Ialok an Librong Kaogmahan nin Pamilya sa mga Tawo Ano Man an Edad
1 An sarong 11 anyos na aking lalaki na taga California nagpahayag kan saiyang pag-apresyar sa librong An Sekreto sa Kaogmahan nin Pamilya. Sia nagsurat: “Nagpapasalamat ako para kaiyan, asin ineenkaminar ko an iba pang pamilya na basahon an librong ini huli ta iyan ekselente. Iyan . . . nakatatabang sa sakong pamilya na makanompong nin katoninongan asin kaogmahan sa samong harong.” An eksperyensia kan hoben na ini maninigong mag-enkaminar sa sato na ialok an librong Kaogmahan nin Pamilya sa mga tawo ano man an edad. Uya an nagkapirang suhestion na tibaad boot nindong probaran sa saindong ministeryo ngonyan na Pebrero.
2 Kun nakanunupar nin sarong hoben, puede nindong sabihon:
2◼ “Dakol sa saimong kaedad an nag-iisip-isip dapit sa pag-agom. Alagad saen ka makanonompong nin masasarigan na impormasyon manongod sa temang iyan? [Pasimbagon.] Parateng sinasabi nin mga hoben na bako sindang segurado kun andam na sindang mag-agom. Togotan mo akong ihiras sa saimo an sinasabi kan sadit na librong ini manongod sa temang iyan.” Buksan sa pahina 14 an librong Kaogmahan nin Pamilya, asin basahon an parapo 3. Dangan itokdo an kada subtema sa kapitulo. Ialok an libro, asin iareglo na madalaw liwat.
3 Kun nakikipag-olay sa sarong magurang, puede kamong magsabi:
3◼ “Ihinihiras mi sa mga magurang an nagkapirang praktikal na giya na talagang epektibo sa pagpadakula sa mga aki. An mga ini kinompilar na sa sadit na librong ini na An Sekreto sa Kaogmahan nin Pamilya.” Buksan sa pahina 55. Basahon an parapo 10, na sinusundan kan Deuteronomio 6:6, 7, sa parapo 11. Dangan itokdo an italikong mga sentence sa parapo 12 sagkod 16. Magpadagos paagi sa pagsabi: “Nakatabang an librong ini sa dakol na magkamit nin orog kadakulang kapangganahan bilang mga magurang. Kun boot nindong basahon iyan, naoogma akong iwalat sa saindo an kopyang ini sa sadit na kontribusyon.”
4 Kun nakikipag-olay sa sarong may edad na, puedeng sabihon nindo:
4◼ “Pakabasa ko kan halipot na komentong ini, sabihon nindo tabi sa sako kun ano po an nasa isip nindo dapit dian.” Buksan an librong Kaogmahan nin Pamilya sa pahina 169, asin basahon an enot na duwang sentence kan parapo 17. Dangan pasimbagon. Depende sa simbag, puede nindong basahon an dugang pang mga kotasyon sa libro bago iyan ialok.
5 Kun dinadalaw liwat an mga napasakamotan kan librong Kaogmahan nin Pamilya, isaisip na hingoahon na makapoon nin sarong pag-adal sa Biblia. An Leksion 8 sa brosyur na Kahagadan o an kapitulo 15 sa librong Kaaraman puedeng angay sa pagpoon. Mientras tanto, hingoahon niatong tabangan an mga tawo ano man an edad na makatogdok nin sarong maogmang Kristianong buhay pampamilya.