An Kampanya sa Pagpaisi kan Memorial Mapoon sa Marso 17
1. Anong kampanya an mapoon sa Marso 17?
1 An kagadanan ni Jesus ikinakabalangibog paagi sa pagselebrar kan Memorial kada taon. (1 Cor. 11:26) Kun siring, gusto niato na an iba mag-atender kaiba niato tanganing madangog an manongod sa mamomoton na balaog ni Jehova na pantubos. (Juan 3:16) Ngonyan na taon, an satong kampanya sa pag-imbitar para sa Memorial mapoon sa Sabado, Marso 17. Inaantisipar na daw nindo an lubos na pakikikabtang dian?
2. Ano an puede tang sabihon kun itinatao an imbitasyon?
2 Kun Ano an Puede Tang Sabihon: Pinakamarahay kun halipot sana an presentasyon. Puede tang sabihon: “Kumusta? Nagdigdi kami tanganing itao sa pamilya nindo an imbitasyon na ini para sa sarong importanteng taonan na selebrasyon na gigibohon sa bilog na kinaban sa Abril 5. Magkakaigwa nin daing bayad na pahayag basado sa Biblia na magpapaliwanag kun ano an nagin epekto kan kagadanan ni Jesus asin kun ano an ginigibo nia ngonyan. Maheheling sa imbitasyon na ini an adres asin oras kan pagtiripon na gigibohon sa satong lugar.” Kun nagdidistribwir nin imbitasyon sa katapusan kan semana, maninigo man niatong ialok an mga magasin kun angay.
3. Paano niato iimbitaran an pinakadakol na mapupuede?
3 Imbitaran an Pinakadakol na Mapupuede: Iyan an pasohan niato. Kaya, seguradohon na imbitaran an saindong mga tinotokdoan sa Biblia, dinadalaw liwat, paryente, katrabaho, kaeskuela, kataraed, asin iba pang kamidbid. An mga elder sa saindong kongregasyon matao nin instruksion kun paano kokobrehan an teritoryo nindo. Nagigin mabunga an satong taonan na kampanya sa pag-imbitar para sa Memorial. Kan nakaaging taon, pagkalaog nin sarong babae sa auditoryum, sarong attendant an nagdolok tanganing tabangan siang hanapon an parahayag na nag-imbitar sa saiya. Minsan siring, sinabi kan babae na mayo sia nin kamidbid duman asin na tinawan sia nin imbitasyon nin saro na naghaharongharong kan aldaw man sanang idto.
4. Ano an mga dahelan kun taano ta dapat makikabtang nin maigot sa kampanya?
4 Tibaad makaatender sa Memorial an saro na tinawan nindo nin imbitasyon. Mag-atender man sia o dai, magigin patotoo pa man giraray an maigot nindong paghihingoa. Ibabalangibog kan ididistribwir nindong imbitasyon na si Jesus saro nang makapangyarihan na Hade ngonyan. An maigot na pakikikabtang nindo magpapatunay sa gabos na nagmamasid—mga tawo sa teritoryo, mga kapwa parahayag, asin orog sa gabos, ki Jehova—na inaapresyar nindong marhay an balaog na pantubos.—Col. 3:15.