Pagpaheling nin Pasasalamat sa Pinakanangongorog na Regalo nin Dios

1. Taano ta kita nangorognang nagpapasalamat ki Jehova?

¹ Sa kadakol na ‘marahay na regalo’ ni Jehova, an pantubos na itinao kan saiyang namomotan na Aki iyo an pinakanangongorog. (Sant. 1:17) Pinapagin posible kaiyan an dakol na bendisyon, kaiba an kapatawadan kan satong mga kasalan. (Efe. 1:7) Huli kaini, kita pirmeng nagpapasalamat. Sa panahon nin Memorial, kita partikularmenteng nagtatao nin oras tanganing maghorophorop dapit sa mahalagang marhay na regalong ini.

2. Paano niato mapapatalubo sa satong pamilya asin sa sato mismo an apresasyon sa pantubos?

² Pataluboon an Apresasyon: Tanganing mapatalubo an apresasyon kan saindong pamilya, sa mga semana bago an Memorial sa Marso 30, taano ta dai gamiton an oras sa banggi kan saindong Pampamilyang Pagsamba sa pagrepaso nin impormasyon dapit sa pantubos? Aroaldaw man nindong pag-olayan bilang pamilya an espesyal na babasahon sa Biblia para sa Memorial. Personal na horophoropon kun paano kamo nakikinabang sa pantubos asin kun ano an epekto kaiyan sa saindong pagmansay ki Jehova, sa saindong sadiri, sa iba, saka sa ngapit. May bentaha man kun papraktison nindong awiton an duwang bagong kanta na gagamiton sa Memorial, an bilang 8 asin 109.—Sal. 77:12.

3. Paano niato puedeng ipaheling an satong pasasalamat?

³ Pagpaheling nin Pasasalamat: An apresasyon sa pantubos nagpapahiro sa sato na sabihon sa iba an manongod ki Jehova asin sa dakulang pagkamoot nia sa pagsugo sa saiyang aki. (Sal. 145:2-7) Sa mga bulan nin Marso, Abril, asin Mayo, ipinapaheling nin nagkapirang pamilya an saindang pasasalamat paagi sa pag-areglo na makapag-auxiliary pioneer an kisiera sarong miembro kan pamilya. Kun bako ining posible, puede daw nindong ‘bakalon an panahon’ tanganing madagdagan an saindong pakikikabtang sa ministeryo? (Efe. 5:16) An pasasalamat mamotibar man sa sato na tabangan an iba na makaatender sa Memorial kaiba niato. (Kap. 22:17) Ponan nang ilista an mga dinadalaw liwat, inaadalan sa Biblia, paryente, katrabaho, asin kataed na iimbitaran nindo, dangan lubos na makikabtang sa espesyal na kampanya nin pag-imbitar para sa Memorial.

4. Sa anong mga paagi madonong na magagamit niato an panahon nin Memorial?

⁴ An panahon nin Memorial nagtatao nin bagong mga oportunidad tanganing patunayan ki Jehova na inaapresyar nanggad niato an saiyang regalo sa katawohan. Logod na gamiton niato an panahon na ini tanganing pataluboon asin ipaheling an satong pasasalamat sa pantubos asin sa gabos na “dai marorop na mga kayamanan kan Cristo.”—Efe. 3:8.