Darahon an Atension sa “Liwanag kan Kinaban”

1. Anong dakulang liwanag an ihinula sa Tataramon nin Dios, asin anong okasyon an nagdadara nin espesyal na atension sa liwanag na ini?

¹ Paagi ki propeta Isaias, ihinula ni Jehova: “An banwaan na naglalakaw sa kadikloman nakaheling nin dakulang liwanag. Kun manongod sa mga nag-eerok sa daga nin mahibog na kadikloman, an liwanag mismo suminirang sa sainda.” (Isa. 9:2) An “dakulang liwanag” na iyan naheling sa mga ginibo kan Aki mismo nin Dios, si Jesu-Cristo. An saiyang paghuhulit mantang yaon digdi sa daga asin an mga pakinabang na bunga kan saiyang atang nakaparahay sa kamugtakan kan mga dating nasa espirituwal na kadikloman. An siring na liwanag an kaipuhan kan mga tawo sa madiklom na mga panahon na ini. An Pamanggihan nin Kagurangnan nagtatao nin espesyal na oportunidad para sa sato na darahon an atension kan mga tawo sa “liwanag kan kinaban.” (Juan 8:12) Kan nakaaging taon, minilyon na bakong Saksi an nagpaheling nin sarong sokol nin pagtubod paagi sa pag-iba sa sato sa pagkuyog kan pagboot ni Jesus: “Padagos na gibohon nindo ini sa paggirumdom sa sako.” (Luc. 22:19) Mantang nagdadangadang na an selebrasyon kan Memorial ngonyan na taon, paano kita makakapakikabtang sa pagdara nin atension sa dakulang liwanag na pinasirang ni Jehova?—Fil. 2:15.

2. Paano niato mapapakosog an satong odok sa pusong pagpapahalaga sa atang na pantubos, asin ano an magigin epekto kan paggibo kaiyan?

² Pataluboon an Odok sa Pusong Pagpapahalaga: An panahon kan Memorial sarong tamang-tamang panahon na maghorophorop manongod sa dakulang pagkamoot na ipinaheling ni Jehova asin ni Jesus sa pagtao kan atang na pantubos para sa katawohan. (Juan 3:16; 2 Cor. 5:14, 15) An paggibo kaiyan daing duwa-duwa na papakosogon an satong odok sa pusong pagpapahalaga para sa sagradong okasyon na ini. Bobooton kan bilog na banwaan nin Dios na magtagama nin panahon na basahon asin horophoropon an espesyal na babasahon sa Biblia para sa Memorial, na yaon sa Pagsiyasat sa Kasuratan Aroaldaw. An pag-isip-isip kan daing kaagid na mga kualidad ni Jehova, na mamuraway nanggad na ihinayag sa saiyang probisyon na pantubos, pinapangyayari kitang mag-orgolyo na sia an satong Dios. An paghorophorop sa kun ano an kahulogan kan pantubos para sa sato personalmente, nagpapakosog sa satong odok sa pusong pagkamoot sa Dios asin sa saiyang Aki patin nagmomotibar sa sato na maghingoa sa paggibo kan kabotan nin Dios.—Gal. 2:20.

3. Paano niato ikakapaheling an satong pagpapahalaga sa Memorial?

³ Kun papararomon niato an satong pagpapahalaga sa probisyon ni Jehova na kaligtasan, an satong entusiasmo sa Memorial makakaimpluwensia sa mga inaadalan sa Biblia, dinadalaw liwat, paryente, kataed, kaeskuela, katrabaho, asin iba pa na iimbitaran niato sa espesyal na okasyon na ini. (Luc. 6:45) Kun siring, gumibo nin espesyal na paghihingoa na imbitaran an gabos na siring kaiyan, na tinatawan sinda nin imprentadong imbitasyon sa Memorial na magseserbing sarong pagirumdom sa sainda. Tanganing dai malingawan an siisay man, nanompongan nin dakol na praktikal na pirmeng magkaigwa nin listahan kan mga regular na iniimbitaran ninda sa Memorial, na dinadagdagan iyan nin mga bagohan taon-taon. An pagkaigwa nin organisadong pamamaagi asin paggibo kan bilog niatong makakaya na imbitaran an mga interesado magigin marahay na paagi na ipahayag an satong pagpasalamat ki Jehova Dios “sa saiyang dai ikaladawan na daing bayad na balaog.”—2 Cor. 9:15.

4. Ano an makakatabang sa sato na madugangan an satong pakikikabtang sa ministeryo durante kan Marso, Abril, asin Mayo?

⁴ Dugangan an Pakikikabtang sa Ministeryo: Puede daw nindong dugangan an saindong pakikikabtang sa ministeryo durante kan Marso, Abril, asin Mayo? An paghihingoa na sabihon sa iba an “mamuraway na maogmang bareta manongod ki Cristo” seguradong bebendisyonan nin Dios. Si Jehova, bilang an Burabod kan gabos na espirituwal na kaliwanagan, nagboot: “Sumirang an liwanag hale sa kadikloman.” (2 Cor. 4:4-6) Kun praktikal, iaareglo kan kamagurangan na magkaigwa nin dagdag na oras asin lugar nin mga pagtiripon bago maglingkod sa langtad, na sinda an nangengenot sa pagsuportar sa mga parahayag na gustong mas halawig an oras nin paghuhulit. Puedeng kaiba digdi an paghuhulit sa tinampo sa amay na aga o mga areglo sa paghuhulit sa komersial na teritoryo asin paghuhulit paagi sa telepono sa hapon o amay na banggi. Bilang tabang tangani na madugangan an saindong pakikikabtang sa ministeryo, magbugtak nin rasonableng pasohan na oras, asin magmaigot na maabot iyan. Para sa dakol, kaiba sa pagtao ki Jehova kan pinakamakakaya ninda an pribilehio na mag-auxiliary payunir.—Col. 3:23, 24.

5. Paano an dakol nakikinabang sa ininaan na kahagadan na oras para sa pag-auxiliary payunir?

⁵ Puede daw Kamong Mag-auxiliary Payunir? Labi nang pitong taon ngonyan poon kan inaan an kahagadan na oras para sa pag-auxiliary payunir. An pagliliwat na ini pinagin posible para sa dakol pa na maeksperyensiahan an mga bendisyon sa paglilingkod bilang auxiliary payunir. Naprobaran na daw nindo iyan? An nagkapira ugale nang gibohon iyan kada taon. Sa dakol na kongregasyon, dakol na parahayag an iribang minalaog sa klaseng ini nin paglilingkod, asin iyan nagigin sarong kapakipakinabang na tampok na kabtang kan aktibidad kan kongregasyon durante kan taon. Makakapag-iskedyul daw kamo nin sarong magayagayang bulan nin pag-auxiliary payunir durante kan panahon kan Memorial? An Abril puedeng magin nangorognang marahay na bulan para sa nagkapira, huling iyan igwa nin limang Sabado asin limang Domingo.

6. Anong nakakaogmang mga areglo an ginibo na?

⁶ Nakaiskedyul daw an kongregasyon nindo na songkoon kan paraataman sa sirkito durante kan Marso, Abril, o Mayo? Puede kamong magkaigwa nin dagdag na bendisyon. Arog kan ipinaisi kaidto, durante kan 2006 na taon nin paglilingkod, an gabos na naglilingkod bilang auxiliary payunir durante kan bulan na an paraataman sa sirkito nagsosongko, iimbitaran na umatender sa enot na kabtang kan miting na gigibohon kaiba kan mga payunir durante kan semana kan pagsongko. Daing duwa-duwa na an nakakapakosog sa espirituwal na impormasyon na itinatao sa miting na ini matabang sa dakol na auxiliary payunir na maghingoa na magin regular payunir. Dugang pa, durante kan Marso magkakaigwa kita kan kagayagayahan na tabangan an mga tawo na manompongan an espirituwal na liwanag paagi sa bagong publikasyon na pag-aadalan na Ano Man Nanggad an Itinotokdo kan Biblia? Taano ta dai nindo gibohon na pasohan na makapoon nin pag-adal sa Biblia sa bagong librong iyan?

7, 8. (a) Ano an makakatabang sa sato na gumibo nin iskedyul sa pag-auxiliary payunir? (b) Paano makakatabang an kooperasyon kan pamilya, asin paano nakikinabang an bilog na pamilya?

⁷ Mantang ineestudyaran nindo an kahagadan na 50 oras para sa auxiliary payunir, determinaran kun anong iskedyul an matogot sa saindo na pasirangon an liwanag kan katotoohan sa laog nin mga 12 oras kada semana. Makipag-olay sa mga mapangganang nakagibo kaiyan, saka sa iba pa. Ini puedeng makaenkaminar sa sainda na umiba sa saindo. Paagi sa marahay na pagplano, nanompongan nin bautisadong mga parahayag, hoben asin gurang na, na bako man na masakiton na aboton an kaomaw-omaw na pasohan na ini. Ipamibi iyan. Dangan, kun posible, gumibo nin mga plano nindo, asin ikaogma an pag-auxiliary payunir!—Mal. 3:10.

⁸ Nanompongan nin dakol na pamilya na an koordinadong marhay na paghihingoa puedeng magpagin posible na maabot nin kisuerra sarong miembro kan pamilya an pasohan na ini. An sarong pamilya nagdesisyon na an lima gabos na bautisadong miembro magpalista bilang auxiliary payunir. An duwa pang aki na dai pa bautisado naggibo nin espesyal na paghihingoa na dugangan an saindang aktibidad. Paano nakinabang an pamilya sa paggibo nin dagdag na paghihingoa? Sinda nagsurat: “Nakakaogma nanggad na bulan iyan, asin makosog an pagmate niamo na naparigon an mga bogkos nin pamilya. Pinapasalamatan niamo si Jehova sa marahayon na bendisyon!”

9. Paano niato mapapasirang an satong liwanag durante kan panahon na ini kan Memorial?

⁹ Magigin nakakapahiro daw an satong espesyal na aktibidad durante kan Marso, Abril, asin Mayo, na orog kitang irinarani sa satong langitnon na Ama? An kapangganahan madependeng marhay sa personal na paghihingoa niato na pakosogon an satong pagkamoot sa Dios asin sa saiyang Aki patin dugangan an satong pakikikabtang sa ministeryo. Logod na an desisyon niato magin arog kan sa salmista, na nag-awit: “Oomawon kong gayo si Jehova paagi sa sakong ngoso, asin sa tahaw nin dakol na tawo oomawon ko sia.” (Sal. 109:30) Bebendisyonan ni Jehova an satong maigot na aktibidad sa panahon na ini kan Memorial. Kaya pasirangon logod niato an dakulang liwanag tanganing dakol pa an makaluwas sa kadikloman asin ‘magkaigwa kan liwanag nin buhay.’—Juan 8:12.