Taano ta Maninigo Kita Gabos na Mag-omaw sa Dios?

ALELUYA! An terminong ini pamilyar na marhay sa kadaklan na parasimba sa Kakristianohan. An nagkapira sa sainda ikinukurahaw iyan sa saindang pan-Domingong mga seremonya. Pero, pira an nakaaaram kun ano talaga an kahulogan kan terminong iyan? An totoo, iyan traduksion kan terminong Hebreo na Hallelujah na nangangahulogan “Omawon si Jah!” Iyan magayagaya, klarong marhay na pagrukyaw sa Kaglalang, na an ngaran Jehova.a

An terminong “Aleluya” parateng minalataw sa Biblia. Taano? Huli ta kadakol kan dahelan na omawon an Dios. Si Jah (Jehova) an Kaglalang asin Parasuportar kan mahiwason na uniberso. (Salmo 147:​4, 5; 148:​3-6) Sia an nagtugdas kan mga sistema nin ekolohiya na nagpapagin posible sa buhay digdi sa daga. (Salmo 147:​8, 9; 148:​7-10) Asin may espesyal na pagmakolog sia sa katawohan. Kun ginigibo ta an saiyang kabotan, binebendisyonan asin sinusuportaran nia kita sa buhay na ini asin itinatao sa sato an seguradong paglaom na mas marahay na buhay sa maabot. (Salmo 148:​11-14) Si Jah (Jehova) an nagpasabong kan mga tataramon na: “An mga matanos mismo magmamana kan daga, asin sinda mag-eerok dian sagkod lamang.”​—Salmo 37:29.

Huli kaini, an sadol ipinanonongod sa gabos: “Aleluya!” “Omawa nindo si Jah, banwaan!” (Salmo 104:35; nota sa ibaba) Pero, makamomondo na bakong gabos gustong maghimate. Ngonyan, an mga tawo nagsasakit. Dakol an nagugutom, naghehelang, o inaapi. An nagkapira nagtitios nin grabeng kamondoan huli sa pag-abuso sa droga o alkohol o sa mga resulta kan saindang inmoralidad o pagrebelde. Igwa daw nin ano man na dahelan kun taano an mga siring ta maninigong mag-omaw sa Dios?

‘Si Jehova Sana an Makatatao sa Sako nin Paglaom’

Iyo, igwa. Daing pagpalaen na inaagda ni Jehova an gabos na makamidbid sa saiya, makanood na gibohon an saiyang kabotan, asin magkamit kan mga bendisyon na nagpapangyari sa mga tawo na magmawot na omawon sia. Asin dakol an naghihimate. Helinga, halimbawa, si Adriana sa Guatemala. Kan si Adriana siete anyos, nagadan an saiyang ina. Dai nahaloy pakatapos kaiyan an saiyang ama naghale sa harong. Kan sia dies anyos, sia nagpoon na maghanap-buhay. Huling sinabihan sia kan saiyang ina na maglingkod sa Dios asin sa iglesia, si Adriana nakiasosyar sa laen-laen na grupong Katoliko, alagad kan panahon na sia 12 anyos, nadisganar sia asin nakiayon sa sarong gang sa kalye. Nagpoon siang magsigarilyo, magdroga, asin maghabon. Taano an siring na daragita ta magmamawot na omawon an Dios?

An tugang na babae ni Adriana nagpoon na mag-adal sa Biblia kaiba kan mga Saksi ni Jehova, alagad nginisihan sia ni Adriana. Dangan nagadan an saindang inaon. Sa lobong kan saiyang inaon, naaburido si Adriana sa mga hapot na nakariribok sa isip. Nagsaen an saiyang inaon? Sia daw nasa langit? Nagduman daw sia sa nagkakalayong impierno? Nakariribaraw na marhay idto, asin nagduman si Adriana sa kapilya kan sementeryo tanganing mamibi para sa tabang, na ginagamit an ngaran nin Dios na Jehova, siring sa itinokdo sa saiya kan saiyang tugang na babae.

Dai nahaloy nag-aadal na sia sa Biblia kaiba kan mga Saksi ni Jehova asin nag-aatender sa saindang Kristianong mga pagtiripon. Ini nagbukas sa saiya nin bilog na bagong pagmansay sa buhay, asin sia mapusong nagpondo sa saiyang pakikiasosyar sa mga gang sa kalye. Si Adriana, na ngonyan mga 25 anyos na, nagsasabi: “Solamente an pagkamoot ki Jehova an nagpangyari sa sako na bayaan an siring karaot na dalan nin buhay. Si Jehova sana sa saiyang dakulang pagkaherak an makatatao sa sako kan paglaom na buhay na daing katapusan.” Si Adriana, sa ibong kan saiyang masakit na pagpoon sa buhay, may ekselenteng mga dahelan na omawon an Dios.

An sarong situwasyon na orog pa nganing daing marahay na malalaoman ibinareta hale sa Ukraine. An sarong lalaki nakatukaw sa bilanggoan na naghahalat na bitayon. Naheherak daw sia sa saiyang sadiri? Nagmomondo nin labi-labi? Dai, kabaliktaran nanggad. Huling dai pa sana nahahaloy na nanompongan kan Mga Saksi ni Jehova asin igwa nang kaaraman dapit ki Jehova, nakiolay sia sa sainda na kaolayon an saiyang ina. Ngonyan nagsurat sia sa sainda huli ta nabaretaan nia na inotob ninda an saiyang pakiolay. An sabi nia: “Salamat sa saindong pagsongko sa sakong ina. Idto an pinakamagayagayang bareta na naresibi ko sa ultimong taon.”

Sa pagtaram dapit sa saiyang sadiri asin sa mga kapwa bilanggo na hinulitan nia, sia nagsurat: “Ngonyan may pagtubod na kami sa Dios asin naghihingoa na gumawe kaoyon sa samong pagtubod.” Tinapos nia an saiyang surat: “Salamat sa pagtabang nindo sa samo na manodan an kahulogan nin pagkamoot asin magkaigwa nin pagtubod. Kun magdanay akong buhay, tatabangan ko man kamo. Salamat sa Dios ta yaon kamo asin ta tinatabangan nindo an iba na kamotan an Dios asin tumubod sa saiya.” Iinapelar na kan lalaking ini an sentensiang kagadanan sa saiya. Alagad baga man sia bitayon o mabilanggo nin dakol na taon, malinaw na sia igwa nin dahelan na omawon an Dios.

‘Minsan Ngani Ako Buta, Ako Nakaheheling’

Ngonyan, horophoropa an sarong mabagsik na babaeng tin-edyer na biglang nawaran kan saiyang pagheling. Iyan an nangyari ki Gloria, na taga-Argentina. Si Gloria biglang nabuta kan sia 19 anyos, asin nungka nang nakabalik an saiyang pagheling. Sa edad na 29 nagin sambay sia nin sarong lalaki asin dai nahaloy nagbados. Ngonyan an pagmate nia may kahulogan na an saiyang buhay. Alagad kan magadan an saiyang aki, sia nagpoon na maghapot. Nag-isip-isip sia, ‘Taano ta nangyayari ini sa sakuya? Ano an nagibo ko? Talaga daw na nag-eeksister an Dios?’

Sa panahon na ini, may duwang Saksi ni Jehova na nagsongko sa saiya. Nagpoon siang mag-adal sa Biblia asin nanodan an dapit sa panuga kaiyan na sa bagong kinaban, an mga buta makaheheling liwat. (Isaias 35:5) Kanigoan kamakangangalas na paglaom para ki Gloria! Naogma siang marhay, nangorogna kan an saiyang agom umoyon na gibohon na legal an saindang pag-agom. Dangan naaksidente an saiyang agom asin nabaldado, na dai na makahale sa silyang de rueda. Ngonyan ining babaeng buta kaipuhan na magmahigos tanganing makapaghanap-buhay. Dugang pa, saiya an gabos na trabaho sa harong, patin an pag-asikaso sa saiyang agom. Pero si Gloria nag-oomaw ki Jehova! Sa tabang kan saiyang Kristianong mga tugang na lalaki asin babae, pinag-aadalan nia an Bibliang Braille, asin naparirigon na marhay an saiyang boot kan Kristianong mga pagtiripon sa Kingdom Hall. An sabi nia: “Masakit ipaliwanag, alagad minsan ngani ako buta, garo man sana ako nakaheheling.”

Kun beses pinaglalamag an mga tawo kun sinda nag-oomaw sa Dios. Naogma an sarong babae sa Croatia kan manodan nia an dapit sa Dios, alagad kontra an agom nia sa saiyang bagong manompongan na pagtubod asin binayaan sia, na iiniba an saindang aking babae na sarong taon an edad. Nasa kalye, binayaan kan agom asin pamilya, mayo nin harong, trabaho, o pati an saiyang aki, sa primero laglag na marhay an saiyang boot. Alagad nakasustenir sa saiya an saiyang pagkamoot sa Dios, minsan ngani limitado sana an pakikipag-olay nia sa saiyang aki sagkod na nagdakula na an aki. Nanompongan kan babaeng ini an “perlas na dakulaon an halaga” asin dai iyan bubutasan. (Mateo 13:​45, 46) Paano nia pinapagdanay an saiyang kagayagayahan sa masakit na mga panahon na ini? An sabi nia: “An kagayagayahan sarong bunga kan espiritu nin Dios. Iyan puedeng pataluboon na dai nagdedepende sa panluwas na mga kamugtakan, kun paanong an mga tinanom puedeng tumubo sa laog nin greenhouse ano man an kamugtakan nin panahon sa luwas.”

Sa Finlandia, an sais anyos na si Markus nadiskobre na igwa nin dai na maoomayan na helang sa kalamnan. Dai nahaloy ikinaag sia sa silyang de rueda. Pakalihis nin nagkapirang taon, dinara sia kan saiyang ina sa sarong Pentecostal na napapabaretang marhay na nakakapaomay daa nin mga may helang. Alagad dai sia naomayan nin milagro. Kaya si Markus nawaran nin interes sa Dios asin nagpadagos sa pag-adal sa siensia asin iba pang sekular na mga langtad. Dangan kaidtong mga limang taon na an nakaagi, an sarong babae na nasa silyang de rueda kaiba nin sarong hoben na lalaki nagdatong sa harong na iniistaran ni Markus. Mga Saksi ni Jehova sinda. Si Markus saro na ngonyan na ateista, alagad bako siang kontra sa pag-orolay dapit sa relihion asin pinadagos nia sinda.

Paghaloyhaloy, sarong mag-agom an nagsongko sa saiya, asin naponan an pag-adal sa Biblia. Pag-abot nin panahon, an puersa kan katotoohan kan Biblia nakaliwat sa pagmansay ni Markus sa mga bagay-bagay, asin narealisar nia na sa ibong kan saiyang pagkabaldado, sia igwa nanggad nin mga dahelan na omawon an Dios. Sia nagsabi: “Naoogma akong marhay huli ta nanompongan ko an katotoohan asin an organisasyon na ginagamit ni Jehova. An buhay ko ngonyan igwa nang direksion asin kahulogan. Saro pang nawarang karnero an nanompongan asin habo nang bayaan an aripompon ni Jehova!”​—Ikomparar an Mateo 10:6.

An Gabos ‘Mag-omaw ki Jah’

Nagkapira sana ini sa dai mabilang na mga eksperyensia na ikasasaysay tanganing ipaheling na an mga tawo ngonyan, ano man an saindang mga kamugtakan, puedeng magkaigwa nin dahelan na omawon an Dios. Siring kaini an pagkapaliwanag kaiyan ni apostol Pablo: “An diosnon na debosyon kapakipakinabang sa gabos na bagay, mantang iyan may panuga sa buhay ngonyan asin sa madatong.” (1 Timoteo 4:8) Kun ginigibo ta an kabotan nin Dios, ootobon nia an “panuga sa buhay ngonyan.” Siempre, sa palakaw na ini nin mga bagay dai nia gigibohon na mayaman an mga dukha o marahay an salud kan mga may helang. Alagad itinatao nia an saiyang espiritu sa mga naglilingkod sa saiya tanganing makanompong sinda nin kagayagayahan asin pagkakontento ano man an saindang panluwas na situwasyon. Iyo, maski sa “buhay ngonyan,” an mga may helang, inaapi, asin dukha puedeng magkaigwa nin dahelan na omawon an Dios.

Alagad kumusta man an buhay “sa madatong”? Tara, an mismong ideya kaiyan maninigong magpangyari sa sato na omawon an Dios na may pinakadakulang entusiasmo! Naoogma kitang marhay na isipon an dapit sa panahon na an kadukhaan magigin bagay na dai aram; na “mayo nin nag-eerok na masabi: ‘Naghehelang ako’”; asin na si Jehova Dios “papahidon . . . an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.” (Isaias 33:24; Kapahayagan 21:​3, 4; Salmo 72:16) Paano nindo minamansay an mga panugang ini hale sa Dios?

An sarong hoben na lalaki sa El Salvador nag-ako nin sarong tract sa Biblia na nagpapaliwanag kan nagkapira sa mga bagay na ini. Sinabi nia sa Saksi na nagtao kaiyan sa saiya, “Tiya, garo dai mapapaniwalaan an sinasabi kan tract na ini.” Arog kaiyan an reaksion nin dakol. Pero, an mga ini panuga kan Saro na naglalang kan uniberso, na nagpapahiro sa natural na mga siklo kan satong daga, asin nagtatabang minsan sa mga dukha patin may helang na manompongan an kagayagayahan. Puede tang paniwalaan an saiyang sinasabi. An hoben na lalaking nasambitan sa enotan nag-adal sa Biblia kaiba kan mga Saksi ni Jehova asin nadiskobre na ini totoo. Kun dai pa nindo ginigibo ini, pinaririgon mi an saindong boot na gibohon man iyan. Dangan, yaon logod kamo duman sa panahon na nakalihis na an presenteng palakaw na ini nin mga bagay, asin an gabos na linalang iriba sa pagkurahaw: “Aleluya!” “Omawon nindo si Jah, banwaan!”​—Salmo 112:1; 135:1.

[Nota sa Ibaba]

[Retrato sa pahina 5]

Yaon logod kamo duman sa panahon na an gabos na linalang iriba sa pagkurahaw: “Aleluya!”