunod na pasirangon an saindang liwanag tanganing an iba mag-omaw ki Jehova. Sia nagsabi: “Kamo iyo an liwanag kan kinaban. . . . Pasiranga an saindong liwanag sa atubangan nin mga tawo, tanganing maheling ninda an saindong marahay na mga gibo asin pamurawayon ninda an saindong Ama na nasa kalangitan.” An mga mamomoton sa liwanag nagtatao nin kamurawayan sa Dios. Ginigibo daw ninda ini paagi sana sa pagsabi asin paggibo nin marahay, humanitaryong mga bagay? Dai, imbes ginigibo ninda iyan paagi sa sararong pagpamuraway ki Jehova. Iyo, an mga mamomoton sa liwanag idinudusay an saindang sadiri sa Dios asin nagigin saiyang magayagayang mga paraomaw. Ginibo na daw nindo an maogmang aksion na ini?
Kagayagayahan Gikan sa Pag-omaw ki Jehova
7. Taano ta magayagayang marhay an mga paraomaw ki Jehova, asin anong kagayagayahan an yaon sa sainda kan aldaw nin Pentecostes 33 C.E.?
7 Taano ta magayagayang marhay an mga paraomaw ki Jehova? Huli ta an kagayagayahan sarong bunga kan banal na espiritu nin Dios. Sa Galacia 5:22, iyan ilinista kasunod kan pagkamoot. An mga disipulo ni Jesus kan enot na siglo ipinaheling an bungang ini kan espiritu ni Jehova. Tara, kan aldaw nin Pentecostes 33 C.E., kan ibubo nin Dios an saiyang espiritu sa mga 120 disipulo ni Jesus, sinda gabos nagpoon na mag-omaw ki Jehova sa laen-laen na tataramon. An may paggalang na mga Judio na nagdatong sa Jerusalem hale sa dakol na nasyon ‘nasorpresa asin nagngaralas.’ Sinda nagkagsing: “Nadadangog niato sindang nagtataram sa satong mga tataramon dapit sa makangangalas na mga bagay nin Dios”! (Gibo 2:1-11) Ano an resulta kaining makangangalas na pag-omaw ki Jehova sa dakol na tataramon? Mga 3,000 na Judio asin proselitong Judio an nag-ako kan maogmang bareta kan Kahadean mapadapit sa Mesiyas. Sinda nagpabautismo, nag-ako kan banal na espiritu, asin galagang idinagdag an saindang mga tingog bilang magayagayang mga paraomaw ki Jehova. (Gibo 2:37-42) Kanigoan na bendisyon idto!
8. Pakatapos kan Pentecostes, ano an ginibo kan mga Kristiano tanganing paorogon an saindang kagayagayahan?
8 An report nagpapadagos: “Aroaldaw sinda danay na nasa templo na may pagkasararo, asin sinda nagkarakan sa pribadong mga harong asin nagkarakan na may dakulang paggayagaya asin pagigin odok sa puso, na nag-oomaw sa Dios asin nakakukua nin pabor sa bilog na banwaan. Sa panahon man sanang iyan padagos na idinudugang sa sainda ni Jehova aroaldaw an mga naliligtas.” (Gibo 2:46, 47) An pag-iribaiba sana daw ninda asin pagkarakan an nagtao sa sainda nin dakulang paggayagaya? Dai, an saindang pangenot na kagayagayahan naggikan sa pag-omaw ki Jehova Dios aroaldaw. Asin nag-orog an saindang kagayagayahan kan maheling ninda na rinibo an naghihimate sa saindang mensahe nin kaligtasan. Arog man kita kaiyan ngonyan.
Magayagayang mga Paraomaw sa Gabos na Nasyon
9. (a) Kasuarin asin paano pinonan nin Dios na itao sa mga tawo kan gabos na nasyon an oportunidad na madangog an saiyang maogmang bareta? (b) Taano ta ibinubo an banal na espiritu ki Cornelio asin sa saiyang kairiba bago kan saindang bautismo?
9 Habo ni Jehova na an aktibidad na pagdara nin liwanag kan saiyang mga lingkod limitaran sa saro sanang nasyon. Kun siring, poon kan 36 C.E., itinao nia sa mga tawo kan gabos na nasyon an oportunidad na madangog an saiyang maogmang bareta. Sa pagdirehir nin Dios, si Pedro nagduman sa harong nin sarong Hentil na opisyal sa hukbo sa Cesarea. Duman nanompongan nia si Cornelio na katiripon an saiyang pinakadayupot na mga katood asin pamilya. Mantang sinda odok na naghihinanyog sa mga tataramon ni Pedro, naggibo sinda nin pagtubod ki Jesus sa saindang puso. Paano niato naaaraman? Huli ta an banal na espiritu nin Dios nagdatong sa nagturubod na Hentil na idto. Sa parate, an balaog na espiritu nin Dios itinatao sana pakatapos nin bautismo, alagad sa okasyon na idto ipinaheling ni Jehova an saiyang pag-oyon sa bakong mga Judio na ini bago kan saindang bautismo. Kun dai idto ginibo ni Jehova, dai kutana masisierto ni Pedro na inaako na ngonyan nin Dios an mga Hentil bilang Saiyang mga lingkod asin na kualipikado na sinda para sa bautismo sa tubig.—Gibo 10:34, 35, 47, 48.
10. Paano ihinula poon kan suanoy na mga panahon na an mga tawo kan gabos na nasyon mag-oomaw ki Jehova?
10 Poon kan suanoy na mga panahon, ihinula ni Jehova na an mga tawo sa gabos na nasyon mag-oomaw sa saiya. Magkakaigwa sia nin magayagayang mga paraomaw sa gabos na kadagaan. Tanganing patunayan ini, si apostol Pablo nagkotar nin mga hula sa Hebreong Kasuratan. Sinabihan nia an internasyonal na kongregasyon nin mga Kristiano sa Roma: “Akoon nindo an lambang saro, kun paanong inako man kita kan Cristo, para sa kamurawayan nin Dios. Huli ta ako nagsasabi na si Cristo nagin nanggad ministro kan mga tinuri manonongod sa pagigin totoo nin Dios, tanganing patunayan an mga panuga Nia sa saindang mga apoon, asin tanganing an mga nasyon magpamuraway sa Dios huli sa saiyang pagkaherak. Siring sa nasusurat [sa Salmo 18:49]: ‘Kaya ika hayag kong mimidbidon sa tahaw kan mga nasyon asin sa saimong ngaran ako mag-aawit.’ Asin sa giraray sia nagsasabi [sa Deuteronomio 32:43]: ‘Pangag-ogma, kamong mga nasyon, kaiba kan saiyang banwaan.’ Asin sa giraray [sa Salmo 117:1]: ‘Pag-omaw ki Jehova, kamo gabos na nasyon, asin an gabos na banwaan mag-omaw logod sa saiya.’”—Roma 15:7-11.
11. Paano tinatabangan nin Dios an mga tawo kan gabos na nasyon na manodan an saiyang mga katotoohan, asin ano an resulta?
11 An mga tawo dai sararong makaoomaw ki Jehova kun dai ninda pasikadon an saindang paglaom ki Jesu-Cristo, an saro na ninombrahan nin Dios na mamahala sa mga tawo kan gabos na nasyon. Tanganing matabangan sinda na masabotan an Saiyang mga katotoohan na minagiya pasiring sa buhay na daing sagkod, an Dios nag-organisar nin internasyonal na programa nin pagtotokdo. Itinatao nia an paggiya paagi sa saiyang grupong fiel na oripon. (Mateo 24:45-47) An resulta? Labing limang milyon na magayagayang tingog an nag-aawit nin mga pag-omaw ki Jehova sa labing 230 kadagaan. Asin minilyon pa an nagpapaheling nin interes sa paggibo man kaiyan. Helinga kun gurano kadakol an nag-atender sa Memorial kan 1996: 12,921,933. Makangangalas!
An Sarong Dakulang Kadaklan nin Magayagayang mga Paraomaw Ihinula
12. Anong nakapupukaw sa boot na bisyon an naeksperyensiahan ni apostol Juan, asin ano an buhay na katunayan kaiyan gabos?
12 Sa bisyon, naheling ni apostol Juan “an sarong dakulang kadaklan” hale sa gabos na nasyon. (Kapahayagan 7:9) Ano an tema kan mga pag-omaw na inaawit kan dakulang kadaklan na ini kaiba an linahidan na natatada nin Dios? Sinasabi sa sato ni Juan: “Utang niato an kaligtasan sa satong Dios, na nagtutukaw sa trono, asin sa Kordero.” (Kapahayagan 7:10) Ini mapusong ipinahahayag sa gabos na parte kan kinaban. Garo baga nagwawasiwas nin mga sanga nin palma, sararo niatong irinurukyaw an Dios bilang an Unibersal na Soberano asin magayagayang itinutuga sa atubangan kan langit asin daga na “utang niato” an satong kaligtasan sa saiya asin sa saiyang Aki, an Kordero, si Jesu-Cristo. Abaang kaogmahan an naeksperyensiahan ni apostol Juan sa pakaheling kan nakapupukaw sa boot na bisyon na ini kan dakulang kadaklan! Asin kanigoan an kaogmahan niato ngonyan na maheling an, asin magin kabtang pa ngani kan, buhay na katunayan kan naheling ni Juan!
13. Ano an nagpapagin siblag kan banwaan ni Jehova sa kinaban?
13 Bilang mga lingkod ni Jehova, ipinag-oorgolyo niatong darahon an saiyang ngaran. (Isaias 43:10, 12) An satong pagigin Saksi ni Jehova ginigibo kitang napapalaen sa kinaban na ini. Kanigoan na kagayagayahan na darahon an daing kaagid na ngaran nin Dios asin magin satong katuyohan sa buhay an paggibo kan saiyang banal na gibohon! An marahayon na katuyohan ni Jehova na santipikaron an saiyang banal na ngaran asin ibindikar an saiyang unibersal na soberaniya paagi sa Kahadean nagtao nin kahulogan sa satong buhay. Asin tinatabangan nia kita na magkaigwa nin kabtang sa saiyang banal na katuyohan mapadapit sa saiyang ngaran asin Kahadean. Ini ginigibo nia sa tolong paagi.
Pinagkatiwalaan kan Katotoohan
14, 15. (a) Ano an sarong paagi na tinatabangan kita nin Dios na magkaigwa nin kabtang sa saiyang banal na katuyohan mapadapit sa saiyang ngaran asin Kahadean? (b) Paano an Kahadean na tinindog kan 1914 C.E. napapalaen sa saro na linaglag kan 607 B.C.E.?
14 Enot, ipinagkatiwala ni Jehova sa saiyang banwaan an katotoohan. An pinakamaogmang kapahayagan iyo na an saiyang Kahadean nagpoon nang mamahala kan 1914. (Kapahayagan 12:10) An langitnon na gobyernong ini laen sa tipikong kahadean sa Jerusalem, na tinukawan kan mga hade sa linya ni David. Linaglag an kahadean na idto, asin poon kan 607 B.C.E., an Jerusalem biyong napairarom sa pamamahala kan Hentil na mga kapangyarihan pankinaban. An bagong Kahadean na tinindog ni Jehova kan 1914 sarong langitnon na kapangyarihan na dai pamamahalaan nin siisay man kundi ni Jehova, ni malalaglag iyan. (Daniel 2:44) Siring man, laen an pamamahala kaiyan. Paano? An Kapahayagan 11:15 minasimbag: “Nadangog an makokosog na tingog sa langit, na nagsasabi: ‘An kahadean kan kinaban nagin nang kahadean kan satong Kagurangnan asin kan saiyang Cristo, asin sia mamamahala bilang hade sagkod lamang.’”
15 An “kahadean kan satong Kagurangnan asin kan saiyang Cristo” may autoridad sa bilog na kinaban nin katawohan. An bagong kapahayagan na ini kan soberaniya ni Jehova, na kabale an saiyang Mesiyanikong Aki asin an 144,000 na tugang ni Jesus, na an kadaklan binuhay liwat na ngonyan sa langitnon na kamurawayan, bakong banabana sana—sarong bagay na teoretiko na tibaad gustong pag-orolayan nin mga estudyante. Dai, an langitnon na Kahadean na ini sarong tunay na gobyerno. Asin an satong maogmang paglaom na mabuhay sagkod lamang sa pagkasangkap bilang resulta kan pamamahala kaiyan nagtatao sa sato nin igong dahelan na padagos na maggayagaya. An pagigin pinagkatiwalaan kan siring na mga katotoohan kan Tataramon ni Jehova pinahihiro kita na perming omawon iyan. (Salmo 56:10) Regular daw na ginigibo nindo ini paagi sa pagsabi sa gabos na an Mesiyanikong Kahadean nin Dios namamahala na ngonyan sa kalangitan?
Tinatabangan kan Banal na Espiritu Asin nin Pambilog na Kinaban na Kasararoan nin Magturugang
16, 17. Ano an ikaduwa asin ikatolong paagi na tinatabangan kita nin Dios na magkaigwa nin kabtang sa saiyang banal na katuyohan?
16 An ikaduwang paagi na tinatabangan kita nin Dios na magkaigwa nin kabtang sa saiyang banal na katuyohan iyo an pagtao sa sato kan saiyang banal na espiritu, na pinangyayari kitang paluwason sa satong buhay an magayon na mga bunga kaiyan asin kamtan an saiyang pag-oyon. (Galacia 5:22, 23) Dugang pa, sinuratan ni Pablo an linahidan na mga Kristiano: “Inako niato . . . an espiritu na gikan sa Dios, tanganing maaraman niato an mga bagay na mabooton na itinao sa sato nin Dios.” (1 Corinto 2:12) Paagi sa satong paghimate sa espiritu ni Jehova, kita gabos puede na ngonyan na makaaram asin makasabot sa marahay na mga bagay sa presente na mabooton na itinao nia sa sato—an saiyang mga panuga, ley, prinsipyo, asin iba pa.—Ikomparar an Mateo 13:11.
17 Kun dapit sa ikatolong paagi na tinatabangan kita nin Dios, yaon sa sato an pambilog na kinaban na kasararoan nin magturugang asin an nakaoogmang organisasyonal na areglo ni Jehova para sa pagsamba. Si apostol Pedro nagtaram manongod dian kan pakasadolon nia kita na ‘mamoot sa bilog na kasararoan nin mga tugang.’ (1 Pedro 2:17) An satong mamomoton, internasyonal na pamilya nin mga tugang na lalaki asin babae nakatatabang sa sato na paglingkodan si Jehova na may dakulang kagayagayahan sa puso, siring sa ipinagboboot kan Salmo 100:2: “Maglingkod kamo ki Jehova na may paggayagaya. Umatubang kamo sa saiya na may magayagayang kurahaw.” An bersikulo 4 nagsasabi pa: “Lumaog kamo sa saiyang mga tata na may pagpasalamat, sa saiyang mga patyo na may pag-omaw. Magpasalamat kamo sa saiya, omawa nindo an saiyang ngaran.” Kaya baga man kita naghuhulit sa publiko o nag-aatender sa satong mga pagtiripon, maeeksperyensiahan ta an kagayagayahan. Kanigoan na katoninongan asin katiwasayan an nanompongan ta sa magayon na mga patyo kan espirituwal na templo ni Jehova!
Magayagayang Omawon si Jehova!
18. Taano ta makagagayagaya kita sa pag-omaw ki Jehova sa ibong nin paglamag o iba pang mga problema na dumatong sa sato?
18 Ano man na masakit na mga kamugtakan, paglamag, o iba pang mga problema an dumatong sa sato, maggayagaya kita na kita nasa harong nin pagsamba ni Jehova. (Isaias 2:2, 3) Girumdomon na an kagayagayahan na iyan sarong kualidad kan puso. An satong enot na Kristianong mga tugang na lalaki asin babae magayagayang mga paraomaw ki Jehova sa ibong kan dakol na kasakitan asin kapierdihan na inagihan ninda. (Hebreo 10:34) An satong mga kapagtubod ngonyan kapareho man ninda.—Mateo 5:10-12.
19. (a) Anong paorootrong mga pagboot an nagpapahiro sa sato na omawon si Jehova? (b) An satong buhay na daing sagkod minadepende sa ano, asin ano an satong determinasyon?
19 Kita gabos na naglilingkod ki Jehova naoogmang kuyogon an mga pagboot kan Biblia na omawon sia. An librong Kapahayagan paorootrong sinasaliotan an mga pag-omaw sa Dios kan ekspresyon na “Omawa nindo si Jah!” (Kapahayagan 19:1-6) Sa anom na bersikulo kan Salmo 150, 13 beses kitang sinasabihan na omawon si Jehova. Ini sarong lakop sa unibersong pakiolay sa gabos na linalang na umiba sa magayagayang pag-awit nin pag-omaw ki Jehova. An satong buhay na daing sagkod minadepende sa satong pakikiiba sa dakulang koro na ini nin Aleluya! Iyo, an solamenteng mga tawo na mabubuhay sagkod lamang iyo an mga nagtatao nin daing ontok na pag-omaw ki Jehova. Kun siring, determinado kitang magdanay na dayupot sa saiyang maimbod na pambilog na kinaban na kongregasyon mantang naghaharani an katapusan. Dangan, makalalaom kitang maheling na biyong naootob an pantapos na mga tataramon sa Salmo 150: “An lambang bagay na naghahangos—mag-omaw iyan ki Jah. Omawa nindo si Jah, banwaan!”
Ano an Isisimbag Nindo?
◻ Ano an minagibo sa banwaan ni Jehova na napapalaen, daing kaagid?
◻ Taano ta magayagayang marhay an mga lingkod ni Jehova?
◻ Ano an nagpapagin siblag sa sato sa kinaban?
◻ Sa anong tolong paagi tinatabangan kita nin Dios na magkaigwa nin kabtang sa saiyang banal na katuyohan?
[Retrato sa pahina 17]
Saen man sia, si Jesus nagpatotoo dapit ki Jehova asin hayag na nag-omaw sa saiya