Si Jehova Maninigo Nanggad na Omawon

An Pamanggihan nin Kagurangnan Seselebraron sa Abril 16

¹ Nag-oorog an pag-antisipar mantang kita nagdadangadang sa Abril 16, 2003. Sa bangging iyan gigirumdomon niato an kagadanan ni Jesus, kaiba kan minilyon na kapwa niato parasamba sa bilog na kinaban sa pagpamuraway kan ngaran ni Jehova. Angay na itao ki Jehova an gabos niatong pag-omaw huli sa marahayon na probisyon na pantubos. Paagi kaiyan, matao sia nin marahayon na mga bendisyon sa gabos na makinuyog na tawo. Bilog na puso kitang minaiba sa salmista sa pagkagsing: “Si Jehova dakula asin maninigo nanggad na omawon.”​—Sal. 145:3.

² Ini panahon para sa paghorophorop kan karahayan nin Dios asin kan utang na boot niato ki Jehova huli sa pagsugo kan “saiyang Aking bugtong sa kinaban tanganing kita magkamit nin buhay paagi sa saiya.” (1 Juan 4:​9, 10) Itinutudok sa satong puso kan makinuyog na pagselebrar kan Pamanggihan nin Kagurangnan na “si Jehova maugayon asin maheherakon . . . asin dakulaon sa mamomoton na kabootan.” (Sal. 145:8) Tunay nanggad, an pantubos an pinakadakulang kapahayagan kan pagkamoot ni Jehova sa bilog na katawohan. (Juan 3:16) Kun iniisip-isip niato an pagkamoot nin Dios asin hinohorophorop niato an fiel na iginawe ni Jesus na may integridad, napahihiro kitang omawon si Jehova. Sa bilog na panahon na daing sagkod, oomawon niato sia huli sa saiyang daing sagkod na pagkamoot na ipinahayag sa pagpangyaring magin posible para sa sato an buhay na daing katapusan.​​—Sal. 145:​1, 2.

³ Tabangan an Iba na Omawon si Jehova: An pag-apresyar sa labi sa gabos na balaog nin Dios na pantubos nagpapahiro sa sato na imbitaran an iba na umiba sa sato sa pag-omaw ki Jehova. Pinasabngan an salmista na sumurat: “Sa pagsambit kan abundansia kan saimong karahayan sinda magsusulwak, asin huli sa saimong katanosan sinda magayagayang magkukururahaw.” (Sal. 145:7) Kan nakaaging taon sana, an Mga Saksi ni Jehova sa bilog na kinaban nagdusay nin labing sarong bilyon na oras sa paghuhulit. Ano an ibinunga kan saindang mga paghihingoa? Kada semana, may promedyo na labing 5,100 na indibiduwal an nababautismohan bilang simbolo kan saindang pagdusay ki Jehova. Huli sa total na 15,597,746 na nag-atender sa Memorial, kaiba an labing 9 milyones na dai pa nagpoon na mag-omaw ki Jehova bilang mga parahayag kan maogmang bareta, dakula an potensial para sa dugang pang pag-oswag! Bilang mga parabalangibog kan Kahadean, mahal niato an satong pribilehio na ipahayag an maogmang bareta asin giyahan an puso kan iba pasiring ki Jehova, sa saiyang Aki, asin sa Kahadean.

⁴ An sarong marahay na paagi na enkaminaron an iba na magtaong onra ki Jehova iyo an pag-imbitar sa sainda na umiba sa sato sa pagselebrar kan Pamanggihan nin Kagurangnan. Naggibo na daw kamo nin lista kan gabos na boot nindong imbitaran saka kan iba na tibaad nangangaipong pagirumdomon kan aldaw asin oras? Tinawan na daw nindo nin imbitasyon an gabos na nasa lista nindo? Kun dai pa, maigot na imbitaran sinda sa natatada pang panahon. Tabangan sindang masabotan an katuyohan kan selebrasyon. Sa selebrasyon, magin listo na taratarahon an mga bisita. Ipamate sa sainda an maogmang pag-ako, ipamidbid sinda sa iba, asin omawon sinda sa pagigin presente ninda.

⁵ An pag-atender sa Memorial puedeng makapukaw sa mga bagohan na umoswag sa espirituwal. An sarong inaadalan sa Biblia na igwa nin posttraumatic stress disorder, na dahelan kaya depisil na marhay para sa saiya na magduman sa pampublikong mga lugar, nag-atender sa Memorial. Kan hapoton kun ano an opinyon nia manongod sa pagtiripon, sia nagsabi: “Idto banal na marhay na banggi, asin yaon ako duman.” Poon kaidto, nagpoon na siang umatender sa mga pagtiripon.

⁶ Pakatapos kan Memorial: Ano an magigibo tanganing matabangan an mga interesadong ini na magin paraomaw ki Jehova? Tatawan nin atension kan kamagurangan an mga bagohan na nag-atender sa Memorial asin magibo sinda nin mga areglo na dalawon tolos an mga ini nin kualipikadong mga parahayag tangani na repasohon an nakarerepreskong mga bagay na nanodan asin naobserbaran ninda. An nagkapira tibaad gustong magkaigwa nin pag-adal sa Biblia. Maninigo man sindang imbitaran na umatender sa gabos na semanal na pagtiripon kan kongregasyon, huling an regular na pag-atender makadadagdag sa saindang kaaraman sa Biblia.

⁷ May ginigibong mga areglo tangani na enkaminaron an gabos na iregular asin inaktibo na umatender nin regular sa mga pagtiripon. Kun kaolayon kamo kan kamagurangan na tabangan an sarong nagin inaktibo na makikabtang giraray sa paglilingkod sa langtad, magin andam na humiro. An pagpaheling nin siring na mamomoton na pagmalasakit sa satong mga tugang kaoyon kan sadol ni apostol Pablo: “Mantang igwa kita nin marahayrahay na panahon para kaiyan, gumibo kita kan marahay sa gabos, alagad orog na sa mga may relasyon sa sato sa pagtubod.”​—Gal. 6:10.

⁸ Logod na kita gabos gumibo nin espesyal na paghihingoa na magin presente sa Memorial sa Abril 16. Habo niatong malipasan an pinakasagradong okasyon na ini na omawon si Jehova. Iyo, ngonyan asin sagkod lamang, omawon niato si Jehova huli sa saiyang dakulang mga gibo!​—Sal. 145:21.