‘Tabang sa Igong Panahon’
1 Abaa kanakarerepresko na mag-ako nin tabang sa panahon mismo na kaipuhan niato iyan! (Heb. 4:16) Sa “Mga Mensahero nin Diosnon na Katoninongan” na Pandistritong Kombension, naggayagaya kita kan tawan kita nin duwang espesyal na probisyon na tabang na tamang-tama sa panahon.
2 An bagong libro, An Sekreto sa Kaogmahan nin Pamilya, duminatong sa angay na panahon. Iyan nagtataong atension sa apat na mahalagang marhay na bagay na nakakokontribwir sa sarong maogmang buhay pampamilya: (1) Pagpopogol sa sadiri, (2) pagmidbid sa pagkapayo, (3) marahay na komunikasyon, asin (4) pagkamoot. An sadol na iprinesentar sa librong Kaogmahan nin Pamilya matabang sa gabos na pamilya na nag-aaplikar kaiyan na makanompong nin diosnon na katoninongan. Magtagama nin panahon na maingat na basahon an bagong libro asin pag-adalan iyan nin iriba bilang pamilya. Magin pamilyar na marhay sa mga tampok na kabtang kaiyan tangani na magin andam kamo na gamiton iyan nin epektibo kun ialok na iyan sa publiko sa kaenot-enote, sa Marso.
3 An bagong brosyur, Ano an Kahagadan sa Sato nin Dios?, duminatong sa tamang panahon tangani na makatabang na maparikas an satong paggibo nin mga disipulo. Mantang puede iyan na espesyalmenteng gamiton sa pagtabang sa mga tawo na limitado an kakayahan sa pagbasa, dakol na adulto asin sadit na aki na tataong bumasa asin sumurat an makikinabang man sa simpleng paliwanag kaiyan manongod sa pundamental na mga katokdoan sa Biblia. Tibaad iyan nanggad an kaipuhan tangani na makapoon nin pag-adal bilang sarong tangga pasiring sa librong Kaaraman. An probisyon na ini siertong makatatabang sa dakol pa na masabotan kun paano sinda mayaman na bebendisyonan paagi sa paggibo kan kahagadan nin Dios.
4 Ano an satong namamatean sa mamomoton na ‘tabang [ni Jehova] sa igong panahon’? Eksakto nanggad an pagkapahayag ni David sa satong mga saboot kan saiyang sabihon na ‘sia dai nagkulang, an saiyang kalag pinaginhawa, asin an saiyang kopa pinano nanggad!’ (Sal. 23:1, 3, 5) Magayagaya kitang naglalaom na ikatao an makangangalas na espirituwal na tabang na ini sa dakol pang iba na sinserong nagmamawot na mamidbid asin maglingkod sa tunay na Dios, si Jehova.