Ipaheling Niato an Satong Pasasalamat
Iseselebrar an Memorial sa Abril 17
1. Anong saboot kan salmista an nangorognang angay na ipaheling sa panahon kan Memorial?
1 Huling napahiro kan dakol na gibo nin pagkaherak asin pagliligtas ni Jehova, an salmista naghapot: “Ano an ibabayad ko ki Jehova para sa gabos na pakinabang na itinao nia sa sako?” (Sal. 116:12) Ngonyan, mas dakol pa ngani an dahelan kan mga lingkod nin Dios na magpasalamat. Dakol na siglo pagkatapos na isurat an ipinasabong na mga tataramon na ini, itinao ni Jehova sa katawohan an pinakadakulang regalo—an pantubos. Mantang nag-aandam kita tanganing girumdomon sa Abril 17 an kagadanan ni Cristo, may marahay kitang dahelan na ipaheling an satong pasasalamat.—Col. 3:15.
2. Ano an nagkapirang dahelan na kita nagpapasalamat huli sa pantubos?
2 Mga Bendisyon Huli sa Pantubos: Paagi sa pantubos, puede kitang mag-ako kan “kapatawadan kan satong mga kasalan.” (Col. 1:13, 14) Makakatabang ini sa sato na sambahon si Jehova na may malinig na konsensia. (Heb. 9:13, 14) Puede kitang magkaigwa nin katalingkasan sa pagtaram kun kita minadolok ki Jehova paagi sa pamibi. (Heb. 4:14-16) An mga nagtutubod sa pantubos igwa nin marahayon na paglaom na buhay na daing katapusan!—Juan 3:16.
3. Paano niato puedeng ipaheling an satong pasasalamat ki Jehova huli sa pantubos?
3 Ipaheling an Pasasalamat: An sarong paagi na ipaheling an satong dakulang pasasalamat iyo an aroaldaw na pagbasa kan asignadong babasahon sa Biblia para sa Memorial asin paghorophorop kaiyan. An artikulo sa Watchtower na Pebrero 1, 2011 na may titulong “Are You Prepared for the Most Important Day of the Year?” dinisenyo tanganing tabangan kitang magibo ini. Puede man niatong sabihon ki Jehova paagi sa odok sa pusong pamimibi kun gurano kadakula kan pagpahalaga niato sa pantubos. (1 Tes. 5:17, 18) Pagpaheling nin pasasalamat an pagigin presente niato sa selebrasyon kan Memorial bilang pagsunod sa pagboot ni Jesus. (1 Cor. 11:24, 25) Dugang pa, puede tang arogon an dakulaon na pagkamoot ni Jehova paagi sa pag-imbitar sa pinakadakol na tawo na mapupuede na umiba sa sato sa pag-atender.—Isa. 55:1-3.
4. Ano an maninigong magin determinasyon niato?
4 Dai mamansayon nin mapagpasalamat na mga lingkod ni Jehova an selebrasyon kan Memorial bilang saro sanang pagtiripon. Iyan an pinakaimportanteng pagtiripon kan taon! Mantang nagrarani an Memorial, an determinasyon logod niato magin arog kan sa salmista na nagsurat: “Omawa si Jehova, O kalag ko, asin dai mo paglingawan an gabos na ginibo nia.”—Sal. 103:2.