Kun Pagmati Mo Habo Mo Nang Mabuhay

“Dai nawawara an pagmating ini,” an sabi ni Adriana na taga Brazil. “Kaya naisip ko na mas marahay pang magadan na ako.”

NAMATIAN mo na daw an grabeng kamunduan na huli kaiyan garo habo mo nang mabuhay? Kun iyo, masasabutan mo si Adriana. Grabe pirmi an pagkapurisaw niya, kamunduan, saka pakamati na mayo na siyang paglaom. Naaraman ni Adriana na igwa siya nin clinical depression.

Grabe man an namatian ni Kaoru na taga Japan. Siya an nag-aataman sa may edad na niyang mga magurang na hirilangon na. “Kan panahon na iyan, pagmati ko dai ko na kaya huli sa grabeng tensiyon sa trabaho,” an paliwanag niya. “Dai nahaloy, nawaran na ako nin ganang magkakan, saka dai na ako nakakaturog nin tultol. Naisip ko na makakapahingalo lang ako pag gadan na ako.”

Si Ojebode, na taga Nigeria, nagsabi, “Pirmi akong napapahibi sa grabeng mundo, kaya nag-isip ako nin paagi para tapuson na an buhay ko.” Marahay na sana ta dai naghugot si Ojebode, Kaoru, asin Adriana. Pero taon-taon, ginatos na ribo an naggigibo kaiyan.

KUN SAIN MAKAKAKUA NIN TABANG

Mga lalaki an kadaklan sa mga naghuhugot, na an dakul nasusupog na marhay na maghagad nin tabang. Sinabi ni Jesus na an mga may hilang nangangaipo nin doktor. (Lucas 5:31) Kaya kun nakakamati ka man nin arog kaiyan, na garo gusto mo nang magadan, dai tabi masupog na maghagad nin tabang. Naaraman kan dakul na may depresyon na an pagpabulong nakakatabang sainda na magrahay an pagmati asin makatagal. Si Ojebode, Kaoru, asin Adriana nagpatabang sa doktor, asin huli kaiyan, mas nakakaya na ninda ngunyan an saindang sitwasyon.

An mga doktor puwedeng magreseta nin bulong o magsagibo nin talk therapy, o parehong gibuhon iyan para bulungon an depresyon. Kaipuhan man kan mga may depresyon an malasakit asin suporta kan mapasensiya asin mapagmakulog na mga kapamilya asin amigo. An pinakamarahay na puwedeng magin amigo nin saro iyo an Diyos na Jehova, na nagtatao nin marahayon na tabang paagi sa saiyang Tataramon, an Bibliya.

IGWA DAW NIN PERMANENTENG SOLUSYON?

Sa parati, an mga biktima nin depresyon nangangaipo nin halawig na panahon nin pagbulong saka gumibo nin mga pagbabago sa saindang istilo nin pamumuhay tanganing makayanan an inaatubang nindang sitwasyon. Kun igwa ka nin depresyon, makakaasa ka na igwa nin magayon na puturong naghahalat sa saimo, asin puwede mong isip-isipon iyan arog kan ginibo ni Ojebode. Sinabi niya: “Hinahalat-halat ko nang mangyari an hula sa Isaias 33:24, na maabot an panahon na mayo nang masabing ‘May hilang ako.’” Arog ni Ojebode, mapapakusog ka sa panuga nin Diyos na “sarong bagong daga,” kun sain an “kulog” dai na nuarin man mamamatian pa. (Kapahayagan 21:1, 4) An panugang iyan nangangahulugan na matatapos na an ano man na klase nin mental saka emosyonal na kulog. Mawawara na iyan sagkod lamang. An kulog na namamatian mo “dai na masabong pa sa isip, asin an mga iyan dai na mapapasapuso [mo].”—Isaias 65:17.

Mga Teksto sa Bibliya na Makakatabang

Nasasabutan nin Diyos an namamatian mo.

“Ako, si Jehova na saimong Diyos, an nagkakapot sa tuo mong kamot, . . . nagsasabi sa saimo, ‘Dai ka matakot. Tatabangan taka.’”—Isaias 41:13.

Urog kisa kiisay man, mas nasasabutan ni Jehova an satong namamatian, asin gusto niya kitang tabangan.

Hurop-hurupon an Tataramon nin Diyos.

“Hinagad [ni Elias] na magadan na siya. An sabi niya: ‘ . . . O Jehova, kuanon mo na an buhay ko.’”—1 Hadi 19:4.

“Nakatabang sako an paghurop-hurop sa Tataramon nin Diyos,” an sabi ni Ojebode. “Narealisar ko na namati man palan kaidto ni Elias an arog kan namamatian ko.”

Makanuod sa mga halimbawa sa Bibliya.

“Namibi na ako [si Jesus] para sa saimo [si Pedro] na dai mawara an saimong pagtubod.”—Lucas 22:32

Pagkatapos na nigaran ni apostol Pedro si Jesus nin tulong beses, napurisaw siyang marhay asin nagparahibi sa sobrang kamunduan. “An eksperyensiya ni Pedro,” an sabi ni Kaoru, “nakatabang sako na mahiling na nagmamakulog si Jehova asin si Jesus sa namamatian ni Pedro. Napakusog ako kaiyan.”

An kulog na namamatian mo “dai na masabong pa sa isip, asin an mga iyan dai na mapapasapuso [mo].”—Isaias 65:17