Makinabang sa Teokratikong Paadalan sa Pagmiministro Para sa 1996—Kabtang 3
1 Boot ni apostol Pablo na ipamibi sia kan saiyang mga tugang tanganing magkaigwa sia kan abilidad na magtaram kan maogmang bareta na may kapusoan. (Efe 6:18-20) Minamawot niato na kultibaron an kaparehong abilidad. Sa katuyohan na iyan, inaapresyar niato an tabang na itinatao kan Teokratikong Paadalan sa Pagmiministro.
2 Bilang mga estudyante, nag-aako kita nin personal na hatol na matabang sa sato na paoswagon an satong mga abilidad sa pagtaram asin pagtokdo. (Tal. 9:9) Makikinabang man kita sa paghinanyog sa hatol na inaako kan ibang estudyante, na iinaaplikar iyan sa satong sadiri. Kun nag-aandam nin asignasyon, maninigo niatong pag-adalan nin maingat an materyal tangani na masierto na tama an satong paliwanag. An pangenot na mga punto asin teksto na gagamiton niato maninigong angay sa kabilogan na tema. Kun kalabot sa asignasyon an saro pang tawo, maninigo iyan na patienot na ensayohon nin marhay. Mantang nag-ooswag kita, maninigong gumibo nin paghihingoa na magtaram nin ekstemporanyo, na ginagamit an mga nota imbes na an manuskrito.
3 An gabos na may asignasyon sa paadalan maninigong umabot nin amay, itao sa paraataman sa paadalan an saindang Speech Counsel slip, asin tumukaw harani sa enotan kan hall. Maninigong paaramon nin patienot kan mga tugang na babae an paraataman sa paadalan kun ano an saindang eksena asin kun baga matindog o matukaw sinda sa saindang kabtang. Natatabangan kaini an mga nag-aasikaso sa plataporma na andamon an gabos bago pa.
4 Pag-andam kan Asignasyon Num. 2: An katuyohan kan pagbasa sa Biblia iyo na tabangan an estudyante na paoswagon an saiyang abilidad na bumasa. Paano daw ini pinakamarahay na magigibo? An paorootrong makosog na pagbasa kan materyal iyo an pinakamarahay na paagi na magibo iyan. Tangani na manodan an kahulogan asin tamang pagpronunsiar nin ano man na bakong pamilyar na mga termino, maninigo iyan na helingon kan estudyante sa sarong diksionaryo.
5 Nagtatao nin tabang an New World Translation sa pagpronunsiar nin mga ngaran asin bakong pamilyar na mga termino na yaon sa Biblia. Ginigibo ini kaiyan paagi sa pagbangabanga kaiyan sa mga silaba asin pagbugtak nin mga karit. (Helingon an “All Scripture Is Inspired of Cod and Beneficial,” pahina 325-6, parapo 27-8.) Sa parate an silabang sinusundan kan karit may orog na pagdodoon. Kun an silabang may karit nagtatapos sa sarong bokal halawig an pagpronunsiar sa bokal na iyan. Kun an silaba nagtatapos sa sarong konsonante, an bokal sa silabang iyan halipot. (Ikomparar an Sa’lu sa Sal’lu.) Tangani na matabangan sinda sa pag-andam para sa saindang mga asignasyon na pagbasa sa Biblia, may mga tugang na lalaki na naghihinanyog sa mga audiocassette kan Sosyedad.
6 Puedeng tabangan kan mga magurang an saindang saradit na aki sa pag-andam kan asignasyon na pagbasa. Puedeng kabale digdi an paghinanyog kun an aki nag-eensayo dangan pagtao sa saiya nin nakatatabang na mga suhestion para sa pag-oswag. An itinalaan na oras nagtotogot para sa sarong halipot na introduksion asin tama sanang konklusyon na iinaaplikar an pangenot na mga punto. Sa siring napatatalubo kan estudyante an saiyang abilidad na magtaram nin ekstemporanyo.
7 Mapagngayongayong nag-arang an salmista: “O Jehova, bukahon mo logod an mga ngabil kong ini, tanganing an sakong ngoso magbalangibog kan saimong kaomawan.” (Sal. 51:15) An sato logod na pakikikabtang sa Teokratikong Paadalan sa Pagmiministro makatabang sa sato na panigoan an kaparehong pagmawot na ini.