Ngonyan Na an Panahon
1 Kan isurat ni apostol Pablo an saiyang ikaduwang surat sa mga taga-Corinto, pinagirumdom nia sinda na nagdesisyon sindang gumibo nin marahay na gibo sa kapakanan kan saindang mga kapagtubod sa Jerusalem. Minsan siring, sarong taon na an uminagi, asin dai pa ninda natatapos an gibohon na pinonan. Kaya dinagka nia sinda: “Ipadagos asin taposon iyan: magin siring kagalaga na tapuson an paagi mantang dapat nindong arogon iyan.”—2 Cor. 8:11, The New English Bible.
2 Sa saro o iba pang panahon, kita gabos nagbugtak nin mga pasohan para sa satong sadiri. Puwedeng nagdesisyon kitang dugangan an satong pakikikabtang sa ministeryo sa langtad, mamidbid nin marhay an satong mga tugang, makuwalipikar sa sarong pribilehiyo nin paglilingkod, o mapangganahan an sarong kaluyahan. Maski ngani nagpoon kita na igwa nin mararahay na intension, tibaad dai kita nakapadagos sagkod na matapos tanganing maabot an satong pasohan. Bago niato narealisar iyan, luminihis na an mga semana, bulan, o taon pa ngani na mayo kitang nagibong ano man na pag-oswag. Posible daw na kaipuhan tang iaplikar sa satong sadiri an sadol na “ipadagos asin taposon” an satong pinonan?
3 Pag-abot sa Satong mga Pasohan: Pasil na gumibo nin personal na desisyon pero mas depisil na gibohon an satong pasohan. An pagpanuodma puwedeng makaolang sa ano man na pag-oswag. Kaipuhan kitang magin determinado na umabante na mayong pag-atraso. Mahalaga na itagama an panahon na kaipuhan tanganing magibo an trabaho. Marahay na magtalaan nin termino dangan seguradohon na aboton iyan.
4 Kun kita nasasakitan na aboton an satong mga pasohan, pasil na magdahelan: ‘Gigibohon ko iyan aroatyan.’ Pero dai niato aram an mangyayari sa ngapit. Nagpatanid an disipulong si Santiago: “Dai nindo aram kun ano an magigin buhay nindo sa aga. . . . Kun naaaraman nin saro kun arin an tama alagad dai nia iyan ginigibo, iyan kasalan para sa saiya.”—Sant. 4:13-17.
5 Huli sa kadakoldakol na kaolangan siring man kahagadan nin iba, pasil na mapabayaan an satong mga pasohan. Kaipuhan an odok na paghihingoa tanganing mapagdanay an mga iyan na presko sa isip. Nakakatabang an pagpapadanay kan bagay sa satong mga pamibi. An pakikiolay sa iba na pagirumdomon asin pakosogon kita puwedeng dakula an magibo. An pagbugtak nin notasyon sa satong kalendaryo magpapagirumdom sa sato na siyasaton an satong pag-oswag. An saro kaipuhan na magdesisyon na ‘gumibo nin oyon sa napagdesisyonan nia sa saiyang puso.’—2 Cor. 9:7.
6 An bulan nin Oktubre nagtatao nin marahay na oportunidad na makakonsentrar sa satong mga pasohan. Iaalok niato an mga suskripsion sa An Torrengbantayan asin Awake! Puwede daw kitang magbugtak nin rasonableng mga pasohan na maaabot? Kumusta man an paghihingoa na madugangan an satong ikinakapasakamot na mga magasin? An pagdesisyon na gumibo nin dakol pang pagdalaw liwat asin makapoon nin bagong pag-adal sa Biblia rasonableng mga pasohan para sa dakol.
7 Bakong madonong na idigson an mahalaga, huling ining “kinaban maagi sana.” (1 Juan 2:17) An espesyal na mga pribilehiyo nin paglilingkod makukua niato ngonyan. Depende na sato na aprobetsaran an mga iyan.