Pag-aatubang kan Maogmang Bareta—Dara an Bagong Alok
1 An odok na mga estudyante sa Biblia dakol nang siglo na nagmamawot na masabotan an librong Kapahayagan. Poon kan 1917, an Sosyedad nagpublikar nin pirang libro tanganing matabangan an mga matatakton sa Dios na masabotan an librong ini sa Biblia. An Revelation—Its Grand Climax at Hand! nagtatao kan pinakamalinaw asin pinakakompletong paliwanag manongod sa ipinasabong na libro sa Biblia na Kapahayagan.
2 May dakulang kagayagayahan asin pag-apresyar na inako niato an bagong librong Revelation Climax sa “Banal na Hustisya” na Pandistritong Kombension. Binabasa daw nindo an saindong kopya? Sa bulan na ini nin Hunyo, magkakaoportunidad kita na ialok an bagong librong ini sa gabos na nanonompongan niato.
INAAPRESYAR AN MGA KABTANG
3 An Revelation—Its Grand Climax at Hand! espesyalmenteng inaapresyar huli ta iyan nagtatao nin bersikulo-por-bersikulong paliwanag sa bilog na libro nin Kapahayagan. Ini magigin daing kabaing sa halaga para sa personal na pag-adal asin sa pagtotokdo sa iba.
4 Daing duwa-duwa na naapod an saindong atension kan magagayon na ilustrasyon sa libro. An mga iyan dakulang tabang sa paglaladawan sa mga simbolismo na isinasaysay ni Juan. Gamiton nin epektibo an mga ilustrasyon na ini kun iinaalok an libro sa paglilingkod sa langtad.
ANO AN SASABIHON NINDO?
5 Pakapagpamidbid, puwede nindong sabihon: “Dakol an nagmamawot na kutana masabotan ninda an libro nin Kapahayagan. May dakulang halaga an ‘oras nin paghokom’ na sinasabi sa Kapahayagan 14:7. [Basahon.] Tibaad mapangalas na gayo kamo na maaraman kun siisay an sinilotan nin Dios. [Basahon an Kapahayagan 18:2a, 4.] Nadangog na daw nindo an ekspresyon na ‘Dakulang Babilonya’? [Pasimbagon dangan ipaheling an librong Revelation Climax.] An impormasyon na itinatao sa kapitulo 33-38 nagpapamidbid sa Dakulang Babilonya asin nagsasabi kan nagdadangadang na kalaglagan kaiyan. An minagibo sa librong ini na kawiliwili asin nakatatabang nanggad iyo na iyan nagtatao nin nakapaliliwanag na mga komento sa kada bersikulo sa libro sa Biblia na Kapahayagan. An impormasyon na ini may dakulang halaga sa pagtabang saindo asin sa saindong mga namomotan na gumibo kan mga paagi na kamtan an pag-oyon nin Dios, sa siring nalilikayan an kaaabtan kan Dakulang Babilonya. Dinadagka ko kamo na umako nin sarong kopya kan librong ini, sa kontribusyon sanang ₱42.00.”
6 Para sa halipot na pag-aatubang, an iba tibaad gustong basahon an Kapahayagan 18:4 dangan buksan an retrato sa pahina 241, na sinasabi na an libro nagpapaliwanag kun ano an ilinaladawan kan Dakulang Babilonya, kun ano an ilinaladawan kan hayop, asin kun taano ta napakahalaga para sa sato na kuyogon an patanid nin Dios mapadapit sa sainda.
7 Namomotan niato si Jehova asin namomotan niato an satong kataed. Ini nagpapahiro sato na ipahayag an mensahe nin paghokom nin Dios. Mantang an Dakulang Babilonya kaipuhan na ibuyagyag pa, an mga may sadiosan na puso kaipuhan na matawan nin oportunidad na ‘lumuwas sa saiya’ asin manindogan nin marigon para sa katotoohan. Sa katuyohan na iyan ikinokosog niato nin sararo an satong tingog, na sinasabing “Madia!” sa mga napapaha sa “tubig nin buhay.”—Kap. 22:17.