Paghiras sa Iba kan An Sekreto sa Kaogmahan nin Pamilya
1 An pamilya an pundamental na kabtang kan sosyedad nin tawo, asin sa pamilya minagikan an mga barangay, siudad, probinsia, asin bilog na nasyon. Ngonyan an pamilya nasa kagipitan na dai pa noarin man nangyari kaidto. An makosog na mga puersa hinuhuma an mismong pag-eksister kan buhay pampamilya. Makapagpapasalamat nanggad kita na tinawan kita ni Jehova, an Kagdisenyo kan areglo nin pamilya, nin mga instruksion tanganing magkaigwa kita nin kaogmahan sa pamilya! An mga nagkukuyog sa saiyang mga susundan nakanonompong na naiinaan an mga problema asin nagreresulta sa sarong mapangganang pamilya. Ngonyan na Setyembre may pribilehio kitang ihiras sa iba an librong An Sekreto sa Kaogmahan nin Pamilya. Boluntad na dolokon an mga tawo manongod sa temang buhay pampamilya. Magin makikatood, positibo, asin mapagmansay. Ano an puede nindong sabihon?
2 Puede kamong pumoon paagi sa pagpalataw nin sarong hapot, siring baga kan:
◼ “Nariparo daw nindo na dakol na pamilya an nadedepisilan na tagalan an mga kasakitan sa buhay? [Pasimbagon.] Ipinaririsa kan mga bareta na dakol na tawo an nakaeeksperyensia nin mga problema sa harong. Ano sa paghona nindo an makatatabang sa mga pamilya na manompongan an orog na karigonan asin kaogmahan? [Pasimbagon.] Mantang an Dios an nag-establisar kan areglo nin pamilya, bako daw na rasonableng siyasaton an mga susundan na itinao nia? [Basahon an 2 Timoteo 3:16, 17.] An siring na kapakipakinabang na instruksion itinatao sa librong ini, An Sekreto sa Kaogmahan nin Pamilya.” Dangan hapoton an indibiduwal kun ano sa paghona nia an sarong lakop na problema nin pamilya, ipaheling an kapitulo na nagpapaliwanag kan problemang iyan, asin ialok an libro.
3 Sa pagdalaw liwat, puede nindong ipadagos an pasohan na makapoon nin pag-adal sa Biblia paagi sa pagsabi:
◼ “Pinag-isip-isip ko an sinabi nindo manongod sa temang buhay pampamilya, asin may dara ako saindo na iniisip kong ikaoogma nindo. [Ipaheling an brosyur na Kahagadan, buksan sa pahina 16, asin basahon an anom na hapot na nasa itaas.] Malinaw nanggad, an kada saro sa pamilya dapat na gibohon an saiyang kabtang sa pagkontribwir sa kaogmahan nin pamilya. Kun may nagkapira sana kamong minuto, puede kong idemonstrar kun paano nindo makukua an pinakadakol na pakinabang sa impormasyon na ini.” Dangan ponan na pag-adalan an leksion 8.
4 An saro pang paagi na makapoon nin pag-orolay iyo an pagsambit nin sarong problema, puedeng paagi sa pagsabi:
◼ “Dawa ngani an gabos gustong magkamit nin pagkakontento asin satispaksion, garo baga dakol na pamilya an dai talaga nagin mapanggana digdi. Ano sa paghona nindo an makatatabang sa sainda na manompongan an tunay na kaogmahan? [Pasimbagon.] Haloy nang panahon an nakaagi, ihinayag kan Biblia kun anong klaseng mga problema an maheheling niato sa mga pamilya ngonyan. [Basahon an 2 Timoteo 3:1-3.] Minsan siring, nagsasabi man an Biblia kun ano an gigibohon kan mga pamilya tanganing maresolberan an mga problemang ini asin magkamit nin nagdadanay na kaogmahan. An mga prinsipyo kaiyan itinatao sa librong ini, An Sekreto sa Kaogmahan nin Pamilya.” Dangan ipaheling an kahon sa repaso sa poro kan angay na kapitulo, basahon iyan, asin ialok an libro.
5 Sa pagdalaw liwat nindo, gamiton an brosyur na “Kahagadan” sa pagpoon nin pag-adal. Puede nindong sabihon:
◼ “Naoogma ako sa saindong gikan sa boot na pagsiyasat kan mga prinsipyo sa Biblia na aplikado sa buhay pampamilya. Ipinaheling nin eksperyensia na nakakamtan an pinakamarahay na mga resulta paagi sa pagsunod sa praktikal na hatol na makukua sa Biblia. Uya an sarong simpleng paliwanag kun taano ta siring kaiyan.” Basahon an enot na parapo kan leksion 1 sa brosyur na Kahagadan, kabale magsalang an Salmo 1:1-3 o Isaias 48:17, 18. Kun itinotogot nin oportunidad, pag-olayan an natatada kan leksion. Alokon na madalaw liwat tangani na magkaibang pag-adalan an masunod na leksion.
6 Manongod sa mga Kontribusyon: Kun nagpapasakamot nin literatura, nag-aalangan daw kamo kun beses na sambiton an kontribusyon na hinahagad niato para sa literatura? Marahay na girumdomon na mahalaga an satong literatura, asin mahal an pag-imprenta. Iyan an dahelan na boot niatong siertohon na ipaliwanag an satong boluntaryong gibohon asin an dahelan kan satong paghagad nin kontribusyon. Matabang ini sa sainda na marealisar na dai kita nagpapabakal nin literatura asin magtatao sa sainda nin oportunidad na magtao nin sadit na kontribusyon para sa satong pambilog na kinaban na gibohon.
7 Pakaalok kan librong “Kaogmahan nin Pamilya,” halimbawa, puede nindong sabihon ini:
◼ “An pagprodusir kan samong literatura ginigibo kan boluntaryong mga trabahador asin sustentado nin boluntaryong mga kontribusyon. Iyan an dahelan na kami naghahagad nin sadit na kontribusyon tanganing makatabang na makobrehan an mga gastos sa pag-imprenta asin materyales siring man an pagpadara kan literaturang ini sa bilog na kinaban. An saindong kontribusyon makatatabang sa samong pambilog na kinaban na gibohon asin matabang sa iba na mag-ako kan marahay na impormasyon na ini.” Paagi sa pag-atubang na ini, makakokompiar kita na aapresyaron an literatura asin dai kita mamansayon na mga parapabakal sana nin libro.
8 Gibohon niato an gabos na paghihingoang makakaya niato na ihiras sa iba an sekreto na minagiya pasiring sa kaogmahan nin pamilya—an pagsunod sa mga instruksion na itinao sa Tataramon nin Dios.—Sal. 19:7-10.