“Padagos na Gibohon Nindo Ini sa Paggirumdom sa Sako”
Gigirumdomon an Kagadanan ni Jesus sa Abril 2
1. Taano ta importanteng petsa an Abril 2, 2007?
1 Sa Abril 2, 2007, minilyon na tawo sa bilog na kinaban an magtitiripon tangani na girumdomon an sakripisyong kagadanan ni Jesus. Nagadan si Jesus bilang parasuportar sa soberaniya kan saiyang langitnon na Ama, na nagtataong prueba na falso an sahot ni Satanas na Diablo na an mga tawo naglilingkod sa Dios huli sana sa maimot na mga motibo. (Job 2:1-5) An Pamanggihan nin Kagurangnan nagpapagirumdom man sa sato na paagi sa saiyang kagadanan bilang sangkap asin daing kasalan na tawo, ‘itinao ni Jesus an saiyang kalag bilang pantubos na karibay nin dakol.’ (Mat. 20:28) Kun siring, pinagbotan ni Jesus an saiyang mga disipulo: “Padagos na gibohon nindo ini sa paggirumdom sa sako.” (Luc. 22:19) An pag-apresyar daw sa mahalagang marhay na regalong ini nin Dios nagpahiro sa saindo na pumoon nang gumibo nin mga pag-andam tangani na girumdomon an daing kabaing na aktong ini nin pagkamoot?—Juan 3:16.
2. Paano niato aandamon an satong puso para sa Memorial?
2 Andamon an Saindong Puso: Paagi sa pagpensar kun ano an nangyari sa kada saro kan ultimong mga aldaw kan buhay ni Jesus bilang tawo, puede niatong andamon an satong puso para sa selebrasyon na ini kan Memorial. (Esd. 7:10) Tanganing tabangan kita digdi, an sarong iskedyul nin espesyal na babasahon sa Biblia makukua sa Pagsiyasat sa Kasuratan Aroaldaw—2007 asin sa 2007 Calendar. An nakaiskedyul na pagbasa na ini haros katimbang kan mga aldaw na an mga pangyayari may koneksion sa kagadanan ni Jesus nangyari kaoyon kan kalendaryo na ginagamit niato ngonyan. An mga aldaw asin petsa na nasasambitan sa mga pagkasaysay sa Biblia basado sa Judiong kalendaryo, na an aldaw kinukuenta poon sa pagsolnop kan saldang sagkod sa masunod na pagsolnop kan saldang. Kinonsiderar an pagkakalaen na ini sa pagkuenta asin iinoyon dian an iskedyul sa babasahon sa Biblia para sa Memorial. An pagrepaso kan siring na babasahon sa Memorial asin mapagngayongayong paghorophorop sa rarom kan pagkamoot nin Dios matabang sa sato na biyong makinabang sa selebrasyon kan Memorial.
3. Paano niato matatabangan an mga interesado asin inaktibo na makinabang sa Memorial?
3 Imbitaran an Iba na Umatender: An suplemento kan An Satong Ministeryo sa Kahadean na Pebrero iinanunsiar an sarong espesyal na kampanya tangani na imbitaran an mga tawo sa importanteng okasyon na ini. Naggibo na daw kamo nin mga areglo tangani na lubos na makikabtang sa kampanyang ini? Naggibo na daw kamo nin lista nin mga kamidbid na iimbitaran, asin pinonan na daw nindong kontakon sinda? Gumibo nin mga plano na magin presente nin mas amay sa banggi kan Memorial tangani na maogmang akoon an mga inimbitaran nindo saka an iba pang mga interesado. Bobooton nindong tumukaw kataed ninda, na sinesegurado na igwa sinda nin Biblia asin songbook. Ipamidbid sinda sa iba na nasa kongregasyon. Pagkatapos kan programa hingoahon nindo na simbagon an mga hapot ninda. Imbitaran sinda na umatender sa espesyal na pampublikong pahayag na itatao sa Abril 15. Nangorognang magigin interesado an kamagurangan na seguradohon na an mga asosyado sa kongregasyon alagad nagin inaktibo matawan nin imbitasyon sa Memorial asin espesyal na pahayag.
4. Paano niato matatabangan an mga tawo na padagos na umoswag sa espirituwal pagkatapos kan selebrasyon kan Memorial?
4 Tabangan na Umoswag an Bagong mga Interesado Asin Inaktibo: Ipapaliwanag sa halipot kan ispiker sa Memorial an alok niato na daing bayad na pag-adal sa Biblia asin eenkaminaron an bagong mga interesado na padagos na makanood manongod ki Jehova. Puede nindong gamiton an saiyang mga komento bilang basehan para sa pagtao nin dugang pang espirituwal na tabang sa mga inimbitaran nindo. Kun dai pa sinda nag-aadal sa Biblia sa presente, seguradohon na dalawon tolos sinda pagkatapos kan Memorial asin idemonstrar an daing bayad na pag-adal sa Biblia. Tanganing umoswag sa espirituwal, kaipuhan man nindang umatender sa mga pagtiripon kan kongregasyon. (Heb. 10:24, 25) Nasa isip ini, enkaminaron sinda na pumoon na umatender nin regular. An kamagurangan maninigong mag-areglo na songkoon an inaktibong mga Kristiano na nag-atender sa Memorial asin tabangan sinda na horophoropon pa an iinatubang sa diskurso. Puede ining mag-enkaminar sa sainda na ipagpadagos an saindang aktibidad sa kongregasyon.
5. Ano an puedeng magin epekto sa sato kan pagselebrar kan Memorial?
5 An selebrasyon kan Memorial nagtatao nin oportunidad na seryosong horophoropon an ginibo ni Jehova asin ni Jesus para sa sato. An siring na paghorophorop nagpapararom kan satong pagkamoot sa sainda asin nakakaapektar sa satong paggawe. (2 Cor. 5:14, 15; 1 Juan 4:11) Ngonyan na an panahon na kita asin an mga interesado pumoon nang mag-andam para sa importanteng okasyon na ini na durante kaiyan ‘ibinabalangibog niato an pagkagadan kan Kagurangnan.’—1 Cor. 11:26.