Ano an Sasabihon Ko Tanganing Mapukaw an Dugang Pang Interes?
1 An dakulang kabtang kan satong katuyohan sa paghuhulit kan maogmang bareta iyo an paggibo nin mga disipulo, bako sanang pagwalat nin mga babasahon. Kun siring, matapos na manompongan an interes, kaipuhan niatong kultibaron an mga banhi na itinanom na tanganing matabangan ni Jehova an indibiduwal na magtalubo sa espirituwal. (1 Cor. 3:6) Ano an masasabi nindo bilang pasunod sa enot na mga pag-aatubang na itinao sa enotan? Uya an nagkapirang suhestion.
2 Pagkultibar sa Nanompongan na Interes: “Kan kita mag-olay sa halipot kaidto, sibot kamong marhay, alagad ta nagtao kamo nin panahon na ikapahayag an saindong paghadit dapit sa ngapit. Kun nagigirumdoman pa nindo, binasa ta sa Biblia sa Kapahayagan 1:3 na ‘harani na an itinalaan na panahon.’ Igwa iyan nin direktang epekto sa ngapit niato gabos. Digdi sa Lucas 21:10, 11, 31, mangnohon kun paano sinimbag ni Jesus an hapot kan saiyang mga disipulo kun noarin maabot an katapusan. Interesado daw kamo na orog na manodan an dapit sa mga hula sa Biblia na naotob na? An magasin na Torrengbantayan nagbabareta kan naotob nang mga hula sa Biblia asin pinagdadanay kitang makaantabay sa mga pangyayari sa kinaban.”
3 Paggamit nin Saro Pang Publikasyon Tanganing Makapoon nin Pag-aadal sa Biblia: “Naoogma akong manompongan kamo ngonyan. Kan huri kitang mag-olay, dungan niatong binasa an panuga kan Biblia sa Kapahayagan 1:3. [Basahon giraray.] Mangnohon na an nasambit na kaogmahan dai automatikong minadatong. Duwang bagay an kaipuhan: Maninigo niatong basahon kun ano an sinasabi kan Biblia asin dangan gibohon an mga isinurat dian. Ining brochure na ‘Uya! Ginigibo Kong Bago an Gabos na Bagay’ magibo sa saindong pagbasa kan babasahon na iwinalat ko saindo na mas nakaoogma huli ta ipinaliliwanag kaiyan sa simpleng paagi kun ano an mga kahagadan nin Dios. Sa pahina 30 igwa nin lista nin 12 kahapotan na ihinahapot nin dakol na tawo. Arin sa mga ini an boot nindong masimbag?” Pakasimbag kan kagharong, puwede nindong buksan an brochure kun saen an hapot sinisimbag asin ponan an pag-aadal sa Biblia.
4 Gumamit nin mga Ilustrasyon Tanganing Mapukaw an Interes: An magasin na Torrengbantayan naglalaman nin dakol na buhay na ilustrasyon. Puwedeng itampok an mga ini tanganing pukawon an interes. Bago maggibo nin pagdalaw liwat, marahay na siyasaton an pinakahuring mga magasin asin helingon kun arin na mga ilustrasyon an puwedeng gamiton tanganing mapukaw an dugang pang interes sa pag-adal sa Biblia. Kun magdesisyon kamo na iintrodusir an saro pang libro o brochure, dangan gamiton an mga ilustrasyon dian tanganing mapukaw an interes, na nagpapalataw nin mga hapot na sisimbagon sa masunod na panahon. An mga ilustrasyon sa katapusan na mga pahina puwedeng itampok, siring man an mga eksena na naglaladawan sa Paraisong daga.
5 Sa mga pagdalaw liwat, kaipuhan an pagtogdok niato sa pundasyon na ibinugtak durante kan enot na pagsongko. An pagtao nin maingat na atension sa kabtang na ini kan satong ministeryo magdadara nin mayaman na mga bendisyon gikan ki Jehova kapwa para sa sato asin para sa mga naghihinanyog sa sato.—1 Tim. 4:16.