Pag-aadalan Niato Giraray an Librong Revelation
1 An pahina kan titulo kan librong Revelation kinokotar an Kapahayagan 1:3: “Maogma an nagbabasa nin makosog asin nagdadangog sa mga tataramon kan hulang ini.” An kaogmahan kan banwaan ni Jehova ngonyan siertong nadagdagan kan modernong aldaw na mga kaotoban kan mga hula sa librong Kapahayagan. An satong presenteng aldaw na pakasabot sa mga pangyayari sa “aldaw kan Kagurangnan” ipinaliliwanag sa Revelation—Its Grand Climax At Hand! (Kap. 1:10) Paagi sa pag-adal kaiyan, nagkamit kita nin pagmansay sa makahulogan na mga pangyayari sa kinaban, nangorogna an mga kalabot an pankinaban na imperyo nin falsong relihiyon asin an padagos na pagmartsa kan mga nasyon pasiring sa Armagedon siring man an mga pagtratar ni Jehova sa saiyang banwaan.
2 Sa masunod na Enero poponan niatong pag-adalan sa ikatolong beses an librong ini sa gabos na pag-adal sa libro kan kongregasyon na Cebuano, Hiligaynon, Iloko, asin Tagalog asin an iskedyul itatao sa An Satong Ministeryo sa Kahadean sa tamang panahon. Alagad, an patienot na impormasyon na ini itinatao tanganing an gabos na bagohan na mayong kopya kan librong ini makasisiertong makakua nin saro na magagamit kun pinag-aadalan na iyan.
3 Para sa dakol sa sato, an pag-adal sa publikasyon na ini bako sanang rerepreskohan an satong isip sa mga punto na pinag-olayan kan nakaagi kundi patataromon man an satong espirituwal na punto-de-vista sa presenteng mga pangyayari na masagkod sa aldaw nin kapangganahan ni Jehova sa gabos na kaiwal nia. An rinibo na uminiba na sa mga grupo niato durante kan nakaaging duwa o tolong taon siertong makikinabang sa ikatolong pag-orolay na ini sa librong Revelation sa Pag-adal sa Libro kan Kongregasyon.
4 Siertohon na mag-andam nin marhay asin makikabtang kada semana, poon sa Enero 30, 1995. Mayaman kamong bebendisyonan mantang orog nindong nasasabotan nin malinaw an kahulogan kan mga pangyayari sa kinaban sa liwanag kan hula sa Kapahayagan.