Pagtabang sa mga Pamilya na Seguradohon an Daing Sagkod na Ngapit
1 “An kapasloan marahay,” sabi nin sarong kapitalista sa sarong klaseng naggraduwar sa kolehio, na idinagdag pa: “Puede kamong magin paslo asin marahay pa man giraray an pagmate sa saindong sadiri.” Tipiko iyan kun paano pinalalakop kan kinaban an interes sa sadiri bilang an paagi na seguradohon an ngapit nin saro. Kabaliktaran nanggad, itinokdo ni Jesus na an Kristiano dapat na ‘paindahan an sadiri . . . huli ta ano an pakikinabangon nin sarong tawo kun makamtan nia an bilog na kinaban alagad mawara naman an saiyang kalag?’ (Mat. 16:24-26) Tangani na seguradohon an daing sagkod na ngapit, dapat na isentro nin saro an saiyang bilog na buhay sa paggibo kan kabotan nin Dios—an pinakaimportanteng pasohan para sa mga pamilya ngonyan. (Sal. 143:10; 1 Tim. 4:8) Ipinaaabot an mensaheng iyan sa pantapos na kapitulo kan librong An Sekreto sa Kaogmahan nin Pamilya. An bagong publikasyon na ini tinatabangan an mga pamilya na masabotan kun ano talaga an mahalaga sa buhay. Ngonyan na Marso, ano an puede niatong sabihon tangani na parigonon an boot kan mga nanonompongan niato na basahon an librong Kaogmahan nin Pamilya? Uya an nagkapirang suhestion:
2 Kapwa sa pinto asin sa tinampo, puede nindong probaran na gamiton an tract na “Maogma sa Buhay Pampamilya” tangani na makapoon nin mga pag-orolay. Puede nindong ihapot:
◼ “Huli sa gabos na kahaditan sa presenteng pamumuhay, sa paghona daw nindo posibleng magkaigwa nin tunay na maogmang buhay pampamilya? [Pasimbagon.] Inaasegurar kita kan tract na ini na posible iyan. Boot daw nindong basahon iyan?” Kun akoon iyan, puede kamong magpadagos paagi sa pagsabi: “Huling interesado kamo sa temang ini, puede man kamong magkamit kan librong ini na nagtatao nin detalyadong sadol kun paano manonompongan an kaogmahan sa pamilya.” Ipaheling an mga laog kan librong Kaogmahan nin Pamilya. Itokdo an pirang titulo kan mga kapitulo. Buksan sa pahina 10, asin basahon an huring mga tataramon sa parapo 17 sagkod sa poro kan parapo 18. Ialok an libro. Iareglo an pagdalaw liwat tangani na orog pa iyan na pag-olayan.
3 Puede nindong idagos an saindong enot na pag-orolay dapit sa maogmang buhay pampamilya paagi sa pagsabi:
◼ “Boot kong idoon an sarong bagay sa libro na kinua nindo na iniisip kong magugustohan nindo. An ultimong kapitulo nagpapaliwanag kan tunay na sekreto sa kaogmahan nin pamilya. [Basahon an parapo 2 sa pahina 183.] Mangnohon na an liabe iyo an iribang paggibo kan kabotan nin Dios. Irinerekomendar niamo na iribang pag-adalan nin mga pamilya an Biblia tangani na manodan kun ano an kabotan nin Dios asin kun paano iyan iaaplikar sa kairiba sa harong. Nag-aalok kami nin daing bayad na kursong pag-adal sa Biblia na nangangaipo sana nin nagkapirang bulan tangani na matapos. Kun totogotan nindo ako, ipaheheling ko sa saindo kun paano iyan kinokonduktahan.” Bumalik na dara an brosyur na Ano an Kahagadan sa Sato nin Dios? o an librong Kaaraman, arin man an magigin mas angay.
4 Kun nakikipag-olay sa mga kaklase sa eskuelahan o sa mga hoben sa teritoryo, puede kamong makakua nin reaksion sa hapot na ini:
◼ “Gurano kaimportante para sa mga magurang asin mga aki na papagdanayon na bukas an mga linya nin komunikasyon sa lambang saro? [Pasimbagon.] Mangnohon an sinasabi kan sadit na librong ini sa buhay pampamilya dapit sa temang ‘Sadiosan Asin Bukas na Komunikasyon.’ [Basahon an bilog na parapo 4 asin an enot na mga tataramon sa parapo 5 na nasa pahina 65 kan librong Kaogmahan nin Pamilya.] An minasunod na mga parapo nagtatao nin praktikal na mga suhestion kun paano mapaooswag an komunikasyon sa laog nin pamilya. Kun boot mong basahon an librong ini, puede kang magkaigwa nin sarong kopya sa sadit na kontribusyon.” Ipaliwanag na madalaw liwat kamo sa dai mahahaloy tangani na kuanon an saiyang mga komento sa saiyang nabasa.
5 Puede nindong pataluboon an saindong enot na pakipag-olay sa sarong hoben manongod sa komunikasyon sa pag-oltanan nin magurang asin aki paagi sa pagsabi kaini:
◼ “Inapresyar ko an interes na ipinaheling mo sa kahalagahan kan pagkaigwa nin marahay na komunikasyon sa laog nin saimong pamilya. Ano an sasabihon mong pinakaimportanteng tema na maninigong pag-olayan nin mga magurang asin mga aki?” Pasimbagon. Dangan buksan sa pahina 68 kan librong Kaogmahan nin Pamilya, asin basahon an simbag sa enot na kabanga kan parapo 11. “An pagkaigwa nin semanal na pag-adal sa Biblia sarong ekselenteng paagi na magkaigwa kan kaaraman nin Dios.” Iatubang an brosyur na Ano an Kahagadan sa Sato nin Dios? Ipaliwanag na an 16 na leksion kaiyan nagtatao nin pundamental na sumaryo kan mensahe nin Biblia. Basahon an introduksion sa pahina 2, dangan alokon na ponan an pag-adal sa enot na leksion.
6 Kun makanompong kamo nin sarong magurang sa pagharongharong, o tibaad sa sarong parke, puede nindong pukawon an interes paagi sa pagsabi:
◼ “Nasisierto ko na maoyon kamo na an pagpadakula nin mga aki ngonyan sarong tunay na angat. Ano sa paghona nindo an makapoprotehir sa saindong pamilya sa maraot na mga impluwensia? [Pasimbagon.] Uya an nagkapirang ekselenteng sadol na inapresyar ko.” Isaysay an ilustrasyon sa parapo 1 asin basahon an parapo 2 na nasa pahina 90 kan librong Kaogmahan nin Pamilya. Ipaliwanag kun paano iyan nagtatao nin timbang na paggiya na talagang epektibo tangani na maprotehiran an mga pamilya sa nakararaot na mga impluwensia. Ialok an libro asin iareglo na madalaw liwat tangani na pag-olayan an ano man na hapot na puedeng lumataw.
7 Sa saindong ikaduwang pagdalaw sa sarong magurang na nag-ako kan librong “Kaogmahan nin Pamilya,” puede nindong ipadagos an pag-orolay sa paaging ini:
◼ “Kan enot kitang magkamidbidan, naheling ko na tunay kamong nagmamalasakit sa saindong mga aki asin boot nindong protehiran sinda sa salang mga impluwensia. Tibaad dai pa nindo nababasa iyan, alagad igwa nin importanteng marhay na punto sa libro na iwinalat ko sa saindo na maninigo nindong masabotan. [Basahon an parapo 19 na nasa pahina 59.] An pagpatalubo nin relasyon sa Dios nangangahulogan nin pagmidbid sa saiya paagi sa mga pahina kan Biblia. Boot daw nindong idemonstrar ko kun paano niamo pinag-aadalan an Biblia bilang sarong pamilya?”
8 An kinabanon na mga parakonseho dai kayang ipaheling sa mga pamilya an dalan pasiring sa kaogmahan alagad siertong babayaan sinda na desganado. Idistribwir niato nin mahiwas an Kaogmahan nin Pamilya tanganing an mga tawo sa gabos na lugar matabangan kan Tataramon nin Dios na seguradohon an maogma asin daing sagkod na ngapit.—1 Tim. 6:19.