Hanapon Nguna an Kahadean nin Dios—Paagi sa Danay na Pagtao nin mga Atang nin Pag-omaw
1 An mga naghahanap nguna kan Kahadean danay na nagtataram dapit ki Jehova asin sa saiyang Kahadean. (Sal. 145:11-13) Aroaldaw igwa nin mga oportunidad na magtaram manongod sa maogmang bareta. (Sal. 96:2) Ipinahayag kan salmista: “Sa Dios kita matao nin pag-omaw sa bilog na aldaw.” (Sal. 44:8) Kun siring man an satong namamatean, magigin kitang galagang makikabtang nin regular sa ministeryo sa Kahadean.
2 Si Jehova dai nagtalaan nin espisipikong mga kahagadan sa kun gurano kadakol na oras an maninigo niatong gamiton sa ministeryo, pero pinakokosog nia kita na “danay” na mag-omaw sa saiya. (Heb. 13:15) Kun itinotogot kan satong mga kamugtakan, maninigo niatong gibohon na pasohan na gumamit nin nagkapirang oras kada semana sa pag-omaw ki Jehova. An mga naggigibo na kaiyan puwedeng makapaglingkod bilang auxiliary payunir paminsanminsan o regular pa ngani. An iba na naglilingkod bilang auxiliary payunir puwedeng makapalista bilang regular payunir.
3 Posible daw para sa sato na dugangan an satong atang nin pag-omaw? An kaigotan pinahihiro nin pagpahalaga. An personal na pag-adal sa Tataramon nin Dios kinukultibar an pagpahalaga. An mga pagtiripon sa kongregasyon minomotibar kita na ipahayag an pagpahalagang iyan sa praktikal na mga paagi. An dayupot na pakikiasosyar sa iba pang maigot na mga paraomaw puwedeng ‘makadagka sato sa marahay na mga gibo.’ (Heb. 10:24) Paagi sa lubos na pag-aprobetsar sa mga probisyon na ini, puwede niatong madugangan an satong atang nin pag-omaw.
4 An propetisang si Ana nagtao nin marahay na halimbawa sa paglilingkod ki Jehova. Minsan ngani 84 anyos na, sia “dai noarin man nagpapalta sa templo, na naggigibo nin banal na paglilingkod banggi-aldaw.” (Luc. 2:37) An saiyang bilog na kalag na pakikiiba sa mga aktibidad sa kongregasyon nagtatao nin pagpapakosog para sa sato ngonyan.
5 Irinekomendar ni Pablo na an mga “makosog maninigong magpasan kan mga kaluyahan kaidtong mga bakong makosog.” (Roma 15:1) Posibleng igwa nin nagkapira sa saindong kongregasyon na makikinabang sa saindong maboot na pagtabang asin pagpapakosog. An sarong parahayag tibaad kaipuhan nin transportasyon o saro na makakaiba. Sa saro pa an pagkadisganar puwedeng sarong problema, asin puwedeng makapagtao kamo nin nakakapakosog na pagsuportar tanganing ikabalik an kaigotan kan saro sa paglilingkod sa Kahadean.—1 Tes. 5:14.
6 Imposibleng sambiton an gabos na bagay na ginibo na asin gigibohon pa ni Jehova para sa sato. Mayong paagi na mababayadan niato sia para sa mga bendisyon na ini. Kun siring igwa nin mapuwersang mga dahelan tanganing ‘an lambang bagay na naghahangos mag-omaw ki Jehova!’—Sal. 150:6.