1 | Pamibi—‘Ipasa Saiya an Gabos Nindong Kahaditan’

AN SINASABI KAN BIBLIYA: “[Ipasa] nindo sa [Diyos] an gabos nindong kahaditan, huli ta nagmamakulog siya sa saindo.”—1 PEDRO 5:7.

An Buot Sabihon Kaiyan

Inaagda kita kan Diyos na Jehova na ipakipag-ulay sa saiya an ano man na pasan na nakakapagabat sa satong isip asin puso. (Salmo 55:22) Gurano man kadakula o kasadit kan problema, ipamibi iyan. Kun para sato importante iyan, importante man iyan ki Jehova. An pagpamibi saiya sarong importanteng lakdang para magkaigwa nin katuninungan nin isip.—Filipos 4:6, 7.

Kun Paano Ini Makakatabang

Pag igwa kita nin problema sa satong mental na salud, tibaad mamatian tang nagsosolo nanggad kita. Dai pirming lubos na nasasabutan kan iba an inaagihan ta. (Talinhaga 14:10) Alagad pag sinsero tang sinasabi sa Diyos sa pamibi kun ano an namamatian ta, siguradong pirmi niya kitang mabuot na dadangugon asin masasabutan niya kita. Pighihiling kita ni Jehova, aram niya an kulog asin sakit na namamatian ta, asin gusto niyang ipamibi ta sa saiya an manungod sa ano man na ikinakapurisaw ta.—2 Cronica 6:29, 30.

An pakikipag-ulay ki Jehova sa pamibi nakakapakusog kan satong pagtitiwala na nagmamakulog siya sa sato. Mamamatian ta an namati kan salmista na namibi: “Nahiling mo an sakong kasakitan; aram mo an sakong grabeng kapurisawan.” (Salmo 31:7) Iyo, an maaraman ta lang ngani na pighihiling palan ni Jehova an inaagihan ta makakatabang nang marhay para padagos tang makaya an masakit na mga panahon. Pero bako lang iyan an ginigibo niya. Nasasabutan niya, nin urog kisa sa siisay man, an satong mga inaagihan asin tinatabangan niya kitang makahanap nin karangahan asin pampakusog sa Bibliya.

Kun Paano Nakakatabang an Bibliya ki Julian

An Epekto Sako kan Grabeng Paghadit

“Igwa akong anxiety saka obsessive-compulsive disorder (OCD). Nahahadit ako nin grabe sa dai inaasahan na mga pagkakataon. Minsan maray man an pagmati ko, tapos bigla na sana akong mahahadit nin grabe dawa mayo man nin dahilan. Lalo na akong inaatake kaiyan pag may mga tawo. Pigpaparaisip ko kun ano daw kaya an iniisip ninda sako.

“May mga nakakaaram sa kondisyon ko, asin talagang tinatabangan ninda ako. Iyo, kun minsan bako su gusto kong madangog an mga nasasabi ninda. Pero pinapahalagahan ko iyan ta hinihinguwa lang kaya ninda na tabangan ako.

“May mga beses na dahil sa anxiety saka sa OCD ko, nasasakitan akong mamibi. Grabeng paghihinguwa an kaipuhan ko para makapokus saka makipag-ulay ki Jehova sa pamibi. Marikason an dalagan kan isip ko—sa sobrang rikas ka’yan dai ko na iyan masabayan sa kadaklan na pagkakataon. Pag nangyayari ’yan, nadidipisilan akong sabihon ki Jehova an namamatian saka iniisip ko.”

Kun Paano Nakakatabang Sako an Bibliya

“Sa pag-adal ko nin Bibliya, nanudan ko na para akuon nin Diyos an mga pamibi dai man kaipuhan na halawigon o magayunon iyan. Minsan pag dai ko kayang ipahayag sa mga tataramon an mga namamatian ko, sinasabi ko na lang: ‘Jehova, tabangan mo tabi ako.’ Dawa arog kaiyan, namamati kong nasasabutan ako ni Jehova saka itinatao niya sako an mismong kaipuhan ko sa pagkakataon na iyan. Apuwera sa pamibi, nagpapaterapi man ako. Maugma akong sabihon na dahil sa duwang bagay na iyan, nagrahay talaga an kondisyon ko. Sulit talaga an paghihinguwa kong magdulok sa sakong Ama sa langit asin mamatian an saiyang mamumuton na tabang.”