May Pagpahalagang Paggirumdom sa Pantubos
1, 2. Taano ta maninigo niatong may pagpahalagang girumdomon an pantubos?
1 Bilang pagkuyog sa pagboot ni Jesus, an mga Kristiano sa bilog na kinaban matiripon pakasolnop kan saldang sa Sabado, Marso 22, 2008, tanganing girumdomon an kagadanan ni Jesu-Cristo. (Luc. 22:19; 1 Cor. 11:23-26) Napapahiro kita na gibohon iyan huli sa hararom na pagpahalaga sa gabos na nagibo sa petsang iyan 1,975 taon na an nakaagi. Sa pagpadanay nin sangkap na integridad paagi sa makolog na kagadanan sa hariging pasakitan, pinakangbanal ni Jesus an ngaran kan saiyang Ama, na nagtatao kan pinakamarahay na simbag sa mga pagduhagi ni Satanas.—Job 1:11; Tal. 27:11.
2 An pinabolos na dugo ni Jesus nagpagin balido sa bagong tipan, na pinapangyayari na an bakong sangkap na mga tawo amponon bilang mga aki nin Dios na may paglaom na mamahala kaiba ni Cristo sa saiyang langitnon na Kahadean. (Jer. 31:31-34; Mar. 14:24) Apuera kaini, an rarom kan pagkamoot nin Dios sa katawohan malinaw na naheling kan itao nia an saiyang namomotan na marhay na Aki bilang atang, siring kan ipinaliwanag mismo ni Jesus ki Nicodemo.—Juan 3:16.
3. Paano makikinabang an mga maatender sa Memorial?
3 Imbitaran an Iba: Isinuherir kan Enero na isyu kan An Satong Ministeryo sa Kahadean na ilista niato an mga kamidbid niato asin personal na imbitaran an kada saro sa sainda. Nakapoon na daw kamong mag-imbitar sa mga ilinista nindo? Inaareglo na daw nindo na makikabtang nin lubos sa kampanya na mapoon sa Marso 1 tanganing mangimbitar sa Memorial? An mga maatender makakadangog nin sono sa Kasuratan na impormasyon na makakapatalubo nin pagtubod sa pantubos, na iyo an naggigiya pasiring sa buhay na daing katapusan.—Roma 10:17.
4. Taano ta maninigo kitang mag-abot nin amay sa Memorial?
4 An gabos na nasa kamugtakan maninigong magplano na umabot nin amay tanganing maogmang akoon an mga mahimate sa espesyal na imbitasyon. Huli sa dakulang bilang nin mga nag-aatender sa Memorial, mahalagang marhay na asikasohon nanggad niato an mga bagohan saka an iba pa na nag-aatender kun minsan sa mga pagtiripon.
5. Paano nindo puedeng andamon an saindong puso para sa okasyon na ini?
5 Andamon an Saindong Puso: An Pagsiyasat sa Kasuratan Aroaldaw—2008 asin an 2008 Calendar igwa nin iskedyul kan espesyal na babasahon sa Biblia para sa Memorial, na mapoon sa Marso 17. An pag-isip-isip dapit sa mahalagang mga nangyari durante kan ultimong mga aldaw kan buhay ni Jesus digdi sa daga makakatabang sa saindo na andamon an saindong puso para sa selebrasyon kan Memorial. (Esd. 7:10) An mapagngayongayong paghorophorop sa mga pagkasaysay na ini sa Biblia mapararom kan saindong pagpahalaga sa pagkamoot ni Jehova asin kan saiyang Aki sa pagtao kan pantubos.—Sal. 143:5.
6. Ano an magigin epekto sa sato kan pagpatalubo niato nin pagpahalaga sa pantubos?
6 Mantang nagdadangadang an Memorial, logod na maingat niatong andamon an satong sadiri asin an iba para sa mahalagang okasyon na ini. An may pagpahalagang paggirumdom sa pantubos mapakosog kan satong relasyon ki Jehova asin sa saiyang Aki. (2 Cor. 5:14, 15) Mapahiro man iyan sa sato na arogon sinda sa pagpaheling nin mapagsakripisyong pagkamoot sa iba.—1 Juan 4:11.