Espesyal na Kampanya Tanganing Ipaisi an Memorial!
1. Sa anong gibohon sa bilog na kinaban makikikabtang an mga parahayag kan Kahadean poon sa Marso 21, 2009, asin taano?
1 Sa Huebes, Abril 9, 2009, an mga nagsasamba ki Jehova Dios sa bilog na kinaban matiripon tanganing girumdomon an saiyang pinakadakulang akto nin pagkamoot sa katawohan. (Roma 5:6-8) Inaantisipar niatong marhay na minilyon na interesado an makakaibanan ta sa paggirumdom niato kan kagadanan ni Jesus. Sarong espesyal na imbitasyon para sa Memorial an ididistribwir sa bilog na kinaban poon sa Marso 21.
2. Ano an maninigo nindong isaisip kun itinatao an imbitasyon?
2 Mga Dapat Isaisip: Lubos na gamiton an mga ilustrasyon, hapot, asin an sitadong teksto na yaon sa imbitasyon. Halimbawa, puede nindong ipaheling an retrato sa atubangan asin magsabi: “Gusto kong imbitaran kamo na umiba sa samo sa paggirumdom kan kagadanan ni Jesus, na gigibohon sa Huebes, Abril 9, 2009.” Dangan, ipaheling an titulo kan imbitasyon asin an kasunod na mga hapot. Seguradohon na idoon nindo na puedeng agdahon kan kagharong an saiyang pamilya asin an siisay man na gusto niang iiba.
3. Paano nindo puedeng kultibaron an interes kan mga tinawan nindo nin imbitasyon sa pagpoon kan kampanya?
3 Kun dakula an teritoryo kan saindong kongregasyon, tibaad sabihan kamo kan kamagurangan na iwalat an mga imbitasyon sa mga harong na mayo nin tawo. Sa mga katapusan kan semana, ialok an mga magasin kaiba kan imbitasyon. Gibohon nindong pasohan na imbitaran an saindong mga dinadalaw liwat, inaadalan sa Biblia, paryente, kaeskuela, katrabaho, kataed, asin iba pang kabisto. Kan nakaaging taon, inimbitaran nin sarong tugang na babae an 30 sa mga paryente nia, dangan sa panapanahon ipinapagirumdom nia sa sainda an kahalagahan kan okasyon. Sia naogma nanggad na 25 an nag-atender, asin sa huri 4 sa sainda an nag-ako nin pag-adal sa Biblia!
4. Ano an dapat na planohon na niato ngonyan, asin taano?
4 Magplano Na Ngonyan: Dakol na parahayag an tibaad nasa kamugtakan na dagdagan an aktibidad ninda sa Marso asin Abril. Kun igwa kamo nin mga aki o inaadalan sa Biblia na nag-ooswag na, tibaad marahayon na panahon ini na sinda magin dai pa bautisadong parahayag. Ngonyan na an panahon na gumibo nin mga areglo na lubos na makikabtang sa kampanyang ini na nagpapaisi kan paggirumdom sa duwang pinakadakulang kapahayagan nin pagkamoot.—Juan 3:16; 15:13.