3 | Makinabang sa mga Halimbawa sa Bibliya

ILINALADAWAN KAN BIBLIYA AN . . . Maimbod na mga lalaki asin babayi na nakamati nin mga “pagmati arog kan sa sato.”—SANTIAGO 5:17.

An Buot Sabihon Kaiyan

Dakul sa Bibliya nin mga eksperyensiya sa tunay na buhay nin mga lalaki asin babaying nakamati nin manlain-lain na emosyon. Mantang binabasa ta an mga eksperyensiya ninda, tibaad makahanap kita nin sarong karakter sa Bibliya na puwedeng mahiling ta an sadiri ta sa saiya.

Kun Paano Ini Makakatabang

Kaipuhan niyato gabos na mamatian na nasasabutan kita. Pero lalo nang totoo ini pag may problema kita manungod sa mental na salud. Pag binabasa ta an mga eksperyensiya kan mga karakter sa Bibliya, puwede tang mahiling an sadiri ta sa sainda—sa mga iniisip asin namamatian ninda. Bilang resulta, namamatian tang dai kita nagsosolo sa pagsakit ta saka nababawasan an pakamating mayo kitang kadamay sa pag-atubang sa grabeng pagkapurisaw saka sa nakakapangluyang mga emosyon.

Nakarekord sa Bibliya an dakul na kapahayagan kan mga karakter na nakamating desperado sinda asin mayo nang makakatabang sainda. Minsan daw namatian mo na, ‘Dai ko na kaya’? Si Moises iyo, pati man si Elias saka si David.—Bilang 11:14; 1 Hadi 19:4; Salmo 55:4.
Sa Bibliya igwa nin istorya manungod sa sarong babayi na an pangaran Hana na nakamati nin ‘grabeng pagmundo’ huling dai siya magkaaki saka pigpaparatuya siya kan karibal niya sa saiyang agom.—1 Samuel 1:6, 10.
Sa Bibliya igwa nin istorya manungod sa sarong lalaki na an pangaran Job asin tibaad mahiling ta an sadiri ta sa saiya. Maski ngani makusog an pagtubod niya ki Jehova, nakamati siya nin grabeng kapurisawan saka nakapagsabi siya minsan: “Nauuyam ako sa buhay ko; habo ko nang mabuhay pa.”—Job 7:16.

Kun pag-aadalan ta kun paano mapangganang napaglabanan kan mga karakter na ini sa Bibliya an pag-isip ninda nin negatibo, magkakaigwa man kita kan kusog na kaipuhan niyato para makayanan na atubangon an satong mga kapurisawan.

Kun Paano Nakakatabang an Bibliya ki Kevin

An Epekto Sako kan Bipolar Disorder

“Na-diagnose akong may bipolar disorder kan madali na akong mag-50 anyos. May mga pagkakataon na pagmati ko kaya kong atubangon an gabos na problema sa buhay. Pero may mga beses man na namamatian kong mayong saysay an mabuhay.”

Kun Paano Nakakatabang Sako an Bibliya

“Nahihiling ko an sadiri ko ki apostol Pedro. Nakagibo siya nin mga sala na dahil diyan namatian niyang dai siyang halaga. Pero imbes na ’yan na lang an pagparaisipon, nakiiba-iba siya sa mga amigo niya na nagmamalasakit sa saiya. Pag bakong magayon an aldaw ko dahil sa bipolar disorder, nadadaog ako kan mga kaluyahan ko kaya namamatian kong mayo akong halaga. Arog ni Pedro, nanudan kong hinguwahon na magdanay na dayupot sa mga amigo kong gusto akong tabangan na magpadagos lang sa buhay.

“An saro pang karakter sa Bibliya na nakakarangang marhay sako iyo si Hading David. Parati siyang nade-depress dahil sa sitwasyon niya saka nagbabasol sa mga sala niyang nagibo kaidto. Nahihiling ko an sadiri ko saiya huling kun minsan nakakagibo o nakakasabi ako nin mga bagay na pinagbabasulan ko. Nararanga ako kan sinabi ni David na nasa Salmo 51. Sa bersikulo 3, sinabi ni David: ‘Aram kong marhay an mga paglapas ko, asin an sakong kasalan pirming nasa atubangan ko.’ Arog mismo kaiyan an namamatian ko pag grabe an depresyon ko, dahil nasasakitan akong magin positibo an paghiling ko sa sadiri ko. Pero gustong-gusto ko man an sinabi ni David na nasa bersikulo 10: ‘Lalangon mo sa sako an sarong dalisay na puso, O Diyos, asin ibugtak mo sa sako an sarong bagong espiritu, saro na marigon.’ Namimibi ako sa Diyos nin kaagid kaiyan na tabangan Niya akong mabago an paghiling ko sa sadiri ko. An panghuri, nararanga man ako kan bersikulo 17. Sabi diyan: ‘An pusong nalugadan asin runot, O Diyos, dai mo isisikwal.’ Inaasigurar sa sako kan tekstong iyan na namumutan ako nin Diyos.

“Paagi sa pagpokus sa mga halimbawa sa Bibliya asin sa kun ano na an itinao sa sako nin Diyos, napapakusog ko an paglaom ko para sa maabot. Nagigin totoo para sako an mga panuga kan Bibliya asin talagang nakakatabang iyan na magpadagos lang ako.”