Kapahayagan—Harani Na an Mamuraway na Kulminasyon Kaiyan!
1 “Maogma an nagbabasa nin makosog asin an mga nagdadangog sa mga tataramon kan propesiyang ini, asin nag-ootob kan mga bagay na nasusurat dian; huli ta harani na an itinalaan na panahon.” (Kap. 1:3) Itinatampok kan mga tataramon na iyan an halaga kan libro nin Kapahayagan, nangorogna mantang nabubuhay kita durante kan itinalaan na panahon na dakol sa mga hula kaiyan an maootob. Tama sana, poponan niato an pag-adal kan librong Kapahayagan—Harani Na an Mamuraway na Kulminasyon Kaiyan! sa Pag-adal sa Libro kan Kongregasyon poon sa semana nin Enero 8, 2007.
2 Poon kan huring pag-adal niato kan librong Kapahayagan sa Pag-adal sa Libro kan Kongregasyon, an situwasyon sa kinaban nagbago sa dakol na paagi. (1 Cor. 7:31) Apuera kaini, an dakol na nagin kabilang sa naghuhulit kan maogmang bareta kan Kahadean dai pa noarin man nagkaigwa kan oportunidad na makikabtang sa bersikulo-por-bersikulo na pag-estudyar kan libro nin Kapahayagan. An pag-adal kan librong Kapahayagan maninigong makatabang sa sato gabos na magdanay na puka sa kun ano an mangyayari sa ngapit.—Kap. 16:15.
3 Magin determinado na magin presente kada semana. An pag-aadalan na ini bako sanang makakatabang sa sato na magdanay na mapagbantay kundi an mga mensahe man ni Jesus sa pitong kongregasyon makakatabang sa sato na malikayan an mga situwasyon asin kamugtakan na puedeng magkaigwa nin bakong paborableng epekto sa satong espirituwalidad asin pakikikabtang sa ministeryo.—Kap. 1:11, 19.
4 Mag-andam na Marhay: Bago an kada pag-adal sa libro, basahon an mga bersikulo sa libro nin Kapahayagan na sisiyasaton. Mangnohon an sono sa Kasuratan na pangangatanosan na nagtatao nin paliwanag. Hingoahon na masabotan an mahahalagang punto tanganing mamotibar an puso. (Neh. 8:8, 12) Magtao nin panahon na horophoropon asin hapoton an sadiri nindo: ‘Ano an sinasabi kaini sa sako manongod ki Jehova asin sa pagkaotob kan saiyang katuyohan? Paano ako makakagawe kaoyon kan saiyang katuyohan asin makakatabang sa iba?’
5 Nobenta y dos na taon na an nakalihis kan magpoon an “aldaw kan Kagurangnan” kan 1914. (Kap. 1:10) An nakakatanyog sa daga na mga pangyayari na ihinula sa libro nin Kapahayagan madali nang dumatong. An pag-adal kan librong Kapahayagan makakapaginhawa sa satong puso asin isip saka makakapakosog sa satong pagtubod na harani na an “guerra kan dakulang aldaw nin Dios na Makakamhan sa Gabos” asin an bagong kinaban.—Kap. 16:14; 21:4, 5.