Ibugtak an Gabos Nindong Kahaditan ki Jehova

“Magpakumbaba kamo sa irarom kan mapangyaring kamot nin Dios, tanganing ilangkaw nia kamo sa igong panahon; mantang ibinubugtak nindo an gabos nindong kahaditan sa saiya, huli ta sia may pagmakolog sa saindo.”​—1 PEDRO 5:​6, 7.

1. Paano puwedeng makaapektar sa sato an kahaditan, paano ini ikaiilustrar?

AN KAHADITAN puwedeng makaapektar na marhay sa satong buhay. Ikakaagid iyan sa static na kun beses nakakaraot sa magayon na kantang nadadangog sa radyo. Kun mayo nin ribok sa tanog kan radyo, ikaoogma an magagayon na kanta asin puwedeng makatao nin nakakapakalmang kamugtakan. Alagad, an nagraragot na ribok kan static puwedeng makaraot maski sa pinakamagayon na tono, na ikinauuyam asin ikinadidisganar niato. An kahaditan puwedeng magkaigwa nin kaagid na epekto sa satong katrangkilohan. Puwedeng makapagabat iyan nin marhay sa sato kaya dai na niato naaasikaso an mahalagang mga bagay. Iyo nanggad, “an kahaditan sa puso nin tawo iyo an mapaduko kaiyan.”​—Talinhaga 12:25.

2. Ano an sinabi ni Jesu-Cristo manongod sa “mga paghadit sa buhay”?

² Si Jesu-Cristo nagtaram dapit sa peligro nin pagkalingling sa labi-labing kahaditan. Sa saiyang hula manongod sa huring mga aldaw, sia nagsadol: “Mag-ingat kamo sa saindo man sana na an saindong puso dai manganaan nin sobrang pagkakan asin nin kaburatan asin mga paghadit sa buhay, asin sa panale an aldaw na iyan mag-abot sa saindo na siring sa sarong siod. Huli ta madatong iyan sa gabos na nag-eerok sa ibabaw kan bilog na daga. Kaya magpuka kamo, na sa gabos na panahon nagngangayongayo na magin kamong mapanggana sa pagdulag sa gabos na ining bagay na nakatalagang mangyari, asin sa pagtindog sa atubangan kan Aki nin tawo.” (Lucas 21:​34-36) Kun paanong an sobrang pagkakan asin kaburatan puwedeng magpaluya sa isip, an pagigin nanganganaan sa “mga paghadit sa buhay” puwede man na ikawara sato kan pagmansay kan isip, na igwa nin makaturotristeng mga resulta.

Kun Ano an Kahaditan

3. Paano tinawan nin kahulogan an “kahaditan,” asin ano an nagkapirang causa kaiyan?

³ An “kahaditan” tinatawan nin kahulogan na “makolog o makahahandal na karibarawan nin isip na sa par[ate] huli sa maabot o inaantisipar na maraot na pangyayari.” Iyan “may pagkatakot na pag-isip o interes” siring man “sarong abnormal asin nakalulunos na pakamate nin pagkahandal asin takot na sa parate maheheling paagi sa pisyolohikong mga tanda (arog nin pagganot, tension, asin pagrikas nin pulso), paagi sa pagduwaduwa manongod sa pagigin tunay asin klase kan huma, asin paagi sa pagduda sa sadiri manongod sa kakayahan nin saro na mapangganahan iyan.” (Webster’s Ninth New Collegiate Dictionary) Kaya an kahaditan puwedeng magin sarong komplikadong problema. Kabilang sa dakol na causa kaiyan iyo an paghelang, paggurang, pagkatakot sa krimen, pagkawara nin trabaho, asin pag-isip dapit sa karahayan kan pamilya nin saro.

4. (a) Ano an marahay na girumdomon manongod sa mga tawo asin sa saindang mga kahaditan? (b) Kun kita nag-aagi nin kahaditan, ano an puwedeng gibohon?

⁴ Malinaw nanggad, igwa nin mga sokol an kahaditan, kun paanong igwa nin manlaenlaen na kamugtakan o sirkumstansia na puwedeng magin causa kaiyan. Bakong gabos na tawo igwa nin reaksion sa sarong situwasyon sa magkaparehong paagi. Kun siring, kaipuhan niatong marealisar na dawa kun an sarong bagay dai nakakaribok sa sato, iyan puwedeng magin causa nin grabeng kahaditan sa iba niatong kapwa parasamba ki Jehova. Ano an magigibo kun an kahaditan makaabot sa siring na punto na dai na kita nakakokonsentrar sa nagkakaoroyon asin kawiliwiling mga katotoohan kan Tataramon nin Dios? Kumusta kun nagtitios kitang marhay nin kahaditan kaya dai na niato napapagdanay na ikabugtak sa tamang lugar an mga isyu dapit sa soberaniya ni Jehova asin Kristianong integridad? Puwedeng dai niato kayang liwaton an satong mga kamugtakan. Imbes, dapat kitang humanap nin Makakasuratan na mga punto na makatatabang sa sato na mapangganahan an labi-labing kahaditan na causa nin makolog na mga problema sa buhay.

May Makukuang Tabang

5. Paano kita puwedeng humiro kaoyon kan Salmo 55:22?

⁵ Kun an mga Kristiano nangangaipo nin espirituwal na tabang asin nagagabatan sa mga kahaditan, makakakua sinda nin karangahan sa Tataramon nin Dios. Iyan nagtatao nin masasarigan na giya asin nagtatao sato nin dakol na pag-asegurar na dai kita nagsosolo bilang maimbod na mga lingkod ni Jehova. Halimbawa, an salmistang si David nag-awit: “Bugtakan an saimong pasan ki Jehova mismo, asin sia matabang sa saimo. Noarin man dai nia totogotan na matanyog an matanos.” (Salmo 55:22) Paano kita puwedeng gumawe nin oyon sa mga tataramon na ini? Paagi sa pagbugtak kan gabos niatong kahaditan, kapawotan, takot, asin pagkadisganar sa satong mamomoton na langitnon na Ama. Ini makakatabang sa pagtao sato nin pakamate nin katiwasayan asin katrangkilohan nin puso.

6. Sono sa Filipos 4:​6, 7, ano an magigibo sa sato kan pamibi?

⁶ Mahalaga an regular na odok sa pusong pagpamibi kun boot niatong ibugtak an satong pasan, kabale an gabos niatong kahaditan, ki Jehova. Ini magtatao sato nin panlaog na katoninongan, huli ta nagsurat si apostol Pablo: “Dai kamo maghadit sa ano man na bagay, kundi sa gabos na bagay paagi sa pamibi asin pagngayongayo na may pasalamat ipahayag nindo sa Dios an saindong mga kahagadan; asin an katoninongan nin Dios na minalampas sa gabos na kaisipan mag-iingat kan saindong puso asin kan saindong mga pag-isip paagi ki Cristo Jesus.” (Filipos 4:​6, 7) An daing kaagid na “katoninongan nin Dios” sarong pambihirang katrangkilohan na nakakamtan kan dusay na mga lingkod ni Jehova maski sa pinakamasakit na mga kamugtakan. Bunga iyan kan satong dayupot na personal na relasyon sa Dios. Mantang namimibi kita para sa banal na espiritu asin tinotogotan iyan na magmotibar sa sato, dai kita nakalilibre sa gabos na problema sa buhay, pero kita talagang nagkakamit kan bunga nin espiritu na katoninongan. (Lucas 11:13; Galacia 5:​22, 23) Dai kita napadadaog sa kahaditan, huli ta aram niato na si Jehova ‘pinapaontok sa katiwasayan’ an gabos sa saiyang maimbod na banwaan asin dai nia itotogot na may mangyaring ikadadanyar niato nin permanente.​—Salmo 4:8.

7. Anong kabtang an puwedeng gibohon nin Kristianong mga magurang sa pagtabang sa sato na mapangganahan an kahaditan?

⁷ Minsan siring, kumusta kun dai nahahale an satong kahaditan, minsan ngani kita naghohorophorop sa Kasuratan asin nagmamaigot sa pagpamibi? (Roma 12:12) An nombradong mga magurang sa kongregasyon mga probisyon man ni Jehova tanganing tumabang sa sato sa espirituwal na paagi. Puwede ninda kitang rangahon asin tabangan paagi sa paggamit kan Tataramon nin Dios asin paagi sa pagpamibi kaiba niato asin para sa sato. (Santiago 5:​13-16) Sinadol ni apostol Pedro an saiyang mga kapwa magurang na pastoran an aripompon nin Dios nin gikan sa boot, galaga, asin sa paaging angay na arogon. (1 Pedro 5:​1-4) Nasa puso kan mga lalaking ini an satong ikararahay asin boot na magin matinabang. Siyempre, tanganing lubos na makinabang sa tabang kan mga magurang asin magin marahay an espirituwalidad sa kongregasyon, kita gabos kaipuhan na mag-aplikar kan hatol ni Pedro: “Kamong mga hoben, magpasakop kamo sa mga gurang na lalaki. Alagad gabos kamo maghagkos nin kababaan nin boot sa lambang saro, huli ta tinutumang nin Dios an mga maabhaw, alagad ta tinatawan nia nin dai na kutana maninigong kabootan an mga mapakumbaba.”​—1 Pedro 5:5.

8, 9. Anong karangahan an puwedeng makua sa 1 Pedro 5:​6-11?

⁸ Dagdag pa ni Pedro: “Kaya magpakumbaba kamo sa irarom kan mapangyaring kamot nin Dios, tanganing ilangkaw nia kamo sa igong panahon; mantang ibinubugtak nindo an gabos nindong kahaditan sa saiya, huli ta sia may pagmakolog sa saindo. Magmata kamo, magpuka kamo. An saindong kaiwal, an Diablo, naglalakaw na siring sa nagngangarob na leon, na naghahanap nin masisiba. Alagad tumangon sia nindo, na marigon sa pagtubod, sa pakaaram na an siring man na mga pagtios nangyayari sa bilog na kasararoan kan saindong mga tugang sa kinaban. Alagad, pakapagtios nindo sa kadikit na panahon, an Dios kan gabos na dai na kutana maninigong kabootan, na nag-apod sa saindo sa saiyang daing sagkod na kamurawayan sa kaibanan ni Cristo, iyo an matapos mismo kan saindong pagpatood, paririgonon nia kamo, pakokosogon nia kamo. Mapasaiya logod an kakosogan sagkod lamang. Amen.”​—1 Pedro 5:​6-11.

⁹ Nakararanga nanggad na isipon na puwede niatong ‘ibugtak an gabos niatong kahaditan sa Dios huli ta sia may pagmakolog sa sato’! Asin kun an iba niatong kahaditan bunga kan mga pagprobar kan Diablo na laglagon an satong relasyon ki Jehova paagi sa pagdara sa sato nin paglamag asin iba pang kasakitan, bako daw makangangalas na maaraman na an gabos magigin marahay para sa mga nagpapadanay nin integridad? Iyo, pakapagtios niato nin kadikit na panahon, an Dios nin gabos na dai na kutana maninigong kabootan matapos kan satong pagpatood saka paririgonon asin pakokosogon kita.

10. Nasasambitan kan 1 Pedro 5:​6, 7 an anong tolong kuwalidad na makatatabang na mainaan an kahaditan?

¹⁰ Nasasambitan kan 1 Pedro 5:​6, 7 an tolong kuwalidad na makatatabang sato na mapangganahan an kahaditan. An saro iyo an kapakumbabaan, o “kababaan nin boot.” An bersikulo 6 minatapos sa ekspresyon na “sa igong panahon,” na nagsusuherir nin pangangaipo para sa pagpapasensia. An bersikulo 7 nagpapaheling na may kompiansa niatong ikabubugtak an gabos niatong kahaditan sa Dios ‘huli ta sia may pagmakolog sa sato,’ asin an mga tataramon na iyan nagsasadol nin lubos na pagsarig ki Jehova. Kaya helingon niato kun paano an kapakumbabaan, pagpapasensia, asin lubos na pagsarig sa Dios makatatabang na mainaan an kahaditan.

Kun Paano Makatatabang an Kapakumbabaan

11. Paano puwedeng makatabang sa sato an kapakumbabaan na mapangganahan an kahaditan?

¹¹ Kun kita mapakumbaba, aakoon niato na an kaisipan nin Dios nangongorog na marhay kan sa sato. (Isaias 55:​8, 9) Tinatabangan kita kan kapakumbabaan na midbidon an satong limitadong sokol nin pag-isip kun ikokomparar sa mahiwason na pagmansay ni Jehova. Naheheling nia an mga bagay na dai niato namamansayan, siring kan ipinaheling sa kaso kan matanos na tawong si Job. (Job 1:​7-12; 2:​1-6) Paagi sa pagpapakumbaba niato “sa irarom kan mapangyaring kamot nin Dios,” minimidbid niato an satong hamak na kamugtakan may koneksion sa Supremong Soberano. Ini nakakatabang man sato na mapangganahan an mga sirkumstansia na saiyang itinotogot. An satong puso puwedeng magmawot nin tolos-tolos na pakaginhawa, pero huling an mga kuwalidad ni Jehova sangkap an pagkatimbang, aram nia nin eksakto kun noarin asin paano mahiro sa satong kapakanan. Arog nin saradit na aki, kun siring, mapakumbaba kitang mangapot sa mapangyaring kamot ni Jehova, na may kompiansa na tatabangan nia kitang mapangganahan an satong mga kahaditan.​—Isaias 41:​8-13.

12. Paano puwedeng maapektaran an kahaditan dapit sa materyal na katiwasayan kun mapakumbaba niatong iaaplikar an mga tataramon sa Hebreo 13:5?

¹² Kabale sa kapakumbabaan an gikan sa boot na pag-aplikar kan hatol sa Tataramon nin Dios, na sa parate puwedeng makaina sa kahaditan. Halimbawa, kun an satong kahaditan bunga nin pagkabangkag na marhay sa materyal na mga pagmawot, marahay na horophoropon niato an hatol ni Pablo: “An saindong pamumuhay magin ligtas sa pagkamoot sa pirak, mantang kamo naninigoan na sa mga bagay na yaon. Huli ta [an Dios] nagsabi: ‘Sa ano man na paagi dai taka babayaan ni sa ano man na paagi pababayaan taka.’” (Hebreo 13:5) Paagi sa mapakumbabang pag-aplikar sa hatol na iyan, dakol an nakatalingkas mismo sa dakulang kahaditan manongod sa materyal na katiwasayan. Minsan ngani tibaad dai man nagrahay an saindang kamugtakan sa pinansial, dai iyan nagdodominar sa saindang kaisipan na ikararaot ninda sa espirituwal.

An Kabtang nin Pagpapasensia

13, 14. (a) Kun manongod sa mapasensiang pakatagal, anong halimbawa an itinao kan tawong si Job? (b) Ano an magigibo para sa sato kan mapasensiang paghalat ki Jehova?

¹³ An ekspresyon na “sa igong panahon” sa 1 Pedro 5:6 nagsusuherir kan pangangaipo para sa mapasensiang pakatagal. Kun beses an sarong problema nagdadanay sa laog nin halawig na panahon, asin iyan puwedeng magpagrabe sa kahaditan. Nangorogna sa situwasyon na iyan na kaipuhan niatong iwalat an mga bagay sa mga kamot ni Jehova. Si disipulo Santiago nagsurat: “Inaapod tang maogma idtong mga nakatagal. Nadangog nindo an dapit sa pakatagal ni Job asin naheling an bunga na itinao ni Jehova, na si Jehova malomoy na gayo sa kapadangatan asin maheherakon.” (Santiago 5:11) Si Job nag-agi nin pagbagsak nin kabuhayan, nagadanan nin sampulong aki, nagtios nin makababaldeng helang, asin putik na kinondenar nin falsong mga pararanga. Normal an kisuerra paghadit sa irarom nin siring na mga kamugtakan.

¹⁴ Minsan paano, si Job sarong arogan sa mapasensiang pakatagal. Kun kita nag-aagi nin masakit na pagbalo sa pagtubod, tibaad kaipuhan niatong maghalat nin pakaginhawa, arog ngani kan ginibo nia. Pero an Dios talagang huminiro para sa saiya, na sa katapustapusi pinaginhawa si Job sa saiyang pagsakit asin abunda siang binendisyonan. (Job 42:​10-17) An mapasensiang paghalat ki Jehova nagpapatalubo kan satong pakatagal asin naghahayag kan rarom nin satong debosyon sa saiya.​—Santiago 1:​2-4.

Manarig ki Jehova

15. Taano ta maninigo kitang manarig nin lubos ki Jehova?

¹⁵ Sinadol ni Pedro an mga kapagtubod na ‘ibugtak an gabos nindang kahaditan sa Dios huli ta sia may pagmakolog sa sainda.’ (1 Pedro 5:7) Kaya puwede asin maninigo kitang magkaigwa nin lubos na pagsarig ki Jehova. An Talinhaga 3:​5, 6 nagsasabi: “Manarig ka ki Jehova sa bilog mong puso asin dai ka manarig sa saimong sadiring pakasabot. Sa gabos mong dalan girumdomon mo sia, asin itatanos nia an saimong mga dana.” Huli sa nakaaging mga eksperyensia, an ibang pano nin kahaditan nadedepisilan na manarig sa ibang mga tawo. Pero igwa nanggad kita nin dahelan na manarig sa satong Kaglalang, an mismong Gikanan asin Parasustenir nin buhay. Dawa kun dai kita nananarig sa satong sadiring reaksion sa sarong bagay, puwede kitang perming magtiwala ki Jehova na iligtas kita sa satong mga kalamidad.​—Salmo 34:​18, 19; 36:9; 56:​3, 4.

16. Ano an sinabi ni Jesu-Cristo manongod sa kahaditan sa materyal na mga bagay?

¹⁶ Kabale sa pananarig sa Dios an pagkuyog sa saiyang Aki, si Jesu-Cristo, na nagtokdo kan nanodan nia sa saiyang Ama. (Juan 7:16) Dinagka ni Jesus an saiyang mga disipulo na ‘magtipon nin mga kayamanan sa langit’ paagi sa paglilingkod ki Jehova. Pero kumusta an manongod sa materyal na mga pangangaipo na kalabot an kakanon, gubing, asin istaran? “Dai na kamo magparahadit,” an ihinatol ni Jesus. Idinoon nia na pinapakakan nin Dios an mga gamgam. Saiyang ginugubingan nin magayon an mga burak. Bako daw na an tawong mga lingkod nin Dios orog na mahalaga kisa kan mga ini? Siyempre iyo. Kaya, si Jesus nagsadol: ‘Kaya padagos na hanapon nguna an kahadean asin an katanosan nin Dios, asin ini gabos na ibang bagay idadagdag na sana sa saindo.’ Nagpadagos si Jesus: “Kaya, dai kamo noarin man maghadit dapit sa masunod na aldaw, huli ta an masunod na aldaw magkakaigwa kan saiyang sadiring mga kahaditan.” (Mateo 6:20, 25-34) Iyo, kaipuhan niato nin kakanon, inomon, gubing, asin istaran, pero kun nananarig kita ki Jehova, dai kita labi-labing maghahadit manongod sa mga bagay na ini.

17. Paano niato puwedeng iilustrar an pangangaipong hanapon nguna an Kahadean?

¹⁷ Tanganing mahanap nguna an Kahadean, dapat kitang manarig sa Dios asin papagdanayon na nasa tamang areglo an satong mga ipinaoorog. An sarong parasisid na mayo nin mga kagamitan sa paghangos puwedeng lumugbo sa irarom nin tubig sa paghanap nin sarong sisi na igwang perlas sa laog kaiyan. Ini an saiyang pansustento sa saiyang pamilya. Tunay nanggad na ipinaoorog ining marhay! Alagad ano an mas importante? Aire! Kaipuhan siang regular na bumutwa tanganing panoon giraray an saiyang pulmon. Mas ipinaoorog an aire. Kaagid kaiyan, minsan paano puwede kitang mapalabot sa palakaw na ini nin mga bagay tanganing makakua kan mga kinakaipuhan sa buhay. Alagad, dapat na maenot an espirituwal na mga bagay huli ta an mismong buhay kan satong pamilya minadepende sa mga bagay na ini. Tanganing malikayan an dai kinakaipuhan na paghadit sa materyal na mga pangangaipo, kaipuhan kitang magkaigwa nin lubos na pagsarig sa Dios. Saro pa, an pagkakaigwa nin ‘dakol na gigibohon sa gibohon kan Kagurangnan’ puwedeng makatabang na mainaan an kahaditan huling “an kagayagayahan ni Jehova” napapatunayan na iyo an satong pailihan.​—1 Corinto 15:58; Nehemias 8:10.

Padagos na Ibugtak an Saindong Kahaditan ki Jehova

18. Ano an ebidensia na an pagbugtak kan gabos niatong kahaditan ki Jehova talagang makatatabang sa sato?

¹⁸ Tanganing magdanay na malinaw na nakakonsentrar sa espirituwal na mga bagay, kaipuhan na padagos niatong ibugtak an gabos niatong kahaditan ki Jehova. Perming girumdomon na talagang nagmamakolog sia sa saiyang mga lingkod. Sa pag-ilustrar: Huli sa kadaihan nin kaimbodan sa saiya kan saiyang agom, naggrabe an kahaditan nin sarong Kristiana sagkod sa punto na dai na sia makatorog. (Ikomparar an Salmo 119:28.) Alagad, kun nasa higdaan na, saiyang ibinubugtak an gabos niang kahaditan ki Jehova. Ihinahayag nia sa Dios an kairairaromi niang mga saboot, na sinasabi sa saiya an kolog na tinitios nia asin kan saiyang duwang sadit na aking babae. Pakatapos niang maghagad nin kaginhawahan paagi sa odok na pamibi, sia permi nang nakakatorog, huli ta nananarig sia na aatamanon sia ni Jehova asin an saiyang mga aki. An babaeng ini na nagdiborsio sono sa Makakasuratan na paagi maogma na ngonyan na agom nin sarong magurang sa kongregasyon.

19, 20. (a) Ano an nagkapirang paagi na puwede niatong mapangganahan an kahaditan? (b) Ano an maninigo niatong padagos na gibohon sa gabos niatong kahaditan?

¹⁹ Bilang banwaan ni Jehova, igwa kita nin manlaenlaen na paagi nin pakapanggana sa kahaditan. Nangorognang nakatatabang an pag-aplikar kan Tataramon nin Dios. Igwa kitang mayaman na espirituwal na kakanon na itinatao nin Dios paagi sa “maimbod asin madonong na oripon,” kabale an nakatatabang asin nakapagiginhawang mga artikulo na ipinupublikar sa An Torrengbantayan asin Awake! (Mateo 24:​45-47) Yaon sa sato an tabang kan banal na espiritu nin Dios. Dakula an pakinabang niato sa regular asin odok na pamibi. An nombradong Kristianong mga magurang andam asin boluntad na magtao nin espirituwal na tabang asin karangahan.

²⁰ An sato mismong kapakumbabaan asin pagpapasensia kapakipakinabang na marhay sa pag-atubang sa kahaditan na puwedeng umabot sa sato. Nangorognang mahalaga an lubos na pagsarig ki Jehova, huli ta an satong pagtubod napaparigon mantang naeeksperyensiahan niato an saiyang tabang asin paggiya. Dangan, an pagtubod sa Dios ikakalikay kita sa labi-labing paghadit. (Juan 14:1) Pahihiroon kita kan pagtubod na hanapon nguna an Kahadean asin magdanay na sibot sa magayagayang gibohon kan Kagurangnan, na makatatabang sato na mapangganahan an kahaditan. An siring na aktibidad pinapamate kitang tiwasay sa kaibanan kan mga mag-aawit nin mga pag-omaw sa Dios sagkod lamang. (Salmo 104:33) Kaya padagos niatong ibugtak an gabos niatong kahaditan ki Jehova.

Paano Kamo Masimbag?

◻ Paano puwedeng tawan nin kahulogan an kahaditan?

◻ Ano an nagkapirang paagi na puwede niatong mapangganahan an kahaditan?

◻ Paano makatatabang an kapakumbabaan asin pagpapasensia na mainaan an kahaditan?

◻ Sa pag-atubang sa kahaditan, taano ta mahalaga na magkaigwa nin lubos na pagsarig ki Jehova?

◻ Taano ta maninigo niatong padagos na ibugtak an gabos niatong kahaditan ki Jehova?

[Ritrato sa pahina 24]

Aram daw nindo kun taano si Jesus ta nagsabi, “Dai na kamo magparahadit”?