Tabangan an Iba na Makinabang sa Pantubos
An Memorial kan Kagadanan ni Cristo Seselebraron sa Abril 12
1. Ano an sarong paagi na ipinapahayag kan banwaan nin Dios an saindang pag-apresyar sa pantubos?
1 “Salamat sa Dios sa saiyang dai ikaladawan na daing bayad na balaog.” (2 Cor. 9:15) An mga tataramon na iyan angay na nagpapahayag kun ano an satong saboot manongod sa karahayan asin mamomoton na kabootan na ipinapahayag nin Dios sa saiyang banwaan paagi sa saiyang Aki, si Jesu-Cristo. An siring na pag-apresyar nangorognang magigin risang-risa mantang kita iribang nagtitiripon sa Abril 12 sa pagselebrar kan Memorial kan kagadanan ni Cristo.
2. Sairisay, kaiba kan mga lingkod ni Jehova, an nag-aatender sa selebrasyon kan Memorial, asin ano an kaipuhan nindang gibohon tanganing makinabang sa pantubos?
2 Kaiba an mga lingkod ni Jehova, mga sampulong milyon na iba pa an nag-aatender sa selebrasyon kan Memorial kada taon. Sa paggibo kaiyan, ipinapaheling kan mga bakong Saksi an pag-apresyar sa atang ni Cristo. Minsan siring, tangani na makinabang sa pantubos, kaipuhan nindang magtubod dian. (Juan 3:16, 36) Paano niato sinda matatabangan na makapatalubo nin siring na pagtubod? Durante kan panahon na ini kan Memorial, puede niato sindang enkaminaron na magkaigwa nin personal na pag-adal sa Biblia asin umatender sa semanal na mga pagtiripon kan kongregasyon. Estudyare an minasunod na mga suhestion.
3. Paano kita makakapoon nin pag-adal sa Biblia kun nag-iimbitar sa Memorial?
3 Mga Pag-adal sa Biblia: Kun iniimbitaran an mga interesado na umatender sa Memorial, taano ta dai nindo probaran na makapoon nin pag-adal sa Biblia sa sainda sa librong Itinotokdo kan Biblia? Pagmaigotan na ipaliwanag sa indibiduwal an selebrasyon kan Memorial paagi sa pagbukas sa pahina 206-8 asin pakikipag-olay kan temang “An Pamanggihan kan Kagurangnan—Sarong Selebrasyon na Nagtataong Onra sa Dios.” Puedeng mahimo nindong ipakipag-olay an impormasyon na iyan sa saro o duwang pagdalaw, tibaad bilang pag-adal sa Biblia sa may pinto. Kun natapos na nindong pag-olayan iyan, tibaad gusto niang pag-olayan an kapitulo 5, “An Pantubos—Regalo nin Dios na Nakakalabi sa Gabos.” Oras na maestablisar na an regular na pag-adal sa Biblia, bumalik asin ipakipag-olay an enot na apat na kapitulo kan libro.
4. Siisay an puede niatong ponan na adalan sa Biblia durante kan panahon na ini kan Memorial?
4 Siisay an puede niatong ponan na adalan sa Biblia na ginagamit an pamamaaging ini? Tibaad an nagkapira sa saindong mga katrabaho, kaeskuela, o kataed maoyon sa siring na pag-orolay. Puedeng dolokon kan mga tugang na lalaki an daing pagtubod na agom kan mga tugang na babae sa kongregasyon. Asin dai paglingawan an saindo mismong mga paryente na bakong Saksi. Dugang pa, bobooton niato na gumibo nin espesyal na paghihingoa na magtao nin imbitasyon sa Memorial sa mga dati aktibong nakikiasosyar sa kongregasyon. (Luc. 15:3-7) Logod na hingoahon niatong tabangan an gabos na siring na makinabang sa pantubos.
5. Paano niato maeenkaminar an mga inaadalan sa Biblia asin iba pang interesado na umatender sa semanal na mga pagtiripon kan kongregasyon?
5 Mga Pagtiripon kan Kongregasyon: An Memorial an enot na pagtiripon na inaatenderan nin dakol na inaadalan sa Biblia asin iba pang interesado. Pero, paano niato maeenkaminar sinda na makinabang sa iba pa niatong pagtiripon kan kongregasyon? An Satong Ministeryo sa Kahadean na Mayo 2005, pahina 1, itinatao an minasunod na mga suhestion: “Sambiton an titulo kan masunod na pampublikong pahayag. Ipaheling sainda an pag-aadalan sa Pag-adal sa Torrengbantayan asin sa Pag-adal sa Libro kan Kongregasyon. Sabihon kun ano an Teokratikong Paadalan sa Pagmiministro asin Pagtiripon sa Paglilingkod. Kun igwa kamo nin asignasyon sa paadalan, tibaad puede nindong ensayohon iyan kaiba ninda. Ihiras an marahayon na mga punto na iinatubang sa mga pagtiripon. Imbitaran sinda na umatender poon sa kaenot-enoteng pag-adal.”
6. Sa anong duwang paagi matatabangan niato an mga sadiosan an puso na makinabang sa pantubos?
6 Kun an mga sadiosan an puso igwa nin regular na pag-adal sa Biblia asin nag-aatender nin regular sa mga pagtiripon kan kongregasyon, sa parate sinda marikas na nag-ooswag sa espirituwal. Kun siring, logod na enkaminaron niato an iba na aprobetsaran an espirituwal na mga probisyon na ini asin makinabang sa nakakalabi sa gabos na regalo nin Dios—an pantubos.