Pagtanaw nin Utang na Buot sa Maabot na Memoryal

1. Anong espesyal na oportunidad an itatao sa sato kan Memoryal?

¹ An Memoryal sa Abril 14 nagtatao nin espesyal na oportunidad na makamati asin magpahiling nin pagtanaw nin utang na buot sa karahayan ni Jehova. Sinasabi sa Lucas 17:11-18 kun gurano kahalaga ki Jehova asin ki Jesus an pagtanaw nin utang na buot. Makamumundo, saro sana sa naumayan na sampulong may leproso an nag-aprobetsar kan oportunidad na magpasalamat. Sa maabot na panahon, paagi sa balaog na pantubos, mawawara na an gabos na hilang asin mabubuhay kita nin daing katapusan! Siguradong papasalamatan niyato aroaldaw si Jehova sa siring na bendisyon. Pero paano ta ikakapahiling sa maabot na mga semana an satong pagtanaw nin utang na buot?

2. Paano kita makakamati nin utang na buot para sa pantubos?

² Makamati nin Utang na Buot: An pakamati nin utang na buot naggigikan sa isip. Para matabangan kitang mapahalagahan an pantubos, may ginibong iskedyul para sa espesyal na pagbasa sa Bibliya sa Memoryal. Mahihiling iyan sa apendise B12 kan rebisadong New World Translation, sa kalendaryo, asin sa Pagsiyasat sa Kasuratan Aroaldaw. Taano ta dai pag-ulayan ini bilang pamilya? Kun gigibuhon niyato iyan, urog tang mapapahalagahan an pantubos. Magkakaigwa man ini nin marahay na epekto sa satong paggawi.—2 Cor. 5:14, 15; 1 Juan 4:11.

3. Sa panahon nin Memoryal, paano niyato ikakapahiling an satong pagtanaw nin utang na buot?

³ Magpahiling nin Utang na Buot: An pagtanaw nin utang na buot nahihiling sa gibo. (Col. 3:15) Talagang hinanap si Jesus kan may leproso para magpasalamat. Siguradong maugma man niyang inistorya sa iba an milagrosong pagpaumay sa saiya. (Luc. 6:45) Mapapahiro man daw kita nin utang na buot para sa pantubos na maigot na makikabtang sa kampanya tanganing ipaisi an Memoryal? An pag-auxiliary payunir o urog na pakikikabtang sa ministeryo sa panahon nin Memoryal saro pang marahay na paagi na ikapahiling an pagpasalamat. Sa banggi kan Memoryal, papahiruon kita nin mapag-apresyar na puso na maugmang akuon an mga bisita asin magin andam na simbagon an mga hapot ninda.

4. Paano niyato iseselebrar an maabot na Memoryal na mayong pinagbabasulan?

⁴ Ultimong Memoryal ta na daw ini? (1 Cor. 11:26) Dai ta aram. Pero aram niyato na pagkalampas kaiyan, lampas na man an espesyal na oportunidad na tumanaw nin utang na buot. Aaprobetsaran mo daw iyan? Lugod na an mga tataramon kan satong nguso asin an paghurop-hurop kan satong puso makapaugma ki Jehova, an bukas-palad na Kagtao kan pantubos.—Sal. 19:14.