Mga Imbitasyon sa Memorial na Ididistribwir sa Bilog na Daga!
1. Anong espesyal na kampanya sa bilog na daga an nakaplanong gibohon bago an Memorial?
1 “Padagos na gibohon nindo ini sa paggirumdom sa sako.” (Luc. 22:19) Bilang pagkuyog sa pagboot na ini ni Jesus, an mga parasamba ki Jehova matiripon kaiba an mga interesado sa Marso 30, 2010, tanganing girumdomon an kagadanan ni Jesus. Sarong espesyal na imbitasyon para sa Memorial an ididistribwir sa bilog na daga poon Marso 13 sagkod Marso 30.
2. Paano niato puedeng itao an imbitasyon?
2 Kun Paano Iyan Gigibohon: Puede nindong itao an imbitasyon sa kagharong tanganing maheling nia an retrato sa atubangan, dangan sabihon: “Sa banggi nin Marso 30, minilyon sa bilog na kinaban an matiripon tanganing girumdomon an kagadanan ni Jesus. Nagdigdi ako tanganing itao sa saindo asin sa pamilya nindo an imbitasyon na ini sa pag-atender. Puede man nindong iiba an saindong mga katood. Nakalaag na tabi digdi an oras asin lugar kan selebrasyon na ini.” Depende sa mga kamugtakan, tibaad gusto nindong basahon sa Biblia an Lucas 22:19 tanganing idoon an pagboot na iyan na sono sa Kasuratan. Minsan siring, girumdomon na huling limitado an satong panahon sa pagdistribwir sa bilog na teritoryo, pinakamarahay na gibohon na halipot an presentasyon.
3. Sairisay an puede niatong imbitaran?
3 Kun dakula an teritoryo kan saindong kongregasyon, tibaad sabihan kamo kan kamagurangan na iwalat an mga imbitasyon sa mga harong na mayo nin tawo sa enot nindong pagdalaw. Kun angay, ialok an mga magasin kaiba kan imbitasyon. Seguradohon na imbitaran an saindong mga dinadalaw liwat, inaadalan sa Biblia, katrabaho, kaeskuela, paryente, kataed, asin iba pang kamidbid.
4. An pagpahalaga sa pagkamoot ni Jehova sa pagtao kan pantubos mapahiro sa sato na gibohon an ano?
4 Mag-andam na Makikabtang nin Lubos: An panahon nin Memorial marahayon na oportunidad tanganing dugangan an satong aktibidad. Puede daw nindong areglaron an saindong iskedyul tanganing makapag-auxiliary payunir? May mga aki daw kamo o inaadalan sa Biblia na nag-ooswag sa espirituwal? Kun igwa, dumolok sa kamagurangan tanganing maaraman kun an mga bagohan na iyan kualipikado nang umiba sa espesyal na kampanyang ini bilang dai pa bautisadong parahayag. An pagpahalaga sa pagkamoot ni Jehova sa pagtao kan pantubos mapahiro sa sato na magin presente sa Memorial saka mag-imbitar nin pinakadakol na tawong mapupuede na umiba sa sato sa pag-atender.—Juan 3:16.