Gusto Ko Nang Magadan—Matatabangan Daw Ako kan Bibliya Pag Naiisip Ko Iyan?
An simbag kan Bibliya
Iyo! An Bibliya hali sa “Diyos, na nagraranga sa mga pinangluluyahan nin buot.” (2 Corinto 7:6) Dawa ngani an Bibliya bako man libro para sa mental-health, dakul an natabangan kaiyan na malabanan an tendensiya na maghugot. Makakatabang man saimo an kapaki-pakinabang na mga giya kaiyan.
May sinasabi daw an Bibliya manungod sa mga tawo na gusto nang magadan?
Anong mga teksto sa Bibliya an makakatabang saimo na mapaglabanan an tendensiyang maghugot?
Anong praktikal na mga giya an itinatao kan Bibliya?
● Sabihon an namamatian mo.
An sinasabi kan Bibliya: “An tunay na amigo nagpapahiling nin pagkamuot sa gabos na panahon asin sarong tugang na namumundag sa mga panahon nin kasakitan.”—Talinhaga 17:17.
Buot sabihon: Kaipuhan ta an tabang kan iba pag nag-aagi kita nin grabeng problema.
Lalo kang magagabatan kun sasadirihon mo sana an namamatian mo. Pero kun sasabihon mo iyan sa iba, makakapagian iyan sa pagmati mo asin puwedeng makatabang iyan saimo na magin positibo.
Purbaran ini: Makipag-ulay ka ngunyan sa sarong kapamilya o sarong pinagkakatiwalaan na amigo.a Puwede mo man na isurat an namamatian mo.
● Magkonsulta sa doktor.
An sinasabi kan Bibliya: “An mga tawong marahay an salud dai nangangaipo nin doktor, pero an mga may hilang iyo.”—Mateo 9:12.
Buot sabihon: Dapat kitang magpakonsulta sa doktor pag may hilang kita.
Pag an saro nakakaisip na maghugot, puwedeng sarong sintomas iyan nin mental o emosyonal na hilang. Arog kan ibang hilang, dai ini dapat ikasupog. Nabubulong an arog kaiyan na mga hilang.
Purbaran ini: Magpakonsulta tulos sa kuwalipikadong doktor.
● Tandaan na nagmamalasakit saimo an Diyos.
An sinasabi kan Bibliya: “Bakong an limang dignos nababakal nin duwang sinsilyo na sadit an kantidad? Pero mayo ni saro sa sainda an nalilingawan nin Diyos. . . . Dai kamo matakot; mas mahalaga kamo kisa sa dakul na dignos.”—Lucas 12:6, 7.
Buot sabihon: Mahalaga ka sa Diyos.
Tibaad pagmati mo mayong nagmamalasakit sa saimo. Pero tandaan na nahihiling nin Diyos an inaagihan mo. Nagmamalasakit siya sa saimo—dawa pa nawawaran ka na nin ganang mabuhay. “An pusong nalugadan asin runot, O Diyos, dai mo isisikwal,” an sabi kan Salmo 51:17. Gusto nin Diyos na mabuhay ka dahil namumutan ka niya.
Purbaran ini: Aramon an mga patunay na mababasa sa Bibliya na talagang namumutan ka niya. Halimbawa, hilingon an kapitulo 24 kan librong ginagamit sa pag-adal sa Bibliya na Rumani ki Jehova.
● Mamibi sa Diyos.
An sinasabi kan Bibliya: “[Ipasa] nindo sa [Diyos] an gabos nindong kahaditan huli ta nagmamakulog siya sa saindo.”—1 Pedro 5:7.
Buot sabihon: Gusto nin Diyos na sabihon mo saiya an ano man na mga ikinakahadit mo.
Puwede kang tawan nin Diyos nin panglaog na katuninungan asin kusog para magpadagos sa buhay. (Filipos 4:6, 7, 13) Sa paaging iyan inaalalayan niya an mga sinserong naghahagad sa saiya nin tabang sa pamibi.—Salmo 55:22.
Purbaran ini: Mamibi sa Diyos ngunyan. Gamiton an saiyang pangaran na Jehova asin sabihon saiya an namamatian mo. (Salmo 83:18) Hagadon saiya na tabangan kang makatagal.
● Isip-isipon an paglaom na sinasabi kan Bibliya sa maabot na panahon.
An sinasabi kan Bibliya: “Yaon sa sato an paglaom na ini bilang angkla para sa satuyang buhay, sigurado asin marigon.”—Hebreo 6:19, nota sa ibaba.
Buot sabihon: Arog kan sarong barko na minaitaas saka minaibaba huli sa darakulang alon, an emosyon mo tibaad paburubago man. Pero an paglaom na sinasabi kan Bibliya makakatabang saimo na magin marigon o makusog.
An paglaom na iyan bakong imahinasyon sana, kundi base mismo iyan sa panuga nin Diyos na hahalion niya an mga dahilan kan kulog na namamatian niyato.—Kapahayagan 21:4.
Purbaran ini: Basahon an “Makakalaom Ka sa Sarong Magayon na Puturo” para maaraman mo pa an paglaom na itinatao kan Bibliya.
● Gibuhon an mga bagay na ikinakaugma mo.
An sinasabi kan Bibliya: “An maugmang puso marahay na bulong.”—Talinhaga 17:22.
Buot sabihon: Pag nag-i-enjoy kita sa mga bagay na ginigibo ta, nakakatabang iyan sa sato sa mental asin emosyonal na paagi.
Purbaran ini: Gibuhon an mga bagay na ikinakaugma mo. Halimbawa, magdangog nin magayon na musika, magbasa nin nakakapakusog na babasahon, o magtao nin panahon sa mga bagay na kinahihiligan mo. Madadagdagan man an kaugmahan mo kun matabang ka sa iba dawa sa saradit na paagi.—Gibo 20:35.
● Ingatan an saimong salud.
An sinasabi kan Bibliya: “An pisikal na pagsasanay may pakinabang.”—1 Timoteo 4:8.
Buot sabihon: Makikinabang kita sa pag-ehersisyo, pagkaigwa nin tamang turog, asin pagkakan nin masustansiyang kakanon.
Purbaran ini: Maglakaw-lakaw dawa 15 minutos sana.
● Tandaan na nagbabago an mga bagay-bagay pati na an namamatian ta.
An sinasabi kan Bibliya: “Dai . . . nindo aram kun ano an magigin buhay nindo sa kinaagahan.”—Santiago 4:14.
Buot sabihon: An mga ikinakahadit na problema—dawa idtong sa hiling ta mayo nang solusyon—temporaryo sana.
Dawa garo baga nakapangluluyang marhay an sitwasyon mo ngunyan, puwede iyan na magbago sa aga. Kaya maghanap nin mga paagi para makayanan iyan. (2 Corinto 4:8) Posibleng marhay na magbago an sitwasyon mo, pero pag naghugot ka, dai mo na iyan mababawi pa.
Purbaran ini: Magbasa nin mga istorya sa Bibliya manungod sa mga tawong pinangluyahan na marhay nin buot kaya gusto na nindang magadan, asin hilingon kun paanong pag-abot nin panahon nagrahay an sitwasyon ninda—na sa parati sa paaging dai ninda inaasahan. Pag-isipan an pirang halimbawa.
May sinasabi daw an Bibliya manungod sa mga tawo na gusto nang magadan?
Iyo. Sinasabi kan Bibliya an manungod sa nagkapira na haros nagsabing, “Gusto ko nang magadan.” Dai sinda inanggutan nin Diyos, imbes tinabangan niya sinda. Arog man kaiyan an gigibuhon niya saimo.
Si Elias
● Siisay siya? Si Elias sarong pusuan na propeta. Pero pinangluluyahan man siya nin buot kun minsan. “Si Elias tawo man na may pagmati arog kan sa sato,” an sabi kan Santiago 5:17.
● Taano ta gusto na niyang magadan? May pagkakataon kaidto na pagmati ni Elias nagsosolo siya, mayo siyang halaga, asin natakot siya. Kaya nakimahirak siya ki Jehova: “Jehova, kuanon mo na an buhay ko.”—1 Hadi 19:4.
● Ano an nakatabang saiya? Biyong ipinahayag ni Elias sa Diyos an saiyang namamatian. Paano siya pinakusog nin Diyos? Ipinahiling sa saiya nin Diyos an saiyang pagmalasakit asin an Saiyang kapangyarihan. Inasigurar man niya si Elias na mahalaga pa man giraray siya asin tinawan siya nin mapagmalasakit saka may kakayahan na kaiba-iba.
▸ Basahon an manungod ki Elias: 1 Hadi 19:2-18.
Si Job
● Siisay siya? Si Job sarong lalaking mayaman na may dakulang pamilya; maimbod siyang nagsasamba sa tunay na Diyos.
● Taano ta gusto na niyang magadan? Bigla na sana, dakul na maraot na bagay an nangyari ki Job. Nawara an gabos niyang pagsadiri. Nagadan an gabos niyang aki sa sarong trahedya. Nagkaigwa siya nin makulugon na hilang. Asin, daing hirak pa siyang inakusaran na siya man sana an dahilan kan saiyang mga problema. Sinabi ni Job: “Nauuyam ako sa buhay ko; habo ko nang mabuhay pa.”—Job 7:16.
● Ano an nakatabang saiya? Namibi si Job sa Diyos asin nakipag-ulay sa iba. (Job 10:1-3) Pinakusog siya nin sarong mapagmalasakit na amigo, si Elihu, na nagtabang saiya na maitanos an kaisipan niya sa saiyang sitwasyon. Urog sa gabos, inako ni Job an sadol asin tabang nin Diyos.
▸ Basahon an manungod ki Job: Job 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.
Si Moises
● Siisay siya? Si Moises sarong lider kan suanoy na Israel asin maimbod na propeta.
● Taano ta gusto na niyang magadan? Magabaton an responsabilidad ni Moises, pirmi siyang pigkikritika, saka nakamati siya nin grabeng kapagalan. Kaya nag-agrangay siya sa Diyos: “Gadanon mo na tabi ako ngunyan.”—Bilang 11:11, 15.
● Ano an nakatabang saiya? Sinabi ni Moises sa Diyos an namamatian niya. Tinabangan nin Diyos si Moises na gumian an trabaho niya para mabawasan an stress niya.
▸ Basahon an manungod ki Moises: Bilang 11:4-6, 10-17.
a Kun grabe na an namamatian mo asin naiisipan mo na talagang maghugot pero mayo kang makaulay na mahal sa buhay, mag-apod sa suicide o emergency hotline sa saindong lugar.