An mga Bagong Publikasyon na Ilinuwas Matabang Sato na Mapatood sa Diosnon na Debosyon
1 Pakatapos na mag-atender sa pandistritong kombension, orog niatong narealisar an pangangaipo na magpatood kan satong sadiri na diosnon na debosyon an satong pag-aaboton. (1 Tim. 4:7) Mantang hino-horophorop niato an gabos na impormasyon na iinatubang sa programa asin nagmamaigot na iaplikar ini sa satong buhay, napaparani kita nin orog ki Jehova sa tunay na pagsamba.
2 Alagad, an satong pagpatood sa diosnon na debosyon partikularmenteng mapapaoswag kun progresibo niatong nasasabotan an mayaman na impormasyon sa tolong bagong publikasyon na ilinuwas na naako sa pandistritong mga kombension. Nabasa na daw nindo iyan?
AN BAGONG BROCHURE
3 An nakakakombensir na Makakasuratan na mga argumento sa brochure na Should You Believe in the Trinity? makatatabang bako sanang sa pag-establisar na an Trinidad falsong doktrina kundi siring man sa pagpaliwanag sa iba kan katotoohan manongod sa Dios, sa saiyang Aki, asin sa banal na espiritu.—1 Cor. 8:6.
MGA SIMBAG PARA SA MGA HOBENES
4 Dai niato tolos malilingawan an pahayag sa kombension asin an espesyal na areglo para sa pagluwas kan librong Questions Young People Ask—Answers That Work. Minsan siring na itinao ini para sa mga hobenes, an mga magurang, nangongorogna an mga ama, dinagkang gamiton an libro sa pagpatood sa saindang mga aki asin sa ‘pagpadakula sainda sa disiplina asin pagtatanos nin isip ni Jehova.’—Efe. 6:4.
5 Kapwa an mga magurang asin mga aki maninigong magin lubos na pamilyar sa mahalagang impormasyon na ini na itinao kan organisasyon ni Jehova tanganing tabangan an mga hobenes na mapatood sa diosnon na debosyon. Magigibo ini sa mga pag-orolay kan pamilya.
TATARAMON NIN DIOS—BAKONG NIN TAWO
6 The Bible—God’s Word or Man’s?, an bagong librong ilinuwas kan Sabado, dinisenyo tanganing tabangan an mga tawong masabotan na an Biblia ipinasabong nin Dios. Tanganing epektibong magamit ini maninigo kitang magin personal na nakaaaram kan mga kabtang kaini tanganing ikatokdo an espisipikong punto sa libro kun ginagamit ini sa langtad.
7 Nagpapasalamat nanggad kita gabos ki Jehova huli sa abundang naapanahon na espirituwal na pagkakan na naako sa “Diosnon na Debosyon” na Pandistritong Kombension! Gamiton niato an mga probisyon na ini sa pagpadagos kan diosnon na debosyon asin sa pagtabang sa iba na magin mga parasamba kan satong Dios na si Jehova.