Pag-aatubang kan Maogmang Bareta—Paagi sa Epektibong Paggamit nin mga Tract
1 Durante kan 1987 “Manarig ki Jehova” na Pandistritong Kombension, apat na bagong tract an ilinuwas. Epektibo daw nindong ginagamit an mga tract na ini sa langtad?
2 Dakol na parahayag an nagwawalat nin mga tract kun mayong tawo sa harong. Asin itinatao ninda iyan sa mga tawong sibot na gayong magdangog sa mga puwertahan. Nanompongan kan iba na kun gamiton ninda an tract tanganing iintrodusir an saindang sadiri, nakatatabang ini tanganing pukawon an interes kan kagharong.
NOARIN ASIN PAANO IYAN GAGAMITON
3 Sa pagigin alisto sa mga oportunidad, puwede kamong makanompong nin dakol na okasyon tanganing ialok an mga tract. Bilang halimbawa, an mga tract makatatabang kun nagpapatotoo sa mga paryentes. Magagamit nindo iyan kun nagbabakasyon, mantang namamakal asin nagbibiyahe, sa eskuwelahan, o sa lugar kan saindong trabaho. Ibinubugtak daw nindo an mga tract sa bugtakan na madaling makua ini, tibaad sa bulsa, pitaka, o sa bag? Taano to dai maghanap nin mga okasyon tanganing ialok an mga tract?
4 Puwede nindong gamiton an mga tract tanganing makatao nin epektibong patotoo. Minsan siring na halipot an laog kaiyan na mensahe, nakakakombensir nanggad ini asin suportado nin malinaw na Makakasuratan na mga argumento. An mga tract may de kolor na mga retrato asin puwedeng makagibo nin dakol na karahayan sa ministeryo.
SA PAGLILINGKOD SA LANGTAD
5 Itinampok kan ibang parahayag an titulo kan tract tolos-tolos sa saindang introduksion. Taano ta dai nindo mismo probaran an pagdolok na ini? Puwede nindong sabihon: “Kumusta. Naoogma akong manompongan kamo digdi sa saindong harong. Nagboluntaryo akong makikabtang sa pagdadara nin importanteng gayong mensahe. Manonompongan ini sa tract na ini na Life in a Peaceful New World. Ini an kopya nindo. Libre ini. [Itao ini sa kagharong.] Bako daw mawot nindong mabuhay sa siring na matoninong na mga kapalibotan?“ Dangan magpadagos sa Topikong Mapag-oolayan, asin ikonektar an alok sa bulan na iyan.
6 An tract na Why You Can Trust the Bible puwede man na magin epektibong gayo sa saindong lugar. Bilang halimbawa, puwede nindong sabihon: “Nagwawalat kami nin libreng mensahe sa Biblia sa samong mga kataraed ngonyan. Uya an kopya nindo. [Itao ini sa kagharong.] Mangnohon na an tema dapit sa Biblia. Sa paghona daw nindo an mga tawo ngonyan nawaran na nin kompiansa sa Biblia? [Togotan siang magsimbag.] An tract na ini makatatabang saindo tanganing masabotan kun taano ta puwede kitang magsarig sa sinasabi kan Biblia.“ Ipadagos an Topikong Mapag-oolayan, na ipinaheheling an mga bendisyon na inandam nin Dios para sa daga.
7 An pagdistribuwir nin mga tract sa Bibha sarong epektibong paagi sa pag-atubang kan maogmang bareta. Igwa iyan nin importanteng kabtang sa satong ministeryo asin kun impormal na nagpapatotoo. Epektibo niatong gamiton an mga iyan sa pagtao nin marahay na patotoo asin tabangan an iba na makanood dapit sa Kahadean nin Dios.