2 | “Karangahan Hali sa Kasuratan”

AN SINASABI KAN BIBLIYA: “An gabos na bagay na isinurat kaidto isinurat para sa pagtukdo sa sato, tanganing paagi sa satuyang pakatagal asin paagi sa karangahan hali sa Kasuratan magkaigwa kita nin paglaom.”—ROMA 15:4.

An Buot Sabihon Kaiyan

Igwa sa Bibliya nin nakakarangang mga tataramon na makakatao sato kan kusog asin pakatagal na kaipuhan ta para makayanan an negatibong kaisipan. An mensahe kan Bibliya nagtatao man sato nin paglaom na sa dai na mahahaloy an kulog na namamatian ta sa emosyon magigin sarong bagay na sana kan nakaagi.

Kun Paano Ini Makakatabang

Gabos kita napupurisaw kun minsan; pero an mga igwa nin depresyon o anxiety tibaad aroaldaw na nakakamati nin daing pundong makulog na mga emosyon. Paano makakatabang an Bibliya?

Nagtatao an Bibliya nin dakul na positibong bagay o kaisipan na makakasalida sa negatibong mga kaisipan. (Filipos 4:8) Mapapano nanggad kaiyan an satong isip nin nakakaranga saka nakakapakalmang mga kaisipan na makakatabang sato na makontrol an satong mga emosyon.—Salmo 94:18, 19.
Makakatabang sa sato an Bibliya na malabanan an kaisipan na bako kitang mahalaga.—Lucas 12:6, 7.
Dakul na teksto sa Bibliya an nag-aasigurar sa sato na dai kita nagsosolo asin na an satong Diyos, an satong Kaglalang, lubos na nasasabutan an satong mga namamatian.—Salmo 34:18; 1 Juan 3:19, 20.
Nanunuga an Bibliya na hahalion nin Diyos an makulog na mga eksperyensiya niyato. (Isaias 65:17; Kapahayagan 21:4) Pag nakakamati kita nin nakakapurisaw o nakakapangluyang marhay na mga kaisipan asin emosyon, mahihiling niyato na an panugang ini nagtatao sato kan kusog na magpadagos.

Kun Paano Nakakatabang an Bibliya ki Jessica

An Epekto Sako kan Depresyon

“Kan 25 anyos ako, nagka-nervous breakdown ako saka na-diagnose na igwang malalang depresyon. Grabe su sakit ko dahil bigla-bigla ko na sanang nagigirumduman an makulog na mga eksperyensiya ko kaidto, dai ko iyan makontrol. Tinabangan ako kan mga doktor na masabutan na an depresyon ko konektado sa pag-isip ko nin negatibo na dara kan nakaka-trauma na mga pangyayari sa buhay ko. Apuwera sa pagtumar nin tamang bulong, kinaipuhan ko man na magpaterapi para maaraman ko kun nag-iisip na ako nin negatibo asin sa siring makontrol ko iyan.”

Kun Paano Nakakatabang Sako an Bibliya

“Sa mga panahon kaidto na grabe an depresyon ko, nagkaka-panic attack ako, grabe an pagkapurisaw ko, tapos dai ako makaturog. Sa parati pag banggi sige-sige sanang itok sa isip ko kan nakakapurisaw na mga kaisipan, haros dai ko iyan makaya. Arog kan mababasa sa Salmo 94:19, puwede kitang rangahon asin paginhawahon nin Diyos pag haros dai ta na makaya an kapurisawan ta. Kaya pirmi lang harani sa higdaan ko an sakong Bibliya saka an sarong notebook na may nakasurat na nakakapakusog na mga teksto. Pag dai ako mapaturog, nagbabasa ako nin pirang teksto. Paagi kaiyan, tinutugutan kong rangahon ako kan mga kaisipan nin Diyos.

“Dinadagka kita kan Bibliya na itumba an mga kaisipan na kontra sa aram ta manungod sa Diyos. Kaidto, kumbinsido ako na bako akong mahalaga, bakong angay na mamutan, saka daing pakinabang. Pero nanudan kong, an totoo, kontra palan iyan sa sinasabi kan Bibliya, na diyan ipinapahiling an Diyos bilang sarong mamumuton saka mahihirakon na Ama na nagmamakulog sa lambang saro sa sato. Padikit-dikit kong nakontrol an mga kaisipan ko imbes na ako an kontrulon kaiyan. Nanudan kong hilingon an sadiri ko arog kan paghiling sa sako nin Diyos. Mahalagang lakdang iyan na ginibo ko na nakatabang sako na mahali an negatibong paghiling ko sa sadiri.

“Hinahalat-halat ko an panahon na mayo na an nakakaraot na mga kaisipan. An pakaaram na an mga hilang sa isip magigin sarong bagay na sana kan nakaagi nakakatao sako nin kusog na atubangon an mga limitasyon ko ngunyan. Nakakatao man iyan sako nin magayunon na paglaom na sa maabot matatapos na man giraray an pakikipaglaban ko sa depresyon.”